દિવાળી / અમદાવાદીઓ ફટાકડા તો ફોડી શકશો પરંતુ આ સમયે જ, પોલીસ કમિશનરે બહાર પાડ્યું જાહેરનામું

• દિવાળીને લઈને અમદાવાદ પોલીસ કમિશનરનું જાહેરનામું
• રાત્રે 8 થી 10 વાગ્યા સુધી ફોડી શકાશે ફટાકડા
• ફટાકડાની લૂમ ફોડવા પર પ્રતિબંધ

દિવાળીને લઈને અમદાવાદ પોલીસ કમિશનરે બહાર પાડેલ જાહેરનામાં પ્રમાણે શહેરમાં રાત્રે 8થી 10 વાગ્યા સુધી ફટાકડા  ફોડી શકાશે. તો ફટાકડાની લૂમ ફોડવા પર પ્રતિબંધ મુકવામાં આવ્યો છે. આ સાથે જ 125 ડેસિબલથી વધુ અવાજ કરતા ફટાકડા નહીં ફોડી શકાય. 

વિદેશી ફટાકડાની આયાત અને વેચાણ પર પ્રતિબંધ 

પોલીસ કમિશનરના જાહેરનામા પ્રમાણે હોસ્પિટલ, નર્સિંગ હોમ, આરોગ્ય કેન્દ્ર, શૈક્ષણિક સંસ્થા, ન્યાયાલયની 100 મીટર નજીક ફટાકડા ફોડવા પર પ્રતિબંધ મુકવામાં આવ્યો છે. તો વિદેશી ફટાકડાની આયાત અને વેચાણ તથા ઓનલાઇન વેપાર પર પણ મનાઇ ફરમાવવામાં આવી છે. આ જાહેરનામાનો અમલ 9 નવેમ્બરથી 19 નવેમ્બર સુધી લાગુ રહેશે. 

ગુજરાત સરકારે પણ સુપ્રીમના આદેશનું પાલન કરવાની કરી છે વાત 

ગુજરાતમાં ફટાકડા ફોડવા મુદ્દે એક જાહેરનામું બહાર પાડવામાં આવ્યું છે જેમાં કહેવાયું છે કે, સુપ્રીમ કોર્ટના આદેશનું પાલન કરવામાં આવશે.આ ગાઇડલાઇન પ્રમાણે રાજ્યમાં ફટાકડા ફોડી શકાશે. આ સાથે જ જિલ્લા મેજિસ્ટ્રેટ અને પોલીસ કમિશનરને નિયમ બનાવવા આદેશ આપવામાં આવ્યા છે. આ સાથે જ ફટાકડા ફોડવા અને વિદેશથી આયાત મુદ્દે તપાસના આદેશ પણ આપવામાં આવ્યા છે અને જાહેરમાં ફટાકડા ફોડવા પર પ્રતિબંધ મુકવાનો નિર્ણય લેવાયો છે. 

જાહેરમાં માસ્ક પહેરવું ફરજીયાત બનશે

ઉલ્લેખનીય છે કે, દિવાળી નજીક આવી રહી છે અને એક તરફ કોરોનાના કેસ વધવાની સંભાવનાઓ છે ત્ચારે અગમચેતીના ભાગરૂપે કેટલાક રાજ્યો દ્વારા ફટાકડા નહીં ફોડવા અંગેના આદેશ આપ્યા છે ત્યારે ગુજરાત સરકારે પણ એક જાહેરનામું બહાર પાડ્યું છે અને જેમાં વિદેશથી ફટાકડા આયાત કરવા પર પ્રતિબંધ મુકવામાં આવ્યો છે. આ સાથે જ ગેરકાયદેસર આયાત, સંગ્રહ અને વેચાણ સામે કાર્યવાહી કરવા સૂચના આપવામાં આવી છે. તો જાહેરમાં માસ્ક પહેરવું ફરજીયાત બનશે.