અમદાવાદમાં એક કા ડબલ સ્કીમના નામે લોકો સાથે રૂપિયાની છેતરપિંડી કરતા 3 શખ્સોને ઝડપી લેવામાં પોલીસને સફળતા મળી છે.
અમદાવાદમાં એક કા ડબલ સ્કીમનો પર્દાફાશ
ક્રાઇમ બ્રાંચે 3 શખ્સોની કરી ધરપકડ
પૈસા ડબલ કરવાની લાલચ આપી હતી
પૈસા કમાવાની અને તાબડતોબ રૂપિયાવાળા થવાની લાલચમાં માણસો અનેક વખત છેતરાઈ જતા હોય છે. આવી ઘટના અવારનવાર બનતી હોય છે. તેવામાં અમદાવાદમાં ચાલતા એક કા ડબલ કૌભાંડનો પર્દાફાશ થયો છે. આ પ્રકરણ અંગે પોલીસને કાને વાત પડતા SOG ક્રાઇમ બ્રાંચે દરોડો પાડ્યો હતો. જે દરોડા દરમિયાન ડબલ રૂપિયાની લાલચ આપી લોકોને છેતરતી ગેંગના 3 શખ્સોને સરખેજ ફતેવાડી પાસેથી પોલીસે દબોચી લઈ તેની વિરુદ્ધ કાયદેશરની કાર્યવાહી હાથ ધરી હતી.
વ્હાઈટ નોટ પર કેમિકલ લગાવીને નોટ બનાવતા હતા
અમદાવાદમાં એક કા ડબલ સ્કીમનો પર્દાફાશ થયો છે. વિધિના નામે રૂપિયા ડબલ કરી આપવાનું કહી ભેજાબાજ આરોપીઓ અંધશ્રદ્ધા ફેલાવતા હતા અને લોકોને શિશામાં ઉતારી રૂપીયા ખંખેરતા હતા. તેવામાં 11 લાખ રૂપિયાના ડબલ કરી આપવાની લાલચ આપી હતી. જે મામલે પોલીસને જાણ થતાં પોલીસે રેડ પાડી હતી આ દરમિયાન સરખેજ ફતેવાડી પાસે વ્હાઈટ નોટ પર કેમિકલ લગાવીને આરોપીઓ નોટ બનાવતા હોવાનું ભોપાળુ ઉઘાડું પડ્યું હતું. આથી ક્રાઇમ બ્રાંચે 3 શખ્સોની કરી ધરપકડ કરી કૌભાંડના મૂળ સુધી પહોંચવા તપાસ આરંભી છે.
તાજેતરમાં વડોદરામાં ઝડપાઇ હતી ઠગ ગેંગ
ઉલ્લેખનીય છે કે શહેરમાં આ પહેલો કિસ્સો બન્યો નથી. આ પહેલા પણ અનેક આવા કિસ્સાઓ સામે આવ્યા છે. જેમાં ગ્રાહકોને આકર્ષવા એક કા ડબલ કરી આપવાની સ્કીમ આપતાં હોય છે. જ્યાં ગ્રાહકો પૈસાની લાલચમાં ગમે તેવી જગ્યાએ રોકાણ કરે છે અને બાદમાં છેતરપિંડીનો ભોગ બને છે. તાજેતરમાં વડોદરા વનવિભાગ દ્વારા NGOની મદદથી છટકું ગોઠવી એક ઠગ ગેંગ ઝડપી પાડવામાં આવી છે. આ ગેંગ દ્વારા લોકોને અંધશ્રદ્ધા ફેલાવી અને કાંટાવાળા ઉંદરો વેચવામાં આવતા હતા. આ ગેંગનો દાવો હતો કે 'કાંટાવાળા ઉંદરોની તાંત્રિક વિધિ કરવાથી રૂપિયા ડબલ થાઇ જાય છે. વન વિભાગના છટકામાં આ ગેંગ 15 લાખ રૂપિયામાં ઉંદરો વેચવા તૈયાર થઈ ગઈ હોવાનું સામે આવ્યું હતું.વડોદરાના વાઘોડિયાના દેવળીયા ગામે રહેતા એશોક વસાવાના મકાનમાં તાંત્રિક વિધિ માટે કાંટાવાળા ઉંદરો લાવવામાં આવ્યા હોવાની જાણ થતાં વનવિભાગે છટકું ગોઠવ્યું હતું. જેમાં કાંટાવાળા ઉંદરો સાથે ધુનભાઈ રાણા, અશોક વસાવા, મુકેશ વજેસિંગ નાયક, ઇશ્વર ઝવેર ભાઈ નાયકને ઝડપી પાડ્યા હતા. સાથે પાંચ કાટાવાળા ઉંદરો મળી આવ્યા હતા.