અમદાવાદમાં એમડી ડ્રગ્સના જથ્થા સાથે ચાર આરોપીઓને ક્રાઇમ બ્રાન્ચે દબોચી લઈ તપાસ હાથ ધરી છે.
અમદાવાદમાંથી વધુ એક વખત એમડી ડ્રગ્સનો જથ્થો ઝડપાયો
ડ્રગ્સ લઈ આવતા ચાર શખ્સોની કરી ધરપકડ
એક આરોપી રાજા બાબુ પોલીસનો પૂર્વ મિત્ર અને બાતમીદાર
અમદાવાદ શહેરમાંથી વધુ એક વખત એમડી ડ્રગ્સના જથ્થા સાથે ચાર આરોપીઑને પોલીસે ઝડપી લીધા છે. 38 લાખના જથ્થા સાથે ચાર આરોપીઓને ક્રાઈમ બ્રાન્ચે દબોચી લઈ કાર્યવાહી હાથ ધરી છે. જે આરોપીઑની પૂછપરછમાં એક શખ્સ પોલીસનો બાતમીદાર રહી ચૂક્યો હોવાનો અને લોકડાઉનમાં ધંધો બંધ થઇ જતાં ડ્રગ્સના કાળો કારોબારમાં ધકેલાયો હોવાનો ચોંકાવનારા ખુલાસા થયા છે.
28 લાખનું 289 ગ્રામ એમડી ડ્રગ્સ ઝડપાયું
એમડી ડ્રગ્સ પ્રકરણમાં સંડોવાયેલ આરોપી ઈદ્રિશ ઉર્ફે ઇદુ શેખ, મોહમદ ઇરફાન ઉર્ફે રાજા બાબુ શેખ, ધનુષ ઉર્ફે બીટ્ટુ આસોડિયા અને મનુ રબારીને પોલીસે ઝડપી લીધા છે. આરોપીઓ એક કારમાં એમડી ડ્રગ્સનો જથ્થો લઈ આવતા હોવાની બાતમી મળતા ક્રાઇમ બ્રાન્ચની ટિમ રોપડા ચાર રસ્તા પહોંચી હતી. જ્યાં વોચ ગોઠવી ફિલ્મી ઢબે કારનો પીછો કરી આરોપીઓની ધરપકડક કરી લીધી હતી. જે આરોપીઑની પૂછપરછમાં આરોપીઓ પાસેથી પોલીસે 28 લાખનું 289 ગ્રામ એમડી ડ્રગ્સ ઝડપાતા પોલીસ પણ ચોંકી ઉઠી હતી.
આરોપીઑ અમદાવાદ ડ્રગ્સ લઈને આવતા જ પોલીસ ઝપટે ચડયા
આરોપી ઇદ્રિશ ઉર્ફે ઇદુ અને રાજા બાબુ છેલ્લા આઠ માસથી ચારેક વખત એમડી ડ્રગ્સનો જથ્થો લાવી ચુક્યા હોવાનું સામે આવ્યું છે.આરોપીઓ અત્યાર સુધી મુંબઈથી જ આ જથ્થો લાવતા હોવાનું સામે આવ્યું છે. બાદમાં છૂટક વેચાણ કરતા હતા. પોલીસે પકડ્યા તે પહેલા આરોપીઓ મુંબઈ એમડી ડ્રગ્સનો જથ્થો આદિલ કે જે ડોંગરી મુંબઇનો છે તેની પાસેથી લેવા ગયા હતા ત્યાંથી ટ્રાવેલ્સમાં બેસી સુરત આવ્યા હતા અને બાદમાં આરોપી ધનુષ અને મનુ સુરત હાઇવેથી બને મુખ્ય પેડલરોને ગાડી મારફતે અમદાવાદ લઈને આવતા જ પોલીસ ઝપટે ચડયા હતા.
આરોપી પાથરણા વાળાઓ પાસે પણ હપ્તા ઉઘરાવી આતંક મચાવતો
આરોપી ઈદ્રિશ પાલડીમાં પ્રોહીબિશનના અને ક્રાઇમ બ્રાન્ચમાં હથિયારના ગુનામાં ઝડપાયો હતો. જ્યારે રાજાબાબુ કારંજમાં જાહેરનામા ભંગના ગુનામાં ઝડપાયો હતો. પોલીસની પૂછપરછ દરમિયાન અનેક ખુલાસા થયા છે જેમાં આરોપી રાજા બાબુ લાલ દરવાજામાં પાથરણા પાથરી હરાજીનો ધંધો કરતો હતો. સાથે જ અન્ય પાથરણા વાળાઓ પાસે પણ હપ્તા ઉઘરાવી આતંક મચાવતો હતો. કારંજના પૂર્વ પોલીસ અધિકારીઓના પીઠબળથી રાજાબાબુનું વર્ચસ્વ વધ્યું હતું. પણ અધિકારીઓ બદલાતા આરોપી રાજાબાબુ બીજી પત્ની સાથે કારંજ વિસ્તાર છોડી જુહાપુરા રહેવા લાગ્યો હતો વધુમાં લોકડાઉનમાં ધંધા પડી ભાગતા અને લોકો હપ્તો ન આપતા આરોપી એમડી ડ્રગ્સનો પેડલર બનવાની સાથે એમડીનો બંધાણી પણ બની ગયો હોવાનું ખૂલ્યું હતું. બીજી તરફ આરોપી ઈદ્રિશની પત્ની ખુશ્બુ પણ અગાઉ એમડી ડ્રગ્સનો કારોબાર કરતી હતી જયારે ધનુષ અને મનુ રબારી થોડા સમયથી ડ્રગ્સના રવાડે ચઢતા તેઓ પણ પેડલર બનવા જઈ રહ્યા હતા તે પહેલા જ ઝડપાઇ ગયા હતા.