ધમકી / અમદાવાદના યુવકને પરેશાન કરવા એવો કોલ કર્યો કે પોલીસે કરી ધરપકડ

યુસુફને હેરાન પરેશાન કરવા માટે યુવકે ફોન કર્યો હોવાની કબૂલાત કરી છે. પોલીસની પ્રાથમિક તપાસમાં યુવક માનસિક રીતે બીમાર હોવાનું સામે આવ્યું છે. ગઇ કાલે મોડી રાત્રે પોલીસ કંટ્રોલરૂમમાં એક ફોન આવ્યો હતો.

જેમાં યુસુફ નામનો એક આઇએસઆઇ એજન્ટ રથયાત્રાના રૂટ પર ફરી રહ્યો છે અને રથયાત્રાને લઇને કાંઇક કરે તેવી માહિતી એક યુવકે આપી હતી. ઘટનાની ગંભીરતા લઇને ઉચ્ચ પોલીસ અધિકારીઓએ આ મામલે તપાસ કરવાનું શરૂ કરી દીધું હતું.

પોલીસે ખારુ નાળા પાસે જઇને યુસુફ પઠાણ નામના યુવકની શોધખોળ શરૂ કરી હતી, જોકે તે નહીં મળતાં  પોલીસે ફોન કરનાર યુવકને ઝડપી લીધો હતો. તેની પૂછપરછમાં જાણવા મળ્યું 
હતું કે યુસુફને ફસાવવા માટે તેને બોગસ મેસેજ પોલીસને આપ્યા હતા.

ઝોન ૨ ના ડીસીપી ધર્મેન્દ્ર શર્માએ જણાવ્યુ છે યુસુફ છૂટક કામ કરીને પોતાનું ગુજરાન ચલાવે છે. તેને આઇએસઆઇ કે કોઇ અન્ય આંતકી સંસ્થાઓ સાથે કોઇપણ સંબંધ નથી. ફોન કરનાર યુવક મહોમદ ઉવેશ સૈયદની ધરપકડ કરી લીધી છે.

કોઇ પણ કારણ વગર યુસુફને હેરાન કરવા માટે તેણે પોલીસ કંટ્રોલરૂમમાં ફોન કર્યો હતો. ઉવેશ માનસિક રીતે બીમાર હોવાનું તેના પરિવારજનો કરી રહ્યા છે. ઉવેશે પોલીસ કંટ્રોલરૂમમાં ફોન કરીને જાણ કરી હતી કે ત્રણ દરવાજા ખારુનાં નાળાં પાસે યુસુફ નામની શંકાસ્પદ વ્યકિત ફરી રહી છે.

જે આઇએસઆઇ સાથે સંકળાયેલી છે અને પાકિસ્તાન જઇને આવી છે.  યુસુફ રથયાત્રાના રૂટ પર ફરે છે અને કાંઇક કરે તેવી શક્યતા છે. ધર્મેન્દ્ર શર્માએ વધુમાં જણાવ્યું છે કે ઉવેશે તેના ઘરમાંથી ફોન કર્યો હતો. ફોન કર્યા બાદ તેના પરિવારજનોએ તેને ઠપકો આપ્યો તો તેને માત્ર યુસુફને હેરાન કરવા માટે ફોન કર્યો હોવાની કબૂલાત કરી હતી. 

પોલીસે ઉવેશની ધરપકડ કરીને તપાસ શરૂ કરી છે. ઉલ્લેખનીય છેકે નહેરુનગરની બધી બીઆરટીએસ બસમાં ત્રણ દિવસમાં બોમ્બ બ્લાસ્ટ થશે તેવી ધમકી પોલીસ કંટ્રોલરૂમમાં આપનાર આસીમ શેખની એસઓજીએ થોડાક દિવસ પહેલાં ધરપકડ કરી હતી.

આરોપી આસીમ શેખને નહેરુનગર બીઆરટીએસ બસ સ્ટેન્ડના ટિકીટ કલાર્ક સાથે બોલાચાલી થતાં તેને સબક શિખવાડવા માટે નહેરુનગર ચાર રસ્તા પહોંચી બોમ્બથી ઉડાવી દેવાનો કન્ટ્રોલ મેસેજ કર્યો હતો. આરોપી આસીમ રીઢો ગુનેગાર હોઈ તેની સામે પ્રોહિબિશન, મારામારી, ચોરી સહિતના ગુના દાખલ થયેલા છે.