હોબાળો / અમદાવાદમાં માસ્ક મામલે હોબાળોઃ ‘દંડ નહીં ભરીએ થાય તે કરી લો’ કહી પોલીસને ધક્કા માર્યા

શહેરના નવરંગપુરા ખાતે સીજી રોડ મ્યુનિસિપલ માર્કેટ પાસે પાંચ વ્યક્તિ ટોળું વળીને ઊભી હતી, જેથી માસ્ક વગર ઊભેલી ત્રણ વ્યક્તિને દંડ ભરવાનું કહેતાં તેમણે દંડ નહીં ભરીએ તમારાથી થાય તે કરી લો એમ કહી પોલીસ સાથે માથાકૂટ કરી ધક્કા મારી ભારે હોબાળો મચાવ્યો હતો, જેથી પોલીસે પાંચ વ્યક્તિ પૈકી ત્રણ વ્યક્તિની અટકાયત કરી છે જ્યારે બે વ્યક્તિ તકનો લાભ લઇ ફરાર થઇ ગઈ હતી.

નવરંગપુરા પોલીસ  સ્ટેશનના હેડ કોન્સ્ટેબલ ઘનશ્યામભાઈ ભગવાનભાઈએ નવરંગપુરા પોલીસ સ્ટેશનમાં પાંચ વ્યક્તિ વિરુદ્ધ ફરિયાદ નોંધાવી છે. ઘનશ્યામભાઈ અને તેમના સ્ટાફના કર્મચારીઓ ગઈ કાલ સાંજે સીજી રોડ પરની મ્યુનિસિપલ માર્કેટ પાસે પેટ્રોલિંગમાં હતા તે દરમિયાન એમ.એમ. માર્કેટના ઈન ગેટ પાસેની ફૂટપાથ પર પાંચ વ્યક્તિ ટોળું વળીને ઊભી હતી, જેમાંથી ત્રણ વ્યક્તિએ માસ્ક ન પહેર્યું હોવાથી પોલીસે માસ્કનો દંડ ભરવા માટે કહ્યું હતું.

પોલીસે દંડ ભરવાનું કહેતાં ઉશ્કેરાયેલ પાંચેય વ્યક્તિએ કહ્યું કે તમે લોકો પાસેથી ખોટી રીતે દંડ ઉઘરાવો છો, જેથી પોલીસે દંડના મેમોની પહોંચ પણ આપવામાં આવશે એમ કહેતાં તમામે ઊંચા અવાજમાં પોલીસ કર્મચારીને કહ્યું કે દંડ તો ભરવાના નથી, તમારાથી થાય તે કરી લો, જોકે પોલીસે દંડ ના ભરવો હોય તો પોલીસ સ્ટેશન ચાલો એમ કહેતાં પાંચેય વ્યક્તિએ ઝપાઝપી કરી બૂમો પાડી લોકોનાં ટોળાં એકત્ર કર્યાં હતાં.

દરમિયાન નવરંગપુરા મોબાઈલ વાન સ્થળ પરથી પસાર થતાં તે મદદે આવી પહોંચી હતી. પોલીસે બળપ્રયોગ કરી ત્રણેય આરોપીને સરકારી વાનમાં બેસાડી દીધા જ્યારે બે આરોપી ધક્કામુક્કી કરી ફરાર થઈ ગયા હતા.

પોલીસે પૂછપરછ કરી ત્યારે તેમણે તેમનાં નામ આકાશ ની‌િતન પટેલ, મહેન્દ્ર અમરત પટેલ અને તેમનો પુત્ર જયકુમાર  હોવાનું જાણવા મળ્યું હતું, જ્યારે ફરાર થઈ ગયેલા આરોપીમાં જયમીન પ્રકાશ પટેલ અને ધર્મેશ બિપિન પટેલનો સમાવેશ થાય છે. નવરંગપુરા પોલીસે પાંચેય આરોપી વિરુદ્ધ ગુનો નોંધી ફરાર થઈ ગયેલા આરોપીની શોધખોળ હાથ ધરી છે.