કરદાતા / ઓનલાઈન પ્રોપર્ટી ટેક્સ પેમેન્ટમાં 2 ટકા રિબેટ ન અપાતું હોવા છતા અમદાવાદીઓએ તિજોરી છલકાવી

પ્રોપર્ટી ટેક્સના કરદાતાઓ પણ ટેક્સ ભરપાઇમાં તંત્રની લાલ આંખ થતાં દોડતા થયા હતા, જોકે ટેક્સ વસૂલાતમાં આંખે ઊડીને વળગે તેવી બાબત એ છે કે હવે અમદાવાદીઓ ઓનલાઇન પ્રોપર્ટી ટેક્સ પેમેન્ટમાં પણ ઉત્સાહી બન્યા છે.

ઓનલાઈન ટેક્સમાં બે ટકા રિબેટ અપાતું ન હોવા છતાં કરદાતાઓએ તિજોરી છલકાવી 

ટેક્સ વિભાગનાં આધારભૂત વર્તુળો ઓનલાઇન ટેક્સ પેમેન્ટમાં કરદાતાઓએ દાખવેલા ઉત્સાહ અંગે સત્તાવાર આંકડાકીય માહિતી આપતાં જણાવ્યું છે કે ગત નાણાકીય વર્ષ ૨૦૧૮-૧૯માં ૧ એપ્રિલ, ૨૦૧૮થી ૩૧ માર્ચ, ૨૦૧૯ સુધી મ્યુનિસિપલ તિજોરીને કુલ રૂ.૧૧૮.૨૧ કરોડની આવક થઇ હતી. આટલી આવક મેળવવા ૧,૭૪,૪૭૩ રિસિપ્ટ ફડાઇ હતી. 

કરદાતાઓ પ્રોપર્ટી ટેક્સ બિલમાં છપાતા ક્યુઆર કોડ સિવિક સેન્ટરમાં મુકાયેલાં સ્વાઇપ મશીન, એએમસી સેવા એપ, તંત્રની વેબસાઇટ જેવા વિવિધ માધ્યમથી પ્રોપર્ટી ટેક્સનું રોકડમાં કે ચેકથી પેમેન્ટ કરવાના બદલે ઓનલાઇન પેમેન્ટ કરવા પ્રત્યે વધુ ઝોક દાખવી રહ્યા છે.

જેના કારણે ચાલુ નાણાકીય વર્ષ ૨૦૧૯-૨૦માં ગત તા. ૧ એપ્રિલ, ૨૦૧૯થી ગત તા. ૯ ઓગસ્ટ, ૨૦૧૯ સુધીના ટૂંકા સમયગાળામાં ઓનલાઇન પેમેન્ટથી તંત્રની તિજોરી છલકાઇ ઊઠી છે. આ સમયગાળામાં પ્રોપર્ટી ટેક્સ વિભાગ દ્વારા ૧,૪૯,૬૬૦ રિસિપ્ટથી કુલ રૂ.૧૭૨.૩૭ કરોડની આવક મેળવાઇ છે એટલે કે ગત સમગ્ર નાણાકીય વર્ષની રૂ.૧૧૮.૨૨ કરોડની આવક કરતાં આશરે રૂ.૫૫ કરોડની વધુ આવક થઇ ચૂકી છે.

અત્રે ઉલ્લેખનીય છે કે ચાલુ નાણાકીય વર્ષના એપ્રિલ મહિનામાં કરદાતાઓને એડ્વાન્સ પ્રોપર્ટી ટેક્સ રિબેટ યોજના હેઠળ ટેક્સ બિલમાં દસ ટકા રિબેટ અપાયું હતું, જોકે ઓનલાઇન પેમેન્ટમાં અપાતું બે ટકા રિબેટ હવે મળતું ન હોવા છતાં પ્રોપર્ટી ટેક્સના કરદાતાઓએ મ્યુનિ. તિજોરીને માત્ર પાંચ મહિનામાં છલકાવી દીધી છે.