અમદાવાદમાં એક યુવતીને પામવા બે પ્રેમીઓ વચ્ચેની લડાઈ ચાલી રહી હતી. જેમાં એક પ્રેમીને સબક શીખવાડવા અન્ય એક ગુનેગાર બની ગયો.
એક ફૂલ દો માલીનો વિવાદ
પ્રેમિકાને પામવા પ્રેમીનું કારસ્તાન
યુવતીના પ્રેમ સબંધનો ભાંડો ફૂટતા થયો વિવાદ
અમદાવાદના સોલામાં વિદ્યાર્થીનું અપહરણ કરાયું હતું. જે વિદ્યાર્થીનું અપહરણ થયું હતું તેનો નગ્ન વીડિયો બનાવી છોડી તો મુકાયો જ.. પરંતુ આરોપીઓની ધરપકડ બાદ એક ફૂલ અને દો માલીનો ખુલાસો થયો છે. એટલે કે, એક યુવતીને પામવા બે પ્રેમીઓ વચ્ચેની લડાઈ ચાલી રહી હતી. જેમાં એક પ્રેમીને સબક શીખવાડવા અન્ય એક ગુનેગાર બની ગયો.
અમદાવાદના શહેરના સોલામાં પ્રેમને પામવા બે પ્રેમીઓ વચ્ચે જંગનો કિસ્સો સામે આવ્યો છે. જેમાં એક યુવતીએ બે પ્રેમીઓ વચ્ચે સંબંધ રાખ્યો. પરંતુ તેની આ પ્રેમલીલાનો ભાંડો ફૂટી ગયો. જોકે તેનો ભાંડો ફૂટતા જ એક પ્રેમી તેના પ્રેમમાં એટલો પાગલ બની ગયો કે, તેને પામવા માટે ગુનેગાર બની ગયો.
બીજા પ્રેમીનું અપહરણ અને નગ્ન વીડિયો બનાવ્યો
ઘટના કંઈક એવી છે કે, ચાણક્યપુરીમાં રહેતા અને સિવિલ એન્જીનિયરિંગનો અભ્યાસ કરતા વિદ્યાર્થી રિતેશ પટેલનું 24 માર્ચે ચાર શખ્સોએ કારમાં અપહરણ કર્યું હતું અને તેના ગુપ્ત ભાગે માર મારીને નગ્ન વીડિયો ઉતારીને છોડી દીધો હતો. જે બાદ આ વિધાર્થીએ અજાણ્યા યુવકો વિરુદ્ધ ફરિયાદ નોંધાવી હતી. પોલીસે ફરિયાદ બાદ તપાસ કરતા અપહરણની ઘટનામાં ત્રિકોણીય પ્રેમ સંબંધનો ખુલાસો થયો. રિતેશ પટેલની પ્રેમિકાના બીજા પ્રેમીએ મિત્રો સાથે મળીને યુવકનું અપહરણ કરીને માર માર્યો હોવાનું ખુલ્યું. પોલીસે આ ઘટનામાં યુવતીના પ્રેમી મિત પટેલ અને તેના મિત્ર દિપક પટેલની ધરપકડ કરી છે.
સ્કૂલ સમયથી પાંગર્યો હતો આ પ્રેમ
ત્રિકોણીય પ્રેમ કહાનીમાં રિતેશ પટેલના છેલ્લા 6 વર્ષથી એક યુવતી સાથે પ્રેમ સંબંધ હતા. એક ગામના રહેવાસી હોવાથી સ્કૂલ સમયથી પ્રેમ પાંગર્યો હતો. જ્યારે આરોપી મિત પટેલ ડીજેનું કામ કરે છે. અને 6 મહિના પહેલા ડી.જે પાર્ટીમાં આ યુવતીના સંપર્કમાં આવ્યો. આ મુલાકાતમાં બન્ને વચ્ચે પ્રેમ શરૂ થયો. યુવતી બન્ને પ્રેમીઓ સાથે સંબંધ રાખ્યો. એક દિવસ આરોપી મિત પોતાની પ્રેમિકાના મોબાઈલમાં રિતેશ સાથેની વાતચીતના મેસેજ જોઈ ગયો. તો પ્રેમિકાએ રિતેશ મારવાની ધમકી આપીને બ્લેકમેઇલ કરી સંબંધ રાખે છે તેવું મિતને જણાવ્યું. બસ તેના આ જુઠાણામાં ઉશ્કેરાયેલા મિતે પોતાના મિત્રો સાથે મળીને રિતેશની રેકી કરી અપહરણ કર્યું.
પોલીસે નગ્ન વીડિયોને મોબાઈલમાંથી રિકવર માટે FSLની મદદ લીધી
સોલા પોલીસે આ કેસમાં મિત પટેક, દિપક પટેલ, સૌરીન પટેલ અને ચિરાગ યાદવની ધરપકડ કરી છે. આરોપીઓએ ફરિયાદી યુવકનો નગ્ન વીડિયો બનાવીને ડિલીટ કરી દીધો હોવાથી પોલીસે તેમનો મોબાઈલ FSLમાં મોકલીને ડેટા મેળવવાની કાર્યવાહી શરૂ કરી છે. આ ઉપરાંત આ ઘટનામાં અન્ય કોઈ વ્યક્તિની સંડોવણી છે કે, નહીં તે મુદ્દે તપાસ શરૂ કરી છે