કૃષ્ણનગર પોલીસ મથકે એક સગીરાએ કપડા બદલતો વિડીયો વાયરલ કરવાની ધમકી આપી અને છેડતી કરી હોવાની ફરિયાદ નોંધાઈ છે
સગીરાની છેડતીની ફરિયાદ
અંગત વીડિયો વાયરલ કરવાની ધમકી
આરોપીની કરાઇ ધરપકડ
અમદાવાદમાં શરમજનક ઘટના
અમદાવાદ શહેરમાં ફરી એક વખત મહિલાઓની સુરક્ષાને લઈ ને સવાલો ઉભા થયા છે. નિકોલમાં સગીરા પર દુષ્કર્મની ફરિયાદ બાદ કૃષ્ણનગર પોલીસ મથકે વધુ એક સગીરાએ છેડતીની ફરિયાદ નોધાવી છે. સગીરાનો કપડા બદલતો વિડીયો વાયરલ કરવાની ધમકી આપી છેડતી કરી હોવાની ફરિયાદ નોંધાઈ છે. પોલીસે આરોપીની ધરપકડ કરી વધુ તપાસ હાથ ધરી છે.
વીડિયો વાયરલ કરવાની ધમકી આપી કરતો હતો બ્લેકમેલ
શહેરના કૃષ્ણનગર પોલીસ મથકે છેડતીના ગુનામાં સંડોવાયેલ આરોપી રચિત જોષીની ધરપકડ કરી છે. આરોપી સગીરાની પાડોશમા રહેતો હતો અને સગીરાની છેડતી કરતો હતો. આરોપી સગીરાને બ્લેક મેલ કરતો અને ધમકી આપતો હતો કે તારો કપડા બદલતો વિડીયો મારી પાસે છે. તુ સંબંધ નહી રાખે તો વાયરલ કરી દઈશ. ઉપરાંત સગીરાએ જ્યારે આરોપીને વોટ્સએપ પર બ્લોક કર્યો ત્યારે પણ ધમકી આપી અનબ્લોક કરાવ્યો હતો.
પોલીસે કરી ધરપકડ અને મોબાઈલ FSLમાં મોકલી દીધો
આરોપી રચિતની ધરપકડ કરતા સામે આવ્યુ કે તેણે સગીરાનો વિડીયો અને મોબાઈલમા થયેલી ચેટ ડિલિટ કરી દીધી છે. પરંતુ પોલીસે મોબાઈલ એફએસએલમાં મોકલી આપ્યો છે. જેથી પુરાવા એકઠા કરી શકાય. ઉપરાંત આરોપી એ વિડીયો કેવી રીતે મેળવ્યો અને સગીરાને બ્લેકમેઈલ કરવા પાછળ અન્ય કોઈ હેતુ હતો કે કેમ તે અંગે તપાસ હાથ ઘરી છે. આરોપીની ધરપકડ બાદ તપાસ કરતા તે ખાનગી કંપનીમાં નોકરી કરતો હોવાનુ સામે આવ્યુ. ઉપરાંત આરોપી સગીરાને જે બિભત્સ મેસેજ અને વિડીયો મોકલ્યા હતા. તે પણ પોલીસે કબ્જે કર્યા છે. જોકે આરોપીની પુછપરછમાં શુ ખુલાસા થાય છે તે જોવુ રહ્યુ.