પોલીસ તોડકાંડ / અમદાવાદ: નરોડા પોલીસે લાખોનો તોડ કરીને પહેલી FIR ફાડી નાખી, હોટલ પર રેડ કરી તોડબાજી કરતી પોલીસનો ભાંડફોડ

• અમદાવાદની નરોડા પોલીસનું તોડબાજીના નામે રેડનું નાટક?
• રૂપિયાનું ‘સેટિંગ’ થઈ જતાં પોલીસે કેસની FIR જ ફાડી નાખી
• તોડકાંડમાં જોઈન્ટ પોલીસ કમિશનરે DCPને તપાસના આદેશ આપ્યા

કેટલાક ભ્રષ્ટ પોલીસ કર્મચારીઓના કારણે સમગ્ર પોલીસ ડિપાર્ટમેન્ટને અનેક વખત નીચા જોણું થાય છે. આવો જ એક ચકચારી બનાવ શહેરના નાના ચિલોડા વિસ્તારમાં સામે આવ્યો છે. પ્રિયા પેલેસ હોટલમાં પકડાયેલા દેહવ્યાપારના ચકચારી કેસમાં નરોડા પોલીસે લાખો રૂપિયાનો તોડ કરીને સૌ પહેલાં નોંધેલી એફઆઈઆર ફાડી નાખીને કેટલાક ખાસ લોકોને બચાવી લીધા હોવાનું સામે આવતાં પોલીસબેડામાં ખળભળાટ મચી ગયો છે.

નાના ચિલોડા ખાતે આવેલા શિખર એવન્યૂમાં આવેલી પ્રિયા પેલેસ હોટલમાં નરોડા પોલીસે રેડ કરીને દેહવ્યાપારનો પર્દાફાશ કર્યો હતો તે જ સમયે આ જ બિલ્ડિંગમાં આવેલી ધ ગ્રાન્ટ વ્હાઇટ હોટલમાં પણ પોલીસે રેડ કરીને સેક્સ રેકેટ ઝડપી પાડ્યું હતું. પોલીસે પ્રિયા પેલેસ હોટલના માલિક અને મેનેજર વિરુદ્ધ ગુનો દાખલ કરીને પાંચ મહિલા અને ગ્રાહકોને ઝડપી પાડ્યાં હતાં, જોકે પોલીસ ફરિયાદમાં માત્ર ચાર રૂપલલના અને ચાર ગ્રાહકોનો ઉલ્લેખ થયો છે.   

નરોડા પોલીસે લાખોનો તોડ કરીને પહેલી FIR ફાડી નાખી?
પ્રિયા પેલેસ હોટલના ચકચારી કિસ્સામાં કંઈક અલગ જ રંધાયું છે, જેની પાછળ પોલીસનો મૂળ ઉદ્દેશ ખિસ્સું ગરમ કરવાનો હતો. નરોડા પોલીસની સર્વેલન્સ સ્ક્વોડના આઠ કોન્સ્ટેબલની ટીમ એકસાથે પ્રિયા પેલેસ હોટલ અને ધ ગ્રાન્ડ વ્હાઇટ હોટલમાં ત્રાટકી હતી. પ્રિયા પેલેસ હોટલમાં પોલીસને ત્રણ કપલ રૂમની અંદર મળી આવ્યાં હતાં, જ્યારે ધ ગ્રાન્ડ વ્હાઇટ હોટલમાં બે કપલ દારૂની મહેફિલ માણતાં બે રૂમમાંથી મળી આવ્યાં હતાં. પોલીસે બંને કપલ તેમજ ધ ગ્રાન્ડ વ્હાઇટ હોટલના મેનેજર સૌરભ ભદો‌િરયાની અટકાયત કરી હતી. પોલીસ બે મહિલા, બે ગ્રાહકો અને એક મેનેજરની અટકાયત કરીને પ્રિયા પેલેસ હોટલમાં લઈ આવી હતી. ત્યારબાદ પોલીસે પ્રિયા પેલેસ હોટલની રેસ્ટોરાં કે જે છઠ્ઠા માળે આવેલી છે તેમાં કામ કરી રહેલા મેનેજર પારસની અટકાયત કરી હતી. પોલીસ પાંચ મહિલા, પાંચ ગ્રાહકો અને બે મેનેજર થઈને કુલ ૧ર લોકોની અટકાયત કરીને પોલીસ સ્ટેશન લાવી હતી, જ્યાં પોલીસે પોતાનું અસલ કામ શરૂ કર્યું હતું. નરોડા પોલીસે પહેલાં એક જ કેસ નોંધ્યો હતો, જેમાં બંને હોટલનો ઉલ્લેખ કર્યો હતો, જોકે તે પછી ‘સેટિંગ’ થઈ જતાં પોલીસે કેસની એફઆઈઆર ફાડી નાખી હતી. ત્યાર બાદ નવો કેસ નોંધ્યો હતો, જેમાં પ્રિયા પેલેસ હોટલના માલિક દોલત, મેનેજર સૌરભ, ચાર રૂપલલના, ચાર ગ્રાહકો વિરુદ્ધ ગુનો દાખલ કર્યો હતો.

કઈ રીતે તોડકાંડનો ભાંડો ફૂટ્યો
ઝડપાયેલા એક ગ્રાહક અને હોટલના ભાગેડુ માલિક દોલતે પોલીસ પર આક્ષેપ કર્યો છે કે પોલીસે તેમની પાસેથી લાખો રૂપિયાનો તોડ કર્યો છે. ગ્રાહકે જણાવ્યું છે કે તે ધ ગ્રાન્ડ વ્હાઈટ હોટલમાં એક યુવતી અને દારૂની બોટલ સાથે ઝડપાયો હતો, જેમાં પોલીસે તેમને છોડવા માટે ૬પ હજાર રૂપિયા લીધા હતા અને અમને કેસમાં સાક્ષી બનાવી દીધાં હતાં. આ સિવાય એક કપલ, જેમનો કેસમાં કોઈ ઉલ્લેખ નથી તેમની પાસેથી ૩૬ હજાર રૂપિયા લઈને છોડી મૂક્યાં હતાં. આ કપલે બેન્કના એટીએમમાંથી રૂપિયા ઉપાડીને આપ્યા હતા તો બીજી તરફ પારસ નામના મેનેજરનું નામ તેમજ ધ ગ્રાન્ડ વ્હાઈટનું નામ કમી કરવા માટે પોલીસે રૂ.૧.૨૦ લાખ લીધા હોવાનું ચર્ચાય છે. તોડકાંડના આ ચકચારી કિસ્સામાં સેક્ટર-૨ના જોઈન્ટ પોલીસ કમિશનર (જેસીપી) ગૌતમ પરમારે જણાવ્યું કે આ મામલે ડીસીપીને તપાસના આદેશ આપ્યા છે. 

ત્રણ ડીવીઆર જપ્ત કર્યાં, નહીં તો ભાંડો ફૂટી જાત
પોલીસે ત્રણ ડીવીઆર અને હોટલની એન્ટ્રી બુક જપ્ત કર્યાં હતાં, જેમાં તમામ ગ્રાહકો અને મહિલાઓની એન્ટ્રી કરવામાં આવી હતી. જો પોલીસ અધિકારી આ બે હોટલ પૈકી કોઇ એકનું ડીવીઆર પણ ચેક કરે તો ભાંડો ફૂટી જાય તેવી શક્યતા છે. ભાંડો ફૂટે નહીં તે માટે જ ત્રણ ડીવીઆર જપ્ત કરી લીધાં હતાં. નરોડા પીઆઇ પી.બી. ખાંભલાએ જણાવ્યું છે કે પોલીસે એક જ હોટલમાં રેડ કરી છે. 

હુક્કા અને દારૂ મળ્યો પણ કેસમાં ઉલ્લેખ જ નહિ
પોલીસને હોટલમાંથી હુક્કા તેમજ ફ્લેવર પણ મળી આવી હતી તેમજ ગ્રાહકો દારૂની પાર્ટી કરતાં પણ ઝડપાયા હતા, પરંતુ પોલીસે આ મામલે કોઇ ઉલ્લેખ ફરિયાદમાં કર્યો નથી અને કલમનો ઉમેરો કર્યો નથી

મહિલા પોલીસ વગર જ દોડી ગઈ પોલીસ
કોઈ પણ દેહવ્યાપારના કેસમાં પોલીસ રેડ કરવા માટે જાય ત્યારે એસીપી, પીઆઇ અને મહિલા પોલીસ પણ સાથે હોવા ફરજિયાત છે, પરંતુ આ કેસમાં ફક્ત આઠ કોન્સ્ટેબલ જ રેડ કરવા પહોંચી ગયા હતા. તેમની સાથે એક પણ મહિલા પોલીસ કર્મચારી ન હતી. મહિલા પોલીસ વગર જ મહિલાઓને પકડીને નરોડા પોલીસ સ્ટેશનમાં લાવવામાં 
આવી હતી. 

સીસીટીવી કેમેરામાં કેદ પોલીસનાં કરતૂતો
નરોડા પોલીસે બંને હોટલનાં ડીવીઆર લઈ લીધાં હતાં, જેથી તેમનાં કરતૂતો સામે આવે નહિ, પરંતુ પોલીસનાં કરતૂતો સામે આવી ગયાં છે, જ્યારે પોલીસે પાંચ કપલ અને બે મેનેજર થઈ કુલ ૧ર લોકોને પોલીસવાનમાં બેસાડ્યાં તે સીસીટીવી કેમેરામાં કેદ થઈ ગયું છે. મહિલા પોલીસ વગર તમામ ૧ર લોકોને પોલીસવાનમાં બેસાડવામાં આવી રહ્યા છે.