મ્યુનિસિપલ સ્કૂલબોર્ડ સંચાલિત શાળામાં વિદ્યાર્થીઓના અભ્યાસનું સ્તર દિન-પ્રતિદિન કથળી રહ્યું છે. સ્માર્ટ લર્નિંગના દાવા છતાં પણ બાળકોને યોગ્ય શિક્ષણ મળતું નથી, પરંતુ સત્તાવાળાઓની બેદરકારીથી મ્યુનિસિપલ શાળા સરસ્વતીનું ધામ બનવાના બદલે દારૂડિયાના અડ્ડામાં ફેરવાઇ ગયું હોવાની ચોંકાવનારી બાબત જાણવા મળી છે.
સરસપુરની ગુજરાતી શાળા નં.૬ અને ઉર્દૂ શાળા નં.૩માં તાજેતરમાં ઇંગ્લિશ દારૂની ૪૦ બોટલ અને ૧૬૯ દેશી દારૂની પોટલીઓ પકડાઇ હતી. આ મામલે શહેરકોટડા પોલીસ સ્ટેશનમાં ફરિયાદ નોંધાઇ છે.
આ ઉપરાંત વસ્ત્રાલની એક મ્યુનિસિપલ શાળામાંથી બે ગેસ સિલિન્ડર અને ઘઉં-ચોખા ચોરાયા હતા, જે અંગે પણ રામોલ પોલીસ સ્ટેશનમાં ફરિયાદ નોંધાઇ છે તેમ જણાવતાં મ્યુનિસિપલ કોંગ્રેસના કાર્યકારી નેતા તૌસિફખાન પઠાણ રોષભેર કહે છે કે શાળામાં સિક્યોરિટી અને પગીની વ્યવસ્થા હોવા છતાં પણ જો દારૂની બોટલો મળી આવે કે પછી ગેસ સિલિન્ડર તથા અનાજની ચોરી થાય તો સિક્યોરિટી એજન્સી શું કામ કરે છે? આ માટે એજન્સી સામે પગલાં લેવાં જોઇએ અને તેને તાકીદે સસ્પેન્ડ કરવી જોઇએ.
દરમિયાન મ્યુનિસિપલ કોંગ્રેસના પૂર્વ નેતા અને દરિયાપુરના કોર્પોરેટર સુરેન્દ્ર બક્ષીએ શહેરની સફાઇના કથળેલા સ્તર માટે સોલિડ વેસ્ટ મેનેેજમેન્ટ વિભાગના ભ્રષ્ટાચારને જવાબદાર ગણાવ્યો છે. સુરેન્દ્ર બક્ષી કહે છે કે જ્યારથી હેલ્થ વિભાગ અને સોલિડ વેસ્ટ મેનેજમેન્ટ વિભાગ અલગ થયા છે ત્યારથી સફાઇનું સ્તર નીચું ગયું છે. સોલિડ વેસ્ટ મેનેજમેન્ટ વિભાગમાં ભ્રષ્ટાચાર સિવાય કશું થતું ન હોઇ સફાઇનું સ્તર સાવ કથળ્યું છે.
સફાઇની ફરિયાદ કરીએ તો હેલ્થ અને સોલિડ વેસ્ટ મેનેજમેન્ટ વિભાગ એકબીજા પર ઢોળે છે એટલે અગાઉની જેમ આ વિભાગને એક કરવાની જરૂર છે. તેમણે કાંકરિયા રાઇડ દુર્ઘટનાકાંડમાં જવાબદાર સુપરસ્ટાર એમ્યુઝમેન્ટ પાર્કના સંચાલકને વસ્ત્રાપુર લેકમાં નવી રાઇડની મંજૂરી આપવા બદલ ભાજપના શાસકો પર પસ્તાળ પાડી હતી. શાસકોને પોતાના માનીતાને કોન્ટ્રાક્ટ આપવામાં જ રસ હોઇ આટલી મોટી દુર્ઘટના સામે ઇરાદાપૂર્વક આંખ આડા કાન કર્યા હોવાનો આક્ષેપ પણ તેમણે કર્યો હતો.