કોરોનાની આડમાં રોડના કામનો લક્ષ્યાંક નક્કી કરાયો નથીઃ મધ્ય ઝોનમાં સૌથી ઓછી કામગીરી તો પશ્ચિમ ઝોન પર તંત્ર ઓળઘોળઃ વોર્ડ સમિતિમાં મંજૂર થયેલા રોડની અગ્રિમતાને આધારે પેવર ચાલતાં નથી
પેચવર્કના બહાને કરોડો રૂપિયાનું આંધણ
રૂ. ૫૩૬.૦૪ કરોડનું પાંચ વર્ષની ગેરંટી ધરાવતું ટેન્ડર મંજૂર
મધ્ય ઝોનમાં સૌથી ઓછી ૧૦૯૬૩.૮૯ મેટ્રિક ટનની કામગીરી થઈ
શહેરમાં રોડનાં કામની ગાડી હવે અમુક અંશે પાટા પર ચડી છે. જોકે ગત વર્ષની જેમ આ વર્ષે પણ લોકોને સારા રોડની ગેરંટી તંત્ર આપી શકે તેમ નથી, કેમ કે કોન્ટ્રાક્ટર દ્વારા રાબેતા મુજબ વેઠ ઉતારાઈ રહી છે. બોપલ-આંબલી જેવા નવા વિસ્તારમાં તો ખાડા પૂરવામાં પણ લેવલિંગ જળવાતું ન હોઈ સત્તાવાળાઓની બેદરકારીથી રોડ પર ઊંચા ટેકરા બનીને વાહનચાલકોને ભયભીત કરી રહ્યા છે. મ્યુનિ. તંત્રની દૂરંદશીના અભાવે અગડમ્-બગડમ્ શૈલીથી બનતા રોડનો મુદ્દો ચૂંટણી સમયે ગાજી ઊઠે તેવી શક્યતા છે.
ગત વર્ષે નિર્ધારિત લક્ષ્યાંક કરતાં પણ એક-બે ઝોનમાં વધુ કામગીરી થઈ
આમ તો વર્ષ ૨૦૧૭ના રૂ. ૪૫૦ કરોડનાં રોડ કૌભાંડ બાદ થર્ડ પાર્ટી ઇન્સ્પેક્શન (ટીપીઆઇ)થી શહેરમાં હવે સ્ટેટ અને નેશનલ હાઈવે જેવા રોડ બનશે તેવો શાસકોએ દાવો કર્યો હતો, પરંતુ આજે પણ એકેય ઝોનમાં રોડના કામમાં આંખે ઊડીને વળગે તેવું સુંદર આયોજન દેખાતું નથી. થર્ડ પાર્ટી ઇન્સ્પેક્શનના દાવા વચ્ચે હજુય ગુણવત્તા જળવાતી નથી. ગત વર્ષ કરતાં આ વર્ષે રોડના કામમાં વિસંગતા વધુ છે. ગત વર્ષે નિર્ધારિત લક્ષ્યાંક કરતાં પણ એક-બે ઝોનમાં વધુ કામગીરી થઈ હતી, જ્યારે આ વખતે મ્યુનિ. ઈજનેર વિભાગ દ્વારા કોરોનાની આડમાં કોઈ લક્ષ્યાંક જ રખાયો નથી.
પેચવર્કના બહાને કરોડો રૂપિયાનું આંધણ
આ વર્ષે પહેલા વરસાદમાં જ ઠેર ઠેર રોડ બેસી જતા ૧૭૦૦૦થી વધુ ખાડા પડ્યા હતા. સમગ્ર અમદાવાદ ખાડા સિટીમાં ફેરવાઈ ગયું હતું, જેનાથી લોકોમાં રોષ ભભૂકી ઊઠતા ગાંધીનગરના આદેશથી ઈજનેર વિભાગના અધિકારીઓ ખાડા પૂરવા દોડતા થયા હતા. દર વર્ષે રૂ. ૩૦૦થી ૪૦૦ કરોડ રોડ રિસરફેસિંગ પાછળ ખર્ચાતા હોવા છતાં પણ ત્રણ વર્ષની ગેરંટીવાળા રોડ બને છે તેમાં પણ રોડ તૂટે તો કોન્ટ્રાક્ટરને પેનલ્ટી કરાતી નથી. ઉપરાંત પેચવર્કના બહાને કરોડો રૂપિયાનું આંધણ કરાય છે.
રૂ. ૫૩૬.૦૪ કરોડનું પાંચ વર્ષની ગેરંટી ધરાવતું ટેન્ડર મંજૂર
બીજી તરફ તંત્રના અંદાજ કરતાં રૂ. ૧૩૬ કરોડના વધારા સાથે રૂ. ૫૩૬.૦૪ કરોડનું પાંચ વર્ષની ગેરંટી ધરાવતું ટેન્ડર મંજૂર કરીને એક પ્રકારના કામમાં બે જુદી જુદી ગેરંટી રખાઈ છે. જોકે આ ટેન્ડર હેઠળ કેટલા રોડ બન્યા તેનો હિસાબ મળતો નથી.
મેટ્રો રૂટ પરના રોડ સુધર્યા નથી, પરંતુ તેમાં મેટ્રો રેલ તંત્ર અને મ્યુનિ. તંત્ર પૈકી કોઈ જવાબદારી સ્વીકારતા જ નથી. એકબીજા પર દોષારોપણને કારણે લોકોની હાલાકીનો અંત આવતો નથી. ૨૦૧૭નાં રોડ કૌભાંડથી શહેરમાં 'વિકાસ ગાંડો થયો'નાં સૂત્રથી વિધાનસભાની ચૂંટણીમાં શાસક ભાજપને નિર્ધારિત બેઠક જીતવામાં મુશ્કેલી પડી હતી. હવે મ્યુનિ. તંત્રની સામાન્ય ચૂંટણી ત્રણ મહિના પાછી ઠેલાઈને માર્ચના પહેલા અઠવાડિયામાં યોજાય તેવી શક્યતા વચ્ચે ૫૩ ટકા ઊંચા ભાવના સિંગલ ટેન્ડરને મંજૂરી આપ્યા બાદ પણ લોકોને થાગડ-થીગડવાળા રોડ મળી રહ્યા છે તે કડવી વાસ્તવિકતા છે, જોકે ભાજપના કેટલાક કોર્પોરેટરો બે મહિના અગાઉ પણ તંત્ર સામે નારાજગી દર્શાવી ચૂક્યા હતા. તેમ છતાં કોઈના પેટનું પાણી હાલતું નથી. છેલ્લાં ત્રણ વર્ષમાં ઓછામાં ઓછા રૂ. ૮૦૦ કરોડ થીગડાંવાળા રોડ બનાવવા પાછળ મ્યુનિ. તિજોરીમાંથી ખર્ચાઈ ચૂક્યા છે. તેમ છતાં અમદાવાદીઓને સારા રસ્તા મળતા નથી.
મધ્ય ઝોનમાં સૌથી ઓછી ૧૦૯૬૩.૮૯ મેટ્રિક ટનની કામગીરી થઈ
રોડમાં મેટ્રિક ટન આધારિત કામગીરીનો તંત્રનો ૧૬ ડિસેમ્બરનો રિપોર્ટ ભારે ચોંકાવનારો છે, જે મુજબ મધ્ય ઝોનમાં સૌથી ઓછી ૧૦૯૬૩.૮૯ મેટ્રિક ટનની કામગીરી થઈ છે, જ્યારે રાજકીય વગ ધરાવતા પશ્ચિમ ઝોનમાં સૌથી વધુ ૪૩૮૬૬.૬૩ મેટ્રિક ટનના રોડ બન્યા છે. ત્યાર બાદ ઉત્તર ઝોનમાં ૩૩૭૭૯.૮૭ મેટ્રિક ટન, પૂર્વ ઝોનમાં ૨૯૪૭૭.૩૬ મેટ્રિક ટન, દક્ષિણ-પશ્ચિમ ઝોનમાં ૧૯૦૯૧.૫૬ મેટ્રિટ ટન, ઉત્તર ઝોનમાં ૧૯૦૬૧.૦૨ મેટ્રિક ટન, દક્ષિણ ઝોનમાં ૧૭૭૭૩.૩૭ મેટ્રિક ટન અને રોડ પ્રોજેક્ટ હેઠળ ૬૨૧૬૯.૦૫ મેટ્રિક ટન રોડનું કામ થયું છે.
ગુણવત્તાના મામલે પોલંપોલ
શહેરમાં કુલ ૨,૩૬,૧૮૨.૭૫ મેટ્રિટ ટનનું કામ થયું હોવાનો તંત્રનો દાવો છે, પરંતુ વોર્ડ સમિતિમાં મંજૂર થયેલા રોડની અગ્રીમતાના આધારે ઈજનેર વિભાગે રોડની યાદી તૈયાર કરીને તે મુજબ કોન્ટ્રાક્ટર પાસેથી કામ લેવું જોઈએ તેના મુજબ કોન્ટ્રાક્ટરની મરજી મુજબ પેવર ચાલી રહ્યા છે તેવો બળાપો ભાજપની ભૂતપૂર્વ ચૂંટાયેલી પાંખનો પણ છે એટલે અમદાવાદીઓ માટે કરોડો રૂપિયાના ખર્ચે રોડ બની રહ્યા છે ખરા, પરંતુ તેમાં ગુણવત્તાના મામલે પોલંપોલ ચાલતું જ રહેશે.