અમદાવાદ / પ્રોપર્ટી ટેક્સ આવકમાં દિવાળી ધમાકા તિજોરીમાં ઠલવાયા આટલા કરોડ

• આર્થિક મંદીના માહોલમાં મ્યુનિ. તંત્ર પણ ભીંસમાં મુકાયું
• કોમર્શિયલ પ્રોપર્ટી ટેકસ ધારકો માટે પ્રોપર્ટી ટેક્સ બિલમાં ખાસ ર૦ ટકાનું ડિસ્કાઉન્ટ 
• નાણાકીય વર્ષમાં રૂ.૬૦૦ કરોડથી વધુની આવક તંત્રને થઇ 

રાજ્ય સરકાર દ્વારા ગત જૂનમાં આત્મનિર્ભર યોજના હેઠળ કોમર્શિયલ મિલકત ધારકોને પ્રોપર્ટી ટેક્સ બિલમાં ર૦ ટકાની છૂટ અપાઇ હતી. જૂન, જુલાઇ અને ઓગસ્ટ એમ સતત ત્રણ મહિના છૂટ અપાઇ છતાં મ્યુનિ. તંત્રને મંદીની ઝાળને કારણે પ્રોપર્ટી ટેક્સ આવકમાં ખાસ વધારો થયો ન હતો. તંત્રે પણ જૂન, જુલાઇ અને ઓગસ્ટ એમ સતત ત્રણ મહિના તમામ પ્રોપર્ટી ટેક્સ ધારકોને એડવાન્સ ટેકસ યોજના હેઠળ ૧૦ ટકાની છૂટ આપી હતી. આ ત્રણે મહિનામાં કુલ ૩૦ ટકાની છૂટ અપાઇ છતાં મ્યુનિ. તિજોરીમાં જૂનમાં રૂ.ર૩૯.૦૩ કરોડ, જુલાઇમાં રૂ.રર૬.૭૮ કરોડ અને ઓગસ્ટમાં રૂ.૭૧.૭૯ કરોડની જ આવક થઇ હતી. એટલે કે આ રિબેટ યોજના એકંદરે તંત્ર માટે ફલોપ શો પુરવાર થઇ હતી.

માંડ પ૦ ટકા લક્ષ્યાંક મેળવાયો

આત્મનિર્ભર યોજનાથી તંત્રનો રૂ.૮૦૦ કરોડની આવક મેળવવાનો લક્ષ્યાંક હતો. જોકે માંડ પ૦ ટકા લક્ષ્યાંક મેળવાયો હતો. ગત સપ્ટેમ્બર મહિનામાં મ્યુનિ. તિજોરીને માત્ર રૂ.૧૧.૩૯ કરોડ પ્રોપર્ટી ટેક્સ આવક પેટે મળ્યા હતા. ગત ઓકટોબરમાં પણ રૂ.૩૦.૧૧ કરોડની જ આવક થઇ હતી. જ્યારે વર્ષ ર૦૧૯-ર૦માં તંત્રને પ્રોપર્ટી ટેક્સ આવક પેટે સપ્ટેમ્બરમાં રૂ.૭૧.૪૧ કરોડ અને ઓકટોબરમાં રૂ.૪ર.૮૭ કરોડની ઉલ્લેખનીય આવક થઇ હતી.

ચાલુ નવેમ્બર મહિનાથી આવકમાં નોંધપાત્ર વધારો 

જોકે ચાલુ નવેમ્બર મહિનાથી આવકમાં નોંધપાત્ર વધારો થઇ રહ્યો છે. અત્યારે દ‌િક્ષણ ઝોન સિવાય શહેરભરમાં પ્રોપર્ટી ટેક્સ બિલનું વિતરણ ચાલી રહ્યું છે. જેના કારણે આવકમાં વૃદ્ધિ થઇ રહી છે. ગત તા.૧થી ૭ નવેમ્બર સુધીમાં રૂ.૧૮.૯૦ કરોડની આવક થતાં ચાલુ નાણાકીય વર્ષ ર૦ર૦-ર૧માં કુલ રૂ.૬૦૧.૧ર કરોડની આવક થઇ છે.

પશ્ચિમ ઝોનમાં દર વર્ષની જેમ આ વર્ષે પણ સૌથી વધુ રૂ.ર૦૯.૮૪ કરોડની આવક થઇ

શહેરના સાત ઝોન પૈકી પશ્ચિમ ઝોનમાં દર વર્ષની જેમ આ વર્ષે પણ સૌથી વધુ રૂ.ર૦૯.૮૪ કરોડની આવક થઇ છે. જ્યારે દ‌િક્ષણ ઝોનમાં સૌથી ઓછી રૂ.૪૦.૧૧ કરોડની આવક નોંધાઇ છે. તંત્રે ઉત્તર ઝોનમાં રૂ.૪ર.૮૦ કરોડ, પૂર્વ ઝોનમાં રૂ.૮પ.૯૬ કરોડ, ઉત્તર-પશ્ચિમ ઝોનમાં રૂ.૧૩ર.રર કરોડ અને દ‌િક્ષણ ઝોનમાં રૂ.૧૦પ.૦૭ કરોડની આવક 
મેળવી છે.

આવકનો આંકડો રૂ.૬૦૦ કરોડને પાર પહોંચી જતાં ખુશીની લહેર

હાલ તો પ્રોપર્ટી ટેક્સ વિભાગમાં આવકનો આંકડો રૂ.૬૦૦ કરોડને પાર પહોંચી જતાં ખુશીની લહેર ફરી વળી છે. નાગરિકો પણ કોરોનાના ખોફમાંથી ધીમે ધીમે બહાર આવી રહ્યા હોઇ ચાલુુ નાણાકીય વર્ષના અંત સુધીમાં કુલ આવક રૂ.૧,૦૦૦ કરોડ થાય તેવી પૂરેપૂરી શકયતા છે. જે કોરોના કાળને જોતાં મ્યુનિ. સત્તાધીશોને ચોક્કસ રાહત અપાવશે.