કોરોના સંકટ / ભીડને અટકાવવા AMCનો 'બાઉન્સર' પ્લાન! અમદાવાદની શાકમાર્કેટોમાં ગોઠવ્યા ગાર્ડ-પોલીસ, કરશે આ કામ

• અમદાવાદમાં કોરોના વિસ્ફોટ થતા AMCનો પ્લાન
• અમદાવાદની બજારમાં સૂચના બોર્ડ સાથે બાઉન્સરોને તૈનાત
• માસ્ક વગર દેખાય તેઓને માસ્ક પહેરવામાં આવે છે અને દંડ પણ ઉઘરાવે છે

અમદાવાદમાં કોરોનાના કેસોમાં વિસ્ફોટક વધારો નોંધાતા તંત્ર ઉંઘમાંથી જાગ્યું. બે દિવસના કર્ફ્યુ બાદ રાત્રીનું કર્ફ્યુ લગાવવામાં આવ્યું. પરંતુ કર્ફ્યુ હટાવી દેતા લોકોની ભીડ બજારોમાં એકઠી થવા લાગી. સોશિયલ ડિસ્ટન્સ અને માસ્ક વગર લોકો ખરીદી કરવા પહોંચી જતા ફરી એક વખત કોરોનાનું સંક્રમણ વધવાની સ્થિતિનું નિર્માણ થયું. કાલુપુર શાકમાર્કેટ હોય કે જમાલપુર બજારમાં મોટી સંખ્યામાં લોકોની ભીડ જોવા મળતી હતી. જેથી તંત્રને બાઉન્સરનો સહારો લેવો પડ્યો છે. કાલુપુર શાકભાજી બજારમાં બાઉન્સરો ટેમ્પરેચર ગન સાથે ઉભા કરવામાં આવ્યા છે. જે લોકોનું ટેમ્પરેચર માપ્યા બાદ જ બજારમાં પ્રવેશ આપે છે.

અમદાવાદ મહાનગરપાલિકાએ કાલુપુર બજારમાં સૂચના બોર્ડ સાથે બાઉન્સરોને તૈનાત કર્યા છે. જે વેપારીઓ કે ગ્રાહકોનું ટેમ્પરેચર સતત માપીને અંદર પ્રવેશ આપે છે. જો કોઈનું ટેમ્પરેચર 100થી વધારે આવે તો તેઓને પ્રવેશ આપવામાં આવતો નથી. આ ઉપરાંત પોલીસનું પણ સતત ફૂટ પેટ્રોલીંગ હોય છે. જે બજારમાં સોશિયલ ડિસ્ટન્સ અને માસ્ક ફરજીયાત પહેરવાનું સૂચન કરતી હોય છે. જે વ્યક્તિ માસ્ક વગર દેખાય તેઓને માસ્ક પહેરવામાં આવે છે અને દંડ પણ ઉઘરાવે છે.

કોરોના ની મહામારી નો માર સૌથી વધુ વેપારીઓને પડ્યો છે. લોકોની સલામતી માટે તંત્રએ લીધેલા કર્ફ્યુ અને લૉકડાઉનના નિર્ણયને વેપારીઓ સ્વીકારી તો રહ્યા છે. પરંતુ આર્થિક નુકસાનથી તેમનો ધંધો ખતમ થઈ ગયો છે. જ્યારે ગ્રાહકો પણ કોરોનાની દહેશત વચ્ચે પરિવારનું ગુજરાન ચલાવવા ખરીદી કરવા આવી રહ્યા હોવાનું જણાવી રહ્યા છે. પણ બજારોમાં થતી ભીડ હજુ પણ કોરોનાના કેસોમાં વધારો કરી શકે છે.

દિવાળીના તહેવાર લોકો અને પેટાચૂંટણીમાં નેતાઓની બેદરકારીથી કોરોનાનો કહેર ફરી વર્ષયો છે. ત્યારે હવે AMC તંત્ર બાઉન્સર અને પોલીસના તાલમેલથી લોકો પર નિયંત્રણ લાવીને કોરોનાને અટકાવવાના પ્રયાસમાં લાગ્યું છે.