કાળઝાળ ગરમીને લઇને અમદાવાદ મ્યુનિસિપલ કોર્પોરેશન આવ્યું એક્શનમાં, આકરી ગરમીમાં નાગરિકોના રક્ષણ માટે AMCએ તૈયાર કર્યો હિટ એક્શન પ્લાન.
AMCનો હિટ એક્શન પ્લાન તૈયાર
બસ ડેપો પર પીવાના પાણીની વ્યવસ્થા
ORSની વ્યવસ્થા માટે પણ સૂચન
રાજ્યના હવામાન વિભાગે આ વખતનો ઉનાળો આકરા રહેવાનું અનુમાન કર્યુ છે. જો કે અમદાવાદ મહાનગરપાલિકા (AMC)એ આ વખતે થોડી વહેલી જાગી છે અને હિટ એક્શન પ્લાન તૈયાર કર્યો છે. અમદાવાદ મ્યુનિસિપલ કોર્પોરેશન (AMC) દ્વારા ઉનાળાની ગરમીને ધ્યાનમાં રાખીને એક્શન પ્લાન તાત્કાલિક અસરથી તૈયાર કરાયો છે અને શહેરીજનોને ગરમીમાંથી રાહત મળે તેવી વ્યવસ્થા ઉભી કરી છે.
બગીચા બપોરના સમયે ખુલ્લા રાખવાનો નિર્ણય
ઉનાળામાં શહેરના તમામ બગીચાઓ બપોરના સમયે જાહેર જનતા માટે ખુલ્લા રહેશે. તમામ BRTS બસ સ્ટેન્ડ અને AMTS બસ ડેપો પર પીવાના પાણીની વ્યવસ્થા કરાવામાં આવશે. તમામ બસ સ્ટેશન પર ORSની વ્યવસ્થા માટે પણ સૂચના આપવામાં આવી છે. હિટ સ્ટ્રોકના જે કેસો નોંધાતા હોય છે તેની કોઈ માહિતી ઉપલબ્ધ હોતી નથી. જેથી તેના માટે થઈને IHIP મારફતે તેનું રજિસ્ટ્રેશન કરવાનું રહેશે. આ માટે દરેક વોર્ડમાં એક અલગ વોર્ડ પણ ઉભો કરાશે.
કન્સ્ટ્રકશન સાઇટ પર પાણીની વ્યવસ્થા કરવા સૂચના
આ સાથે જ AMC દ્વારા શહેરના તમામ બિલ્ડરોને તેમના કન્સ્ટ્રક્શન સાઇટના વર્કર માટે પીવાના પાણીની વ્યવસ્થા માટે સૂચના આપી દેવામાં આવી છે. ટ્રાફિક વિભાગ સાથે સંકલન કરી તેમના કર્મચારીઓ માટે ઓ.આર.એસ પેકેટની વ્યવસ્થા કરવામાં આવશે.
આરોગ્ય વિભાગ એલર્ટ
રાજ્યમાં ઉનાળાની શરૂઆત થઈ ગઈ છે. જેના કારણે અમદાવાદ મ્યુનિસિલપ કોર્પોરેશનનું આરોગ્ય વિભાગ એલર્ટ થઈ ગયું છે. કોર્પોરેશનની આરોગ્ય વિભાગની ટીમો શહેરમાં શેરડીના રસ, શિકંજીની લારીઓ પર જઈને તપાસ કરશે. હેલ્થ એન્ડ સોલિડ વેસ્ટ મેનેજમેન્ટ કમિટીના ડેપ્યુટી ચેરમેન પ્રકાશ ગુર્જરે જણાવ્યું હતું કે, ઉનાળાની શરૂઆત થતાની સાથે જ શહેરમાં ઠેર ઠેર શિકંજી, લીંબુ શરબત, શેરડીનો રસ, ફ્રુટના તંબુ, છાશ-લસ્સી વગેરેનું વેચાણ વધતું હોય છે અને ઠેર ઠેર લારીઓ-દુકાનો શરૂ થઈ જતી હોય છે. જેથી આવી જગ્યાઓએથી પાણી સહિતના સેમ્પલો લેવા માટે અધિકારીઓને સૂચના આપી છે. સાથે જ બરફની ફેક્ટરીઓમાંથી પાણીના સેમ્પલો લેવામાં આવશે.
શું છે હિટ સ્ટ્રોક
હિટ સ્ટ્રોક અથવા સન સ્ટ્રોકને તમે સામાન્ય ભાષામાં 'લૂ લાગવી' કહી શકો છો. આવું ત્યારે થાય છે જ્યારે તમારૂ શરીર પોતાના તાપમાનને કંટ્રોલ ન કરી શકે. હિટ-સ્ટ્રોક થવા પર શરીરનું તાપમાન ઝડપથી વધી જાય છે અને ઓછુ નથી થઈ શકતું. જ્યારે કોઈને લૂ લાગે છે તો શરીરનું સ્વેટિંગ મેકેનિઝમ એટલે કે પરસેવાનું તંત્ર પણ ફેલ થઈ જાય છે અને મનુષ્યને બિલકુલ પરસેવો નથી આવતો. હિટ-સ્ટ્રોકની ઝપેટમાં આવવા પર 10થી 15 મિનિટની અંદર શરીરનું તાપમાન 106°F અથવા તેનાથી વધારે થઈ શકે છે. સમય પહેલા તેની સારવાર ન કરવામાં આવે તો મનુષ્યનું મોત અથવા ઓર્ગેન ફેલ પણ થઈ શકે છે.
હિટ સ્ટ્રોકના લક્ષણ
માથામાં દુખાવો
ડિમેંશિયા
ખૂબ વધારે તાવ આવવો
બેભાન થઈ જવું
માનસિક સ્થિતિ બગડી જવી
ઉલ્ટી, ચક્કર
ત્વચા લાલ થવી
હાર્ટ રેટ વધી જવી
ત્વચા ડ્રાય થઈ જવી
હિટ-સ્ટ્રોકથી રાહત મેળવવાના ઉપાય
જો કોઈને લૂ લાગે છે અને તેની સમય પર સારવાર ન કરવામાં આવે તો અમુક ગંભીર સમસ્યાઓ થઈ શકે છે. જેમાં આર્ગેન ફેલ, મોત, બ્રેઈન ડેડ પણ શામેલ છે. જો કોઈને લૂ લાગે છે તો તરત નીચે જણાવેલી પ્રાથમિક રીતો અપનાવી શકે છે.
જે વ્યક્તિને લૂ લાગે છે તેને તાપમાં ન રાખો
જાડા કપડાની જગ્યા પર એકદમ પાતળા કપડા પહેરો અને શરીરને હવા સ્પર્શવા દો
શરીરને ઠંડક પહોંચાડવા માટે કુલર કે પંખામાં બેસો
ઠંડા પાણીથી નહાવો
શરીરને ઠંડા પાણીના કપડાથી લુછો
માથા પર આઈસ પેક અથવા કપડાને ઠંડા પાણીથી પલાળીને મુકો
ઠંડા પાણીમાં પલાળેલા ટાવેલને માથા, ગળા, બગલ અને કમર પર મુકો
જો આ પ્રાથમિક ઉપાય બાદ પણ રાહત ન મળે તો તરત ડોક્ટરનો સંપર્ક કરો.