અમદાવાદમાં AMC દ્વારા ચા ના પેપર કપ બંધ કરાતા કેટલાક વેપારીઓનો વિરોધ તો કેટલાક વેપારીએ શોધી નવી તરકીબ, શહેરમાં માટીના કુલ્લડ અને વેફર કપ હવે પેપર કપના બન્યા વિકલ્પ.
અમદાવાદમાં હવે ચાની કિટલી પર પેપર કપમાં નહીં મળે ચા
AMCના નિર્ણય સામે કેટલાક વેપારીઓનો વિરોધ તો કેટલાકે આપ્યું સમર્થન
માટીના કુલ્લડ અને વેફર કપ હવે પેપર કપના વિકલ્પ બન્યા
અમદાવાદ મ્યુનિસિપલ કોર્પોરેશન દ્વારા આગામી 20મી જાન્યુઆરીથી પેપર કપ પર પ્રતિબંધ મૂકવામાં આવ્યો છે. AMCના અધિકારીઓએ વેપારીઓને સમજાવવા માટે હાલ એક અભિયાન શરૂ કર્યું છે. જેમાં વેપારીઓને પેપર કપનો ઉપયોગ ન કરવાની સૂચના આપવામાં આવી રહી છે. તો 20મી જાન્યુઆરી બાદ કિટલીઓ પર પેપર કપ મળશે તો દંડ ફટકારવામાં આવશે અને સીલની કાર્યવાહી પણ હાથ ધરવામાં આવશે.
ચા પીધા પછી કપને ખાઈ જાવ
AMCના નિર્ણય સામે કેટલાક વેપારીઓ વિરોધ કરી રહ્યા છે તો કેટલાક વેપારીઓ નવી તરકીબ શોધીને લાવ્યા છે. શહેરના પૂર્વે આસ્ટોડિયા દરવાજા પાસે આવેલા એક ટી સ્ટોલ પર વેફરના કપમાં ચા આપવાનું શરૂ કરાયું છે. લોકો વિવિધ ફ્લેવર્ડના વેફર કપમાં ચા પીને તેને ખાઈ પણ શકશે. જોકે, વેફર કપમાં ચા આપવાનું શરૂ કરાતા ચાનો ભાવ પણ વધી ગયો છે.
અડધી ચાના રૂ.4 વધુ ચૂકવવા પડશે
અડધી ચાનો ભાવ રૂ.10થી 12 હતો, ત્યારે વેફર કપ સાથે તેનો ભાવ રૂ.14થી 16 થઈ ગયા છે. ટી-સ્ટોલના માલિકનું કહેવું છે કે, ચાની કિંમત તો એટલી જ છે, પરંતુ વેફર કપના ભાવ તેમા ઉમેરાયા છે. આ ઉપરાંત કેટલીક જગ્યા હવે માટીના કુલ્લડમાં ચા આપવામાં આવી રહી છે. કુલ્લડમાં અપાતી ચા માટે રૂ.15 વસુલવામાં આવી રહ્યા છે.
ત્રણ ફ્લેવરમાં આવે છે કપઃ ટી-સ્ટોલના માલિક
ટી-સ્ટોલના માલિકનું કહેવું છે કે, અમને ખબર પડી કે ચાના પેપર કપ બંધ થવાના છે, ત્યારે મારા પિતાને મેં કહ્યું કે માર્કેટમાં વેફર કપ મળી રહ્યા છે, આપડે આ વેફર કપ ટ્રાય કરી. જેથી અમે વેફર કપનો ઉપયોગ શરૂ કર્યા. અહીં સ્ટોલ પર ચા પીવા માટે આવતા લોકોને અમે કપ-રકાબીમાં અમે ચા આપીએ છીએ. વેફર કપમાં ત્રણ પ્રકારની ફ્લેવર આવે છે ચોકલેટ, વેનીલા અને ઈલાયચી. અત્યારે અમે ચોકલેટ કપ ચાલુ કર્યા છે. જે બાદ ખાલી કપને ફેંકવાની ચિંતા જ દૂર થઈ ગઈ છે.
પેપર કપ પર પ્રતિબંધ લગાવી દીધો
અત્રે ઉલ્લેખનીય છે કે, અમદાવાદ મ્યુનિસિપલ કોર્પોરેશને ચા માટે વપરાતા પેપર કપ પર પ્રતિબંધ લગાવી દીધો છે. મ્યુનિસિપલ કોર્પોરેશનનું કહેવું છે કે, પેપર કપમાં અંદર લગાવાતું પડ આરોગ્ય માટે જોખમી છે. સાથે જ કીટલી પર ચા માટે વપરાતા પેપર કપથી કચરો ફેલાય છે. જે સ્થળો પર કરચો વધારો ઉત્પન્ન થતો હોય તેવા સ્થળોનો સર્વે કોર્પોરેશન દ્વારા કરાયો હતો. જેમાં કચરાનું વધુ સર્જન ચાના પેપર કપના કારણે થતું હોવાનું જાણવા મળ્યું હતું.