મહામારી / અમદાવાદીઓ સાવધાન, દિવાળીમાં ફટાકડા ફોડવાને લઇને તંત્રએ લીધો આ મહત્વનો નિર્ણય

• કોરોના સંકટ વચ્ચે આવી દિવાળી
• જાહેર રસ્તા કે જાહેર સ્થળ પર ફટાકડાની રમઝટ બોલાવવા પર પ્રતિબંધ મુકાઇ શકે 
• કોરોનાની ગાઇડલાઇન સાથે ફોડાશે ફટાકડા 

આમ તો સુપ્રીમ કોર્ટની ગાઇડલાઇન મુજબ રાતના ૧૦-૦૦ વાગ્યા બાદ વાયુ પ્રદૂષણને રોકવા ફટાકડા ફોડવા પર પ્રતિબંધ મુકાયો છે, પરંતુ કોરોનાનું સંક્રમણ ફેલાતું અટકાવવા સત્તાવાળાઓ કોવિડ-૧૯ની ગાઇડલાઇન મુજબ ફટાકડા ફોડવા પર હળવા પ્રતિબંધ લાદશે. રાજ્ય સરકાર દ્વારા નવરાત્રિ દરમિયાન શ્રદ્ધાળુઓને અમુક પ્રકારની છૂટછાટ અપાઇ હતી તે રીતે દિવાળીમાં ફટાકડા ફોડવાના મામલે પરવાનગી આપતી વખતે જાહેર રસ્તા, જાહેર સ્થળ પર પ્રતિબંધ લગાવાય તેવી ચર્ચા છે.

શહેરમાં સત્તાવાળાઓ પણ રાજ્ય સરકારની ગાઇડલાઇન મુજબ અનુસરશે 

શહેરમાં સત્તાવાળાઓ પણ રાજ્ય સરકારની ગાઇડલાઇન મુજબ અનુસરશે અને અમદાવાદીઓને ફટાકડા ફોડતા રોકશે નહીં, તેમાં પણ મ્યુનિ. સત્તાવાળાઓ ફટાકડાનો ધુમાડો લોકોનાં ફેફસાં પર અસર કરતો હોઇ સંયમથી દિવાળી મનાવવા અપીલ કરે તેવી શક્યતા છે.. દિવાળીએ ‌દીપ પ્રજ્વલિત કરી તેમજ સગાંસંબંધી-મિત્રોના ઓછામાં ઓછા ઘરે નવા વર્ષની શુભકામના પાઠવવા જઇ સોશિયલ ડિસ્ટન્સિંગ જાળવવા પર મ્યુનિ. તંત્ર ખાસ ભાર મૂકશે. ગ્રીન ફટાકડા ફોડવા માટે પણ લોકોને અપીલ કરશે. ગ્રીન ફટાકડા ફોડવાથી પ્રદૂષણની માત્રામાં ૩૦થી ૩પ ટકા ઘટાડો થતો હોવાનો દાવો છે, પરંતુ અાવા ફટાકડા બજારમાં સરળતાથી મળતા નથી.

દિલ્હી, હરિયાણા જેવાં રાજ્યમાં પ્રદૂષણ વધ્યું 

દિલ્હી, હરિયાણા જેવાં રાજ્યમાં પ્રદૂષણના કારણે નેશનલ ગ્રીન ટ્રિબ્યૂનલ દ્વારા તા.૭થી ૩૦ નવેમ્બર સુધી ફટાકડા ફોડવા પર પ્રતિબંધ મૂકવા અંગે વિચારણા ચાલી રહી છે. રાજસ્થાનમાં તો ફટાકડા પર પ્રતિબંધ મુકાઇ ગયો છે, જોકે ગુજરાતમાં પ્રતિબંધની શક્યતા ન હોવા છતાં ફટાકડાના ધુમાડાથી કોરોનાનું સંક્રમણ ફેલાતું રોકવા શહેરના પાલડી, વાસણા જેવા જૈન સંપ્રદાયની બહોળી વસ્તી ધરાવતા વિસ્તારમાં બાળકો ફટાકડા ફોડવાનો ઓછામાં ઓછો આનંદ માણે તેવો માહોલ સ્વયંભૂ સર્જાયો છે. અમુક તો આ બાબતને જીવદયા સાથે પણ સાંકળી રહ્યા છે.

માઇક્રો કન્ટેન્મેન્ટ હેઠળ હશે ત્યાં ફટાકડા ફોડવા પર પ્રતિબંધ

મ્યુનિ. તંત્ર દ્વારા કોરોનાના સંક્રમણના પગલે રોજેરોજ જે તે વિસ્તારના કોરોનાના કેસની સમીક્ષા કરીને નવા માઇક્રો કન્ટેન્મેન્ટ એરિયા જાહેર કરાય છે અથવા તો દૂર કરાઇ રહ્યા છે એટલે દિવાળીના તહેવારોમાં જે વિસ્તાર માઇક્રો કન્ટેન્મેન્ટ હેઠળ હશે ત્યાં ફટાકડા ફોડવા પર પ્રતિબંધ મુકાશે. આને લઇ મ્યુનિ. વર્તુળોમાં એવી રમૂજ થઇ રહી છે કે જો માઇક્રો કન્ટેન્મેન્ટ એરિયામાં લોકો લવિંગિયા પણ ફોડશે તો તંત્ર ત્યાં જઇને સૂતળી બોમ્બ ફોડી આવશે!

બાળકોને ફટાકડાની ઝાળ લાગવાની શક્યતા વધારે

બાળકો ફટાકડા ફોડવા માટે ખૂબ ઉત્સાહિત હોય છે. કેટલાંક તો જોખમી રીતે ફટાકડા ફોડીને દાઝી જાય છે તેેવા સમયે વાલીઓના જીવ સતત ઉચાટમાં રહે છે, પરંતુ આ વખતે વાલીઓનો ઉચાટ વધી જશે, કેમ કે કોરાના મહામારીના કારણે સે‌િનટાઇઝ કરંાયેલા હાથથી ફટાકડા ફોડતી વખતે બાળકોને ફટાકડાની ઝાળ લાગવાની શક્યતા વધારે રહે છે. સે‌િનટાઇઝરમાં આલ્કોહોલ હોય છે અને આલ્કોહોલ તરત આગ પકડી લેતો હોઇ આ બાબત વાલીઓની ચિંતામાં વધારો કરશે. ફડાકડા ખરીદતી વખતે પણ સાવધાની રાખવી પડશે.

બીજી તરફ મ્યુનિ. પ્લોટમાં પરંપરાગત રીતે ફટાકડાના વેચાણ માટે બજાર ભરાતાં હોય છે, પરંતુ હજુ સુધી સત્તાવાળાઓએ આવા એક પણ  ફટાકડા બજારને પરવાનગી આપી નથી એટલે આ દિવાળીમાં ફટાકડા તો ફૂટશે, પરંતુ કોરોનાની ગાઇડલાઇન અને કોરોનાની દહેશત વચ્ચે ફૂટશે.