મ્યુનિસિપલ કોર્પોરેશનના સત્તાવાળાઓ દ્વારા શહેરમાં ગેરકાયદે બાંધકામ અને બિલ્ડિંગ સામે છેલ્લા કેટલાક દિવસોથી ઓપરેશન ડિમોલિશન હાથ ધરાયું છે. અમદાવાદમાં ગેરકાયદે બાંધકામના રાફડેરાફડા ફાટી નીકળ્યા હોઇ નવેસરથી ઇમ્પેક્ટ ફીનો કાયદો અમલમાં મૂકવો પડે તેવી વિકટ સ્થિતિ સર્જાઇ છે અને તેમાં પણ કોરોના મહામારીના કારણે સમગ્ર તંત્ર તેની સામેની લડાઇમાં વ્યસ્ત રહેતાં ગેરકાયદે બાંધકામ કરનારાં તત્ત્વોને ફાવતું જડ્યું હતું. ગેરકાયદે બાંધકામને પાસે રહીને ઉત્તેજન આપનારાં તત્ત્વોનો પણ તોટો નથી. આવા વિષમ સંજોગોમાં ઓપરેશન ડિમોલિશન હરહંમેશ આવકાર્ય હોવા છતાં આ વખતે જાણે કે સુનિશ્ચિત દિશા નક્કી નથી કરાઇ તેવી ચર્ચા ઊઠી છે.
વેજલપુરના ભાજપના કોર્પોરેટર દિલીપ બગરિયાએ તેમના વોર્ડની સત્યનારાયણ સોસાયટીના એક ગેરકાયદે બાંધકામને અટકાવવા માટેના સ્થાનિક એસ્ટેટ વિભાગના પ્રયાસને પડકાર ફેંક્યો હતો. ગત સપ્ટેમ્બર મહિનાના છેલ્લા અઠવાડિયામાં બનેલી આ ઘટનાનો વીડિયો પણ વાઇરલ થયો હતો. તેમણે જુહાપુરામાં ગેરકાયદે બાંધકામ કેમ તોડાતાં નથી તેવો તંત્ર પર આક્ષેપ પણ કર્યો હતો.
શાસક પક્ષના આ કોર્પોરેટરના આક્ષેપ બાદ મ્યુુનિ. તંત્રમાં રાજકીય વાતાવરણ ગરમાયું હતું. પરિણામે જુહાપુરાનાં ગેરકાયદે બાંધકામ પર હથોડા ઝીંકાયા હતા. ત્યારબાદ તો શહેરના સાતે-સાત ઝોનમાં સત્તાધીશોએ ઓપરેશન ડિમોલિશન હાથ ધર્યું છે. કોટ વિસ્તારનાં અમુક સ્થળોએ એસ્ટેટ વિભાગનો વિરોધ કરાઇ રહ્યો છે તેમ છતાં એકંદરે અમદાવાદીઓએ ગેરકાયદે બાંધકામ વિરુદ્ધની તંત્રની ઝુંબેશને મોકળા મને આવકારી છે.
જોકે અગાઉ મે-ર૦૧૯ના સમયગાળામાં સત્તાવાળાઓએ સુરતના તક્ષિશલા અગ્નિકાંડ બાદ ખાનગી સ્કૂલ, ટ્યૂશન કલાસીસ, હોસ્પિટલ વગેરે સ્થળોએ ફાયર સેફ્ટી માટે જોખમી એવાં ગેરકાયદે બાંધકામને હટાવવાની ‘સ્પેશિયલ ડ્રાઇવ’ હાથ ધરી હતી, જેના કારણે હોસ્પિટલ, સ્કૂલ અને ટ્યૂશન કલાસીસના સંચાલકોમાં ભારે ફફડાટ ફેલાઇ ગયો હતો.
બિલ્ડિંગની પાર્કિંગ સ્પેસને ખાલી કરાવવા, ટીપી રોડ ખોલવા માટેની ટ્રાફિક પોલીસ સાથેની મ્યુનિ. તંત્રની ‘મેગા ટ્રાફિક ડ્રાઈવ’ પણ લોકોમાં પ્રશંસનીય બની હતી. શહેરભરના વાહનચાલકો તેમનાં વાહનને રોડ પર આડાઅવળાં પાર્ક કરવા માટે ગભરાતા હતા. બે વર્ષ અગાઉ ‘મોડલ રોડ’ પરનાં ગેરકાયદે દબાણના ફાટી નીકળેલા રાફડાને દૂર કરવા હાથ ધરાયેલી તંત્રની ‘સ્પેશિયલ ડ્રાઇવ’ને પણ નાગરિકોએ વખાણી હતી.
આ વખતે ઓપરેશન ડિમોલિશન હેઠળ સત્તાવાળાઓએ ગઇ તા.ર૯ ઓક્ટોબરની સ્થિતિએ પ.પ૧ લાખ ચો.ફૂટથી વધુ ગેરકાયદે બાંધકામને હટાવ્યાં છે તેમજ ૬૬૦૦ મીટર લંબાઇના ટીપી રોડની જગ્યાને ખુલ્લી કરી હોઇ આગામી દિવસોમાં પણ ઓપરેશન ડિમોલિશન ઝુંબેશ સ્વરૂપે ચાલુ રહેનાર છે, જોકે ‘સ્પેશિયલ ડ્રાઇવ’ જોવા મળતી નથી.
ગત તા.ર૯ ઓક્ટોબરે સરખેજના મ્યુનિ. પ્લોટના ૭ર૬૩ ચો.ફૂટનાં ૧૬ ઝૂંપડાં દૂર કરીને કરોડો રૂપિયાના પ્લોટને ખુલ્લો કરવો કે ચાંદલોડિયાના શાયોના સર્કલ પાસેના ટીપી રોડ પરનાં કમ્પાઉન્ડ વોલ- ક્રોસ વોલ જેવાં દબાણ દૂર કરવાની કામગીરીથી પ્લોટ અને ટીપી રોડ દબાણમુક્ત તો થયાં, પરંતુ પ્લોટ ફરતે ફેન્સિંગ જો ન કરાય તો તે કાયમ દબાણમુક્ત રહેશે કે કેમ? તે મોટો પ્રશ્ન છે. તે જ રીતે ટીપી રોડના મામલે મોનિટરિંગ ન રખાય તો પુનઃ કમ્પાઉન્ડ વોલ જેવાં દબાણ થઇ શકે છે એટલે ફરી દબાણ થતાં રોકવા માટે નક્કર પ્લાનિંગ નજરે પડતું નથી તેવી પણ ચર્ચા ઊઠી છે.
બીજી તરફ તહેવારોનો રાજા ગણાતો દિવાળીનો તહેવાર હવે નજીક આવી પહોંચ્યો છે તો શું મ્યુનિ. તંત્ર રોડ પરના ટ્રાફિકના દબાણને હટાવવા મામલે સ્પેશિયલ ટ્રાફિક ડ્રાઇવ હાથ ધરવા ટ્રાફિક પોલીસ સાથે અગાઉની જેમ સંકલન કરશે તેવો પ્રશ્ન પણ ચર્ચાઇ રહ્યો છે.