મ્યુનિ. કોર્પોરેશના માલિકીના પ્લોટ કહો કે ટીપી રોડનાં દબાણનો પ્રશ્ન ગણો કે ભાડે અપાયેલ મિલકત કે પછી ગેરકાયદે બાંધકામના મામલે સેંકડો વાર કોર્ટના દરવાજા ખખડાવી અરજદારો સત્તાવાળાઓને ભીંસમાં મૂકે છે. આવા સંજોગોમાં કોર્ટમાંથી સ્ટે મેળવી તંત્રને કાયદાકીય પગલાં ભરતા પહેલા અરજદાર રોકી રાખે છે. અનેક કિસ્સામાં કોર્ટમાં તંત્ર વતી કેસ લડતા વકીલ ફૂટી જઇ અરજદારને સ્ટે મેળવવામાં આડકતરી રીતે મદદરૂપ થાય છે.
મનપાનો મોટો નિર્ણય
અત્યારે કોર્પોરેશન વતી વિવિધ કોર્ટમાં પ૯ વકીલ કેસ લડે છે.
વકીલની ફી પેટે છેલ્લાં છ વર્ષમાં રૂ.૧૩ કરોડથી વધુ ચૂકવાયા.
જેના કારણે જે તે કેસનો નિકાલ ટલ્લે ચડે છે. ઘણીવાર વકીલ કોર્ટમાં યોગ્ય પુરાવા સમયસર રજુ કરતા ન હોઇ તંત્રની વિરુદ્ધ ચુકાદા આવે છે. જોકે મ્યુનિ. શાસકોએ વચ્ચે રહી રહીને વર્ષોથી કેસ લડતા અને 'નકામા' પુરવાર થયેલ વકીલોને દૂર કરવાની દિશામાં ગંભીરતાથી વિચારણા હાથ ધરી છે.
વકીલની કામગીરી સામે મ્યુનિ. ભાજપમાં પણ ભારે અસંતોષ
તંત્ર દ્વારા સ્મોલ કોઝ, મેટ્રો પોલિટન કોર્ટ, હાઇકોર્ટ ઉપરાંત સુપ્રીમ કોર્ટ સુધી કેસ લડવા વકીલને જબ્બર ફી ચૂકવાય છે. વર્ષોથી વકીલની પેનલ યથાવત્ છે. જેના કારણે લાંબા સમયથી કેટલાક વકીલની કામગીરી સામે મ્યુનિ. ભાજપમાં પણ ભારે અસંતોષ ફેલાયો છે. મ્યુનિ. લિગલ કમિટીના ચેરપર્સન રેણુકાબહેન પટેલે આ અંગે પૂછતાં તેઓ કહે છે, કેટલાક વકીલની કામગીરી સંતોષકારક નથી. જે વકીલના લાંબા સમયથી કેસ ચાલતા હોય તેવા વકીલની યાદી તૈયાર કરાશે. આ યાદીના આધારે આવા વકીલને પેનલમાંથી બહાર કાઢી નવા વકીલ નીમાશે.
સુપ્રીમ કોર્ટ સિનિયર કાઉન્સિલમાં એક વકીલ મળી કુલ પ૯ વકીલની ફોજ
અત્યારે મ્યુનિ. તંત્ર વતી સિટી સિવિલ કોર્ટમાં છે, મેટ્રો પોલિટન કોર્ટમાં ત્રણ, ઇન્ડસ્ટ્રિયલ ટ્રિબ્યૂનલ તથા લેબર કોર્ટમાં એક, સ્મોલ કોઝમાં બે, સેશન્સ કોર્ટમાં ત્રણ, રેવન્યુ કોર્ટમાં મામલતદાર અને કૃષિ પંચમાં એક, કોલેજ માધ્યમિક શિક્ષણ ટ્રિબ્યૂનલમાં બે, ગુજરાત હાઇકોર્ટમાં સાત સિનિયર વધી અને હાઇકોર્ટ પેનલ વકીલમાં ર૯, સુપ્રીમ કોર્ટમાં સાત વકીલ અને સુપ્રીમ કોર્ટ સિનિયર કાઉન્સિલમાં એક વકીલ મળી કુલ પ૯ વકીલની ફોજ છે તેમ મ્યુનિ. કોંગ્રેસના પૂર્વ નેતા બદરુદીન શેખ જણાવે છે.
વકીલની ફી પેટે રૂ.૧૩.૦૬ કરોડ જેટલી રકમ ચૂકવાઇ
દરમ્યાન મ્યુનિ. તિજોરીમાંથી ગત વર્ષ ર૦૧૦ થી ગત ડિસે. ર૦૧૮-૧૯ સુધીમાં વકીલની ફી પેટે રૂ.૧૩.૦૬ કરોડ જેટલી રકમ ચૂકવાઇ છે. એડ્વોકેટ જનરલને તંત્ર દ્વારા ર૦૧૩-૧૪થી ર૦૧૮-૧૯ સુધીમાં રૂ.૩.૪૭ કરોડ ચુકવાયા છે. જેમાં પ્રશાંત દેસાઇને રૂ.૯૯.૩૮ લાખ, સુરેશ સેલતને રૂ.૧.૬૩ કરોડ અને કમલ ત્રિવેદીને રૂ.૮૩.૯૯ લાખની ફી ચૂકવાઇ છે.