વિશ્વના સૌથી મોટા ક્રિકેટ સ્ટેડિયમ મોટેરામાં આગામી 24 ફેબ્રુઆરીથી ભારત-ઇંગ્લેન્ડની ટેસ્ટ મેચ શરૂ થશે. આ મેચ જોવા જતા પહેલા વાહન પાર્ક કરવાની ટિકિટ પણ બુક કરાવી લેજો.
મોટેરા સ્ટેડિયમમાં 24 ફેબ્રુઆરીથી શરૂ થશે ભારત-ઇંગ્લેન્ડ વચ્ચે ક્રિકેટ મેચ
મેચની ટિકિટની સાથે વાહન પાર્કની પણ ટિકિટ ઓનલાઇન બુક કરાવવી પડશે
પાર્કિંગ પ્લોટ સિવાય કોઈ અન્ય જગ્યાએ વાહન પાર્ક કર્યું તો પોલીસ ટો કરશે
ભારત અને ઇંગ્લેન્ડ વચ્ચે યોજાનારી અને 5 T20 મેચના આયોજનને લઇને તૈયારીઓ પૂરજોશમાં ચાલી રહી છે. સરદાર પટેલ ગુજરાત સ્ટેડિયમ(મોટેરા-અમદાવાદ) 24 ફેબ્રુઆરીથી ભારત અને ઇંગ્લેન્ડ વચ્ચે ડે-નાઇટ ટેસ્ટ મેચ રવાશે. મેચ જોવા જનારા પ્રેક્ષકોએ મેચની જેમ વાહન પાર્ક કરવાની પણ ટિકિટ ઓનલાઇન એપથી બુક કરાવવી પડશે. તમેwww.showmyparking.com પર વાહન પાર્ક કરાવવા માટે ટિકિટ બુક કરાવી શકશો. જેમાં ટુ વ્હીલર માટે રૂ.30 જ્યારે કાર માટે રૂ.100 પાર્કિંગ ચાર્જ છે. પાર્કિંગ માટે સ્ટેડિયમની આસપાસ 27 પ્લોટ ફાળવાયા છે. જોકે ઓનલાઈન પાર્કિંગ બુક નહીં કરાવનારને પાર્કિંગ પ્લોટમાં વાહન પાર્ક નહીં કરવા દેવાઇ. જ્યાં ત્યાં વાહન પાર્ક કરનારનું વાહન પોલીસ ટો કરશે. મેચની ટિકિટ ગુજરાત ક્રિકેટ એસોસિયેશનની વેબસાઇટ www.gujaratcricketassociation.comપર બુક કરાવી શકશો.
ટ્રાફિક પોલીસના 1155 પોલીસ જવાન રહેશે તૈનાત
આગામી મેચને ધ્યાનમાં રાખીને સોમવારે મોટેરા સ્ટેડિમય ખાતે બેઠક યોજાઇ હતી. જેમાં પાર્કિંગ અને ટ્રાન્સપોર્ટેશન પર ભાર મૂકાયો હતો. મેચ દરમિયાન મોટેરા સ્ટેડિયમ પર, તમામ પાર્કિંગ પ્લોટની બહાર અને પાર્કિંગના સ્ટેડિયમ સુધીના રસ્તા પર ટ્રાફિક પોલીસના 1155 પોલીસ અધિકારી અને કર્મચારી તૈનાત રહેશે. ત્યારે આ મેચ જોવા માટે આવતા પ્રેક્ષકોએ પોતાનું વાહન પાર્ક પણ ઓનલાઇન એપથી બુક કરાવવું પડશે.
મેચની ટિકિટ 'બુક માય શો' એપ પર થઇ શકશે બુક
ઉલ્લેખનીય છે કે, ભારત વર્સીસ ઇંગ્લેન્ડ વચ્ચે યોજાનારી ડે નાઈટ ટેસ્ટ મેચ માટેની ટિકિટ હાલ ઓનલાઈન વેચાઈ રહી છે. જેમાં મેદાનની કુલ સીટીંગ કેપેસિટી મુજબ 50 ટકા પ્રેક્ષકોને પ્રવેશ આપવામાં આવશે. આ મેચની ટિકિટ 'બુક માય શો' એપના માધ્યમથી મળવાની શરૂ થઈ ગઈ છે. સાથે ટેસ્ટ મેચ રમાતી હશે તે સમયે જે તે દિવસની ટિકિટનું વેચાણ GCA(ગુજરાત ક્રિકેટ એસોસિયેશન) દ્વારા મોટેરા સ્ટેડિયમ ખાતેથી પણ કરાશે. ભારત અને ઇંગ્લેન્ડ વચ્ચે રમાનારી 5 T20 મેચની ટિકિટ 1 માર્ચથી મળશે. તમામ T20 મેચની ટિકિટ પણ ઓનલાઈન 'બુક માય શો' એપ પરથી જ ઉપલબ્ધ થશે. આ ટેસ્ટ મેચની એક ટિકિટનો ભાવ રૂ. 300થી લઈ 2500 સુધી નક્કી કરાયો છે. મેદાનમાં અલગ અલગ જગ્યા મુજબ 300, 400, 450, 500, 1000 અને 2500 રૂપિયામાં ટિકિટ ઓનલાઈન મળશે. મેદાનની ચારેતરફ સૌથી ઉપરના પેવેલિયનની ટિકિટ 300 રૂપિયા નક્કી કરાઈ છે.