અમદાવાદ: શહેરની સાબરમતી સેન્ટ્રલ જેલમાંથી મોબાઈલ ફોન અને સિમકાર્ડ મળી આવ્યાં હોવાનો એક કિસ્સો સામે આવ્યો છે. નવી જેલનાં કેદી પાસેથી મોબાઈલ અને સિમકાર્ડ મળી આવ્યાં છે. બેરેક નંબર 3માં રહેતાં આરોપી સુરેન્દ્ર ભદોરિયા પાસથી મોબાઈલ મળી આવતાં આ મામલે રાણીપ પોલીસ સ્ટેશનમાં ગુનો પણ નોંધાયો છે.
ત્યારે હવે આ મામલે રાણીપ પોલીસે વધુ કાર્યવાહી હાથ ધરી છે. મહત્વનું છે કે છેલ્લાં ઘણાં સમયથી જેલમાંથી મોબાઈલ મળતા રહે છે. મહત્વની બાબત તો એ છે કે 2018માં સાબરમતી જેલમાંથી મોબાઈલ મળી આવવાનો આ છઠ્ઠો કિસ્સો છે.
ઉલ્લેખનીય છે કે આ પહેલાં પણ સાબરમતી સેન્ટ્રલ જેલમાંથી મોબાઇલ અને સીમકાર્ડ મળી આવ્યાં હોવાની અનેક વાર ઘટનાઓ સામે આવી છે. ત્યારે ફરી વાર જેલમાંથી મોબાઇલ ફોન અને સિમકાર્ડ મળી આવતાં જેલનાં તંત્ર સામે કેટલાંક સવાલો ઊભા થાય છે કે આખરે જેલમાં પ્રતિબંધિત વિસ્તારમાં મોબાઇલ અને સિમકાર્ડ કોણે ઘૂસાડ્યાં. જો કે હવે આ મામલે રાણીપ પોલીસ સ્ટેશન વધુ તપાસ હાથ ધરી રહી છે.