અમદાવાદ / પહેલીવાર થલતેજ પહોંચી મેટ્રો ટ્રેન: ચૂંટણી પહેલા શરૂ કરી દેવાની તૈયારી, જાણો કેટલું કામ બાકી

• પ્રથમ વાર પ્રિ-ટેસ્ટિંગમાં અમદાવાદ મેટ્રો ટ્રેનને થલતેજ સુધી દોડાવાઈ
• અગાઉ શાહપુરથી સ્ટેડિયમ સુધી પ્રિ-ટેસ્ટિંગ કરાયું હતું
• ચૂંટણી પહેલાં અમદાવાદ મેટ્રોનો પહેલો ફેઝ શરૂ કરવા આયોજન

અમદાવાદ મેટ્રો ટ્રેન પ્રથમ વાર થલતેજ પહોંચી છે. પ્રિ-ટેસ્ટિંગમાં મેટ્રો ટ્રેનને થલતેજ સુધી દોડાવાઈ. અગાઉ શાહપુરથી સ્ટેડિયમ સુધી પ્રિ-ટેસ્ટિંગ કરાયું હતું. થલતેજ સુધી ટ્રેકનું કામ પૂર્ણ થતા ટેસ્ટિંગ કરાયું. હાલમાં મેટ્રો સ્ટેશન અને ટ્રેકમાં ફિનિશિંગનું કામ શરૂ છે. ચૂંટણી પહેલાં અમદાવાદ મેટ્રોનો પહેલો ફેઝ શરૂ કરવા તંત્રનું આયોજન છે. હાલમાં માત્ર વસ્ત્રાલ ગામથી એપરલ પાર્ક સુધીના 6 કિ.મી.રૂટમાં જ મેટ્રો ટ્રેન દોડે છે.

અમદાવાદમાં લાંબા સમયથી મેટ્રો રેલનું કામ ચાલી રહ્યું છે

જો કે, બીજી બાજુ તમને જણાવી દઇએ કે, અમદાવાદમાં લાંબા સમયથી મેટ્રો રેલનું કામ ચાલી રહ્યું છે. જેના કારણે શહેરના નાગરિકોને ટ્રાફિક, કિચડ, પીવાના પાણી સહિતની સમસ્યાઓનો સામનો કરવો પડે છે. કારણ કે અમદાવાદના થલતેજમાં એક અઠવાડિયાથી થલતેજ ગામ તરફ જતો રસ્તો બંધ કરી દેવાયો છે. ગટરની પાઈપ લાઇનો તૂટી જવાથી લોકોને માટી અને કેમિકલવાળું પાણી પીવાનો વારો આવ્યો છે. કેટલાંક દિવસો સુધી સોસાયટીમાં જવાનો રસ્તાઓ બંધ કરી દેવાતા રહીશો અને દુકાનદારોને પણ મુશ્કેલીનો સામનો કરવો પડી રહ્યો છે.

જુઓ અમદાવાદ-દિલ્હી મેટ્રો વચ્ચે શું છે તફાવત?

• દિલ્હી મેટ્રોમાં દર 2 સ્ટેશને પાર્કિંગ માટે સ્પેશિયલ પ્લોટ
• અમદાવાદના એક પણ મેટ્રો સ્ટેશને પાર્કિંગ નહીં
   
• દિલ્હીમાં ફીડર રૂટ પર મિનિબસની સુવિધા
• અમદાવાદમાં ફીડર માટે કોઈ રૂટ નક્કી નથી કરાયો
   
• દિલ્હીમાં રાજીવ ચોક જેવા મોટા સ્ટેશને વિશાળ પાર્કિંગ
• અમદાવાદમાં ગીચ વિસ્તારમાં મોટા સ્ટેશનો
   
• દિલ્હીમાં મેટ્રોની નીચે 15 મીટર પહોળા ડબલ રોડ
• અમદાવાદમાં મેટ્રોની નીચે 10 મીટરનો રોડ

કરોડો રૂપિયાના ખર્ચે મેટ્રો પરંતુ પાર્કિંગ વ્યવસ્થા જ ભૂલી ગયું તંત્ર

આ સાથે અમદાવાદમાં નિર્મિત મેટ્રોના એક પણ સ્ટેશને પાર્કિંગની સુવિધા આપવામાં આવી નથી. પાર્કિંગ મુદ્દે અમદાવાદ મ્યુનિસિપલ કોર્પોરેશન મેટ્રો રેલને જવાબદાર ઠેરવે છે, જ્યારે મેટ્રો રેલ કોર્પોરેશનને જવાબદાર ઠેરવે છે. આ પ્રોજેક્ટ પાછળ 10 હજાર કરોડનો ખર્ચ કરવામાં આવ્યો છે. આમ છતાં પાર્કિંગનું ધ્યાન રાખવામાં આવ્યું નથી. ઉલ્લેખનીય છે કે, અમદાવાદ મેટ્રો પ્રધાનમંત્રી મોદીનો ડ્રીમ પ્રોજેક્ટ છે અને ઓગસ્ટ 2022માં મેટ્રો શરૂ કરવાની તૈયારી ચાલી રહી છે, ત્યારે પાર્કિંગના અભાવે લોકોએ મેટ્રો સ્ટેશન સુધી પહોંચવા માટે બસ અથવા રીક્ષામાં જવું પડશે.