ભીડ / VIDEO: અમદાવાદીઓને મેટ્રો મોહી ગઈ, તહેવારોમાં મોટી સંખ્યામાં મુસાફરોની ભીડ, સ્ટેન્ડ પર લાંબી લાઈનો તો જુઓ

• દિવાળીને પગલે અમદાવાદ મેટ્રોમાં લોકોની ભારે ભીડ 
• દિવાળીના દિવસે મોટી સંખ્યામાં મુસાફરો કરી રહ્યા છે મેટ્રોની મુસાફરી
• દિવાળીનો તહેવાર ઉજવવાની અનેરી મજા આવી રહી છે : મુસાફરો

દેશભરમાં દિવાળીના પર્વને લઈ લોકોમાં અનોખો ઉત્સાહ જોવા મળી રહ્યો છે. ત્યારે આજે અમદાવાદીઓ પણ દિવાળીની ધામધૂમથી ઉજવણી કરતા જોવા મળ્યાહતા. લોકોએ મોટા પ્રમાણમાં મીઠાઇ-કપડાની ખરીદી કરી હતી. તો દિવાળીના દિવસે અમદાવાદ મેટ્રોમાં લોકોની ભારે ભીડ જોવા મળી હતી. મુસાફરી માટે મેટ્રો લોકોની  પ્રથમ પસંદગી બની હોવાથી તહેવારના દિવસમાં મેટ્રોમાં રીતસરની લોકોની પડાપડી જામી હતી. મેટ્રોની સવારી કરતા લોકોએ તહેવારોને લઈ ભારે ઉત્સાહ સાથે આહલાદક અનુભવનો આનંદ માણ્યો હતો.

મુસાફરોએ મેટ્રોને સસ્તામાં સારી મુસાફરી અને  વિકાસની પરિભાષા ગણાવી
અમદાવાદીઑએ મેટ્રોના પ્રારંભની સાથે જ મેટ્રોને અદભૂત પ્રેમ આપ્યો છે. જેમાં મુસાફરી કરી આ પ્રોજેક્ટને આવકર્યો છે. તેવામાં આજે દિવાળી નિમિતે લોકોએ પરીવહન માટે મેટ્રોની પસંદગી કરતાં સ્ટેશન પર લોકોની લાંબી કતારો જોવા મળી હતી. બીજી તરફ મુસાફરોમાં પણ ભારે ખુશીનો માહૉલ જોવા મળ્યો હતો. મુસાફરોના જણાવ્યા અનુસાર વિદેશમાં જે રીતે સફર કરતા હોય તેવો મેટ્રોની સવારીમાં અહેસાર થઇ રહ્યો છે. વધુમાં મુસાફરોએ મેટ્રોને સસ્તામાં સારી મુસાફરી અને  વિકાસની પરિભાષા ગણાવી હતી.

10 દિવસ અગાઉ બુકિંગ વિન્ડો અડધો કલાક બંધ રહેતા લાગી હતી કતારો
ઉલ્લેખનીય છે કે 10  દિવસ અગાઉ પણ મેટ્રોમાં મુસાફરોની ભારે ભીડ જામી હતી. જેને લઈને શહેરના અનેક સ્ટેશનો પર બુકિંગ સિસ્ટમ હેંગ થઇ ગઇ હતી. ભીડને કારણે વસ્ત્રાલ, ગુરૂકુલ મેટ્રો સ્ટેશનની બુકિંગ સિસ્ટમ અટકી પડી હતી. બુકિંગ વિન્ડો અડધો કલાક જેટલો સમય બંધ રહેતા મુસાફરોની કતારો લાગી હતી. રવિવાર હોવાથી મોટી સંખ્યામાં મેટ્રોની મજા માણવા શહેરીજનો પહોંચ્યા હતા. જેને લઇને ભીડના દ્રશ્યો સર્જાયા હતા.