ડેટિંગ માટે જાણીતી ટિન્ડર એપ પર ચેટિંગ કરીને તમે કોઇ યુવતી સાથે મિત્રતા રાખવાની ઇચ્છા રાખતા હો તો ચેતી જજો.કારણ કે ગમે ત્યારે તમે આ ટ્રેપમાં ફસાઈ શકો છે. યુવતીઓની સાથે મિત્રતા રાખવાની ઇચ્છા રાખતા યુવકો માટેનો એક ચેતવણીરૂપ કિસ્સો સામે આવ્યો છે.
મની એક્સચેન્જના માલિકને હનીટ્રેપમાં ફસાવીને રૂ. ૨૦ લાખનો તોડ કર્યો હોવાની ઘટના બની છે. ૧૦ દિવસ પહેલાં ટિન્ડર એપથી સંપર્કમાં આવેલી યુવતીને મળવા ગયેલા મની એક્સેન્જના માલિકને યુવતી ગોતા ખાતેના ફ્લેટ પર લઈ ગઈ હતી અને તેને જાળમાં ફસાવ્યા હતા.
સેટેલાઈટના આંબલી બોપલ રોડ પર રહેતા અને સીજી રોડ પર મની એક્સચેન્જની ઓફિસ ધરાવતા વેપારી મયૂર (નામ બદલ્યું છે)ના છૂટાછેડા થઇ જતાં તે પત્ની વિનાનું જીવન જીવતા હતા. ત્યારે કોઇનો સાથ હોવા માટે તેમણે ટિન્ડર એપ્લિકેશન ડાઉનલોડ કરી હતી. મયૂરને જાહનવી નામની યુવતી સાથે પરિચય થયો હતો. સેટેલાઈટ વિસ્તારમાં એસ.જી હાઇવે પર ગત તા. ૮મીના રોજ રાત્રે જાહનવી અને મયૂર મળ્યાં હતાં અને બીજા દિવસે પણ બંને વચ્ચે મુલાકાત થઈ હતી, જ્યાં જાહનવી એકાંતવાળી જગ્યાએ જવાનું કહી મયૂરને ગોતા ખાતેના ફ્લેટ પર લઈ ગઇ હતી
ફ્લેટમાં મયૂરને લઇ ગયા બાદ જાહનવીએ અચાનક કપડાં કાઢી નાખ્યાં હતાં.
એ દરમિયાન અચાનક જ ત્રણ યુવક ફ્લેટમાં ઘૂસી ગયા હતા અને તેને માર મારીને પોલીસને બોલાવવાનું કહ્યું હતું. ત્રણમાંથી બે યુવક જાહનવીને બહાર લઈ ગયા હતા જ્યારે એક યુવકે મયૂરને પોતાની ઓળખ યુવરાજસિંહ તરીકે આપી હતી અને તે પોલીસ કર્મચારી તરીકે ગોતા પોલીસ સ્ટેશનમાં નોકરી કરતા હોવાનું જણાવ્યું હતું. દરમિયાનમાં એક યુવક પોલીસ યુનિફોર્મ પહેરીને આવ્યો હતો અને તેને મયૂરના પગનાં તળિયામાં લાકડી મારી હતી.
યુવરાજસિંહે પોલીસ યુનિફોર્મમાં આવેલા યુવકને બહાર મોકલી મયૂરને જણાવ્યું કે, તારે જો આ કેસમાંથી બચવું હોય તો રૂ.૫૦ લાખ આપવા પડશે નહીં તો છોકરીવાળા તને મારી નાંખશે અને પોલીસ અંદર પૂરશે. આખરે આજીજી કરી મયૂરે ૨૦ લાખ આપવાનું કહ્યુ હતું. મયૂરે તેના મિત્રને ફોન કરી રૂ.૨૦ લાખ માગ્યા હતા. જે રકમ મયૂરનો માણસ લઈ આવ્યો અને પીએમ આંગડિયામાં આશિક દેસાઈના નામથી મોકલ્યા હતા. પૈસા મળ્યા બાદ આરોપીઓએ કારની ચાવી અને મોબાઈલ આપી મયૂરને જવા દીધો હતો.
આ ઘટનાને પગલે મયૂર માનસિક રીતે ભાંગી પડ્યો હતો અને તેને હાઇપ્લોગ્લાસમિયાનો એટેક આવતાં તેના મિત્રો શુક્રવારે સવારે મળવા માટે ઘરે પહોંચ્યા હતા. મિત્રોને મયૂરે પોતાની સાથે બનેલી ઘટનાની વાત કરી હતી જેથી મિત્રોએ આ મામલે તપાસ શરૂ કરી હતી.
મયૂર અને તેના મિત્રોને આનંદનગરમાં નકલી પોલીસ ઝડપાઇ હોવાની માહિતી મળી હતી. જેથી તેઓ ત્યાં પહોચતાં મયૂરે નકલી પોલીસ તરીકે પકડાયેલા યુવકને ઓળખી કાઢ્યો હતો. આનંદનગર પોલીસે બાતમીના આધારે કારમાં પોલીસ ડ્રેસ પહેરી પસાર થતા સમીર નુરુદ્દીન ચારણિયાને ઝડપી પાડ્યો હતો. જેણે મયૂરને પોતાની ઓળખ યુવરાજસિંહ તરીકે આપી હતી.
મયૂરે પોતાની સાથે બનેલી ઘટના પોલીસને કહેતાં સેટેલાઇટ પોલીસે આરોપી સમીર, જાહનવી, આશિક દેસાઈ સહિતના આરોપીઓ વિરુદ્ધ ગુનો નોંધી તપાસ હાથ ધરી છે. પોલીસ તપાસમાં વેપારીઓને હનીટ્રેપમાં ફસાવી તોડ કરતી ગેંગનો સમીર સાગરીત હોવાનું ખૂલ્યું છે. મયૂરની જેમ આ ગેંગે અનેક લોકોને હનીટ્રેપમાં ફસાવ્યાની શંકા પોલીસને છે.