પાટીદાર નેતા હાર્દિક પટેલને અંતે જામીન પર કરાયો મુક્ત કરાઇ હતી અટકાયત

પાસ કન્વીનર હાર્દિક પટેલને જામીન પર મુક્ત કરવામાં આવ્યો છે. મોટી સંખ્યામાં હાર્દિક પટેલના સમર્થકો ક્રાઇમબ્રાંચ પહોચ્યાં હતા. જામીન મળ્યા બાદ હાર્દિકે જણાવ્યું હતું કે પોલીસ દ્વારા ગેરકાયદેસર રીતે દાદાગીરી કરીને અમારી ધરપકડ કરવામાં આવી હતી.

હાર્દિકે કહ્યું કે અમને PI ચાવડાએ મારી નાંખવાની ધમકી પણ આપી હતી. જેની સામે અને કોર્ટમાં કાર્યવાહી પણ કરીશું. હાર્દિકે જણાવ્યું હતું કે 25 તારીખે આંદોલન તો કરવામાં આવશે જ જેને કોઈ પણ નહી રોકી શકે.   

ઉલ્લેખનીય છે કે પાટીદાર આંદોલન સમિતિ દ્વારા આજે એક દિવસના ઉપવાસની જાહેરાત કરવામાં આવ્યા હતા. પાસ કન્વીનર હાર્દિક પટેલની અધ્યક્ષતામાં પાસ દ્વારા આજે 1 દિવસના ઉપવાસની ચીમકી ઉચ્ચારવામાં આવી હતી.

પરંતુ ક્રાઇમ બ્રાન્ચ દ્વારા હાર્દિક પટેલની તેના નિવાસ સ્થાનેથી જ અટકાયત કરવામાં આવી છે. હાર્દિક પટેલ અને મનોજ પનારા અલ્પેશ કથીરિયા સહિતના 200થી વધુ કાર્યકરોની પોલીસ દ્વારા અટકાયત કરવામાં આવી છે. 

હાર્દિક પટેલ અને પોલીસ વચ્ચે થઇ બોલાચાલી
આપને જણાવી દઇએ કે હાર્દિક પટેલ ઉપવાસ માટે ઘરેથી નિકોલ જવા નિકળ્યા હતા. તે સમયે પોલીસ દ્વારા તેમની અને તેમના સમર્થકોની અટકાયત કરાઇ હતી. જે દરમિયાન અટકાયત પહેલા હાર્દિક પટેલ અને પોલીસ વચ્ચે ઝપાઝપી સર્જાઇ હતી. જ્યારે સમર્થકોની પોલીસ સાથે બોલાચાલી પણ થઇ હતી.