અમદાવાદમાં વધુ એક રૂટ પર મેટ્રો ટ્રેનનું ટ્રાયલ કરવામાં આવતા લાગી રહ્યું છે કે શહેરમાં થલતેજ સુધીનો મેટ્રો ટ્રેનનો રૂટ શરૂ થઈ શકે છે.
વિધાનસભા ચૂંટણી પહેલા અમદાવાદવાસીઓને મળશે ભેટ
ઓગસ્ટ સુધીમાં વધુ એક રૂટ પર મેટ્રો ટ્રેન થઈ શકે છે શરૂ
સાબરમતી નદી પરના ગાંધી બ્રિજ પાસે મેટ્રો ટ્રેનનું ટ્રાયલ કરાયું
ગુજરાતમાં વિધાનસભા ચૂંટણી આવે એ પહેલા અમદાવાદવાસીઓને મોટી ભેટ મળશે. શહેરમાં ઓગસ્ટ સુધીમાં વધુ એક રૂટ પર મેટ્રો ટ્રેન શરૂ થઈ શકે છે. સાબરમતી નદી પરના ગાંધી બ્રિજ પર મેટ્રો ટ્રેનનું ટ્રાયલ પણ કરાયું છે. આથી, અમદાવાદમાં થલતેજ સુધીનો મેટ્રો ટ્રેનનો રૂટ શરૂ થઈ શકે છે.
20 મે 2022ના રોજ ગ્યાસપુર ડેપોથી મોટેરા મેટ્રો સ્ટેશન સુધી મેટ્રો ટ્રેનનું ટ્રાયલ હાથ ધરાયું હતું
વધુમાં તમને જણાવી દઇએ કે, અમદાવાદમાં મહત્વાકાંક્ષી મેટ્રો રેલ પ્રોજેક્ટનો પ્રથમ તબક્કો ઓગસ્ટ સુધીમાં સંપૂર્ણ કાર્યરત થઇ જાય તેવી શક્યતા રહેલી છે. મેટ્રો ટ્રેનના પ્રથમ તબક્કામાં ગ્યાસપુર ડેપોથી મોટેરા મેટ્રો સ્ટેશન સુધીનો સમાવેશ થાય છે. ગ્યાસપુર ડેપોનું કામ પૂર્ણ થઇ ગયેલ છે તથા મેટ્રો ટ્રેનના ટ્રાયલની શરૂઆત ગ્યાસપુર ડેપોથી જીવરાજ સુધી માર્ચ, 2022માં કરવામાં આવેલ હતી. ત્યાર બાદ તેને લંબાવીને વિજયનગર સુધી ટ્રાયલ કરવામાં આવી હતી. 20 મે 2022ના રોજ ગ્યાસપુર ડેપોથી મોટેરા મેટ્રો સ્ટેશન સુધી મેટ્રો ટ્રેનનું ટ્રાયલ હાથ ધરાયું હતું.
અમદાવાદ મેટ્રો રેલ પ્રોજેકટ ફેઝ-1 માં બે કોરિડોર
આ ટ્રાયલ દરમિયાન મેટ્રો ટ્રેન APMC, જીવરાજ, રાજીવનગર, શ્રેયસ, પાલડી, ગાંધીગ્રામ, જૂની હાઈકોર્ટ, ઉસ્માનપુરા, વિજયનગર, વાડજ, રાણીપ, એઈસી, સાબરમતી મેટ્રો સ્ટેશનથી પસાર થઈને મોટેરા મેટ્રો સ્ટેશન પર પહોંચી હતી. તમને જણાવી દઇએ કે, અમદાવાદ મેટ્રો રેલ પ્રોજેકટ ફેઝ-1 માં બે કોરિડોર છે. એક નોર્થ-સાઉથ કોરિડોર અને બીજો ઇસ્ટ-વેસ્ટ કોરિડોર છે. નોર્થ-સાઉથ કોરિડોર ગ્યાસપુર ડેપોથી મોટેરા, ઇસ્ટ-વેસ્ટ કોરિડોર થલતેજ ગામથી વસ્ત્રાલ ગામ સુધી છે.