ખાસ વાંચો / માસ્ક નહીં પહેરનારા ચેતી જજો, ગુજરાતમાં આવતીકાલથી જ અમલી બની રહ્યો છે આ નિયમ

• CM રૂપાણીની મોટી જાહેરાત 
• રાજ્યમાં હવે માસ્ક ન પહેરવા પર 1 હજારનો દંડ
• 1 હજારના દંડને લઇ કોંગ્રેસે સરકાર પર ઉઠાવ્યો સવાલ

ઉલ્લેખનીય છે કે, રાજ્યમાં હાલ મેળાની સીઝન ચાલી રહી છે પરંતુ કોરોના મહામારીને કારણે તમામ મેળાઓ અને મેળાવડાઓ પર પાબંધી લાદવામાં આવી છે. તો માસ્ક અને સેનિટાઇઝરના ઉપયોગ અંગે જનતાને અપીલ કરાઇ રહી છે. ત્યારે આજે મુખ્યમંત્રી વિજય રૂપાણીએ જણાવ્યું છે કે રાજ્યની વડી અદાલતે સરકારને આપેલા સૂચન પ્રમાણે ગુજરાતમાં આવતીકાલથી અમલ કરવામાં આવશે.  

આવતીકાલથી રાજ્યમાં માસ્ક નહીં પહેરનારને થશે 1 હજારનો દંડ 

CM રૂપાણીએ જાહેર કર્યું છે કે રાજ્યમાં આવતીકાલ એટલે કે 11 ઓગસ્ટ મંગળવારથી જાહેરમાં માસ્કના પહેરનારા વ્યક્તિઓને 1000 રૂપિયાનો દંડ કરવામાં આવશે.24 જુલાઇએ ગુજરાત હાઇકોર્ટમાં કોરોનાના કેર બાદ થયેલી સુઓમોટો અરજીની સુનાવણીમાં હાઇકોર્ટે સરકારને કેટલાક મહત્વના નિર્દેશો કર્યા હતા. 

હાઇકોર્ટે સરકારને કરી હતી ટકોર
 
આદેશમાં કહેવામાં આવ્યું હતું કે, લોકો બેદરકારીના કારણે માસ્ક પહેર્યા વગર અને સોશ્યલ ડિસ્ટન્સ જાળવ્યા વગર ફરી રહ્યા છે. માસ્ક નહીં પહેરનાર પાસેથી 1 હજારનો દંડ વસૂલવા હાઇકોર્ટે સરકારને ટકોર કરી હતી. લોકોની નારાજગીની ચિંતા કરવાની જરૂર નથી. લોકહિતમાં કડક નિર્ણયો લેવા જોઇએ.

કોંગ્રેસી ધારાસભ્યોએ નોંધાવ્યો વિરોધ 

રાજ્યમાં હવે માસ્ક ન પહેરવા પર 1 હજારનો દંડ છે. ત્યારે 1 હજારના દંડને લઇ કોંગ્રેસ સરકાર પર નિશાન સાધ્યું છે. કોંગ્રેસના ધારાસભ્ય ઇમરાન ખેડાવાલાએ કહ્યું કે 1 હજારનો દંડ બહુ વધુ છે. દંડની રકમ ઓછી હોવી જોઇએ અને સરકારે અગ્નીકાંડ સામે ફરિયાદ નોંધી કાર્યવાહી કરવી જોઇએ. દંડ વધારવાની જગ્યાએ અગ્નીકાંડમાં જવાબદાર લોકો સામે FIR થવી જોઇએ.

અન્ય રાજ્યોમાં માસ્ક ન પહેરવા પર વસૂલાય છે વધારે દંડ

તમને જાણીન નવાઈ લાગશે કે માસ્ક ન પહેરવા પર સૌથી ઓછો દંડ ગુજરાતમાં 200 રૂપિયા લેવાતો હતો. જ્યારે અન્ય રાજ્યોમાં આ દંડની રકમ વધારે છે. સૌથી વધુ તામિલનાડુમાં 10000 રૂપિયા લેવાય છે. જ્યારે મહારાષ્ટ્રમાં 1000 રૂપિયાનો દંડ વસૂલવામાં આવે છે. દિલ્હી, ઓડિશા તેમજ પંજાબમાં પણ 500થી 1000 રૂપિયા સુધીનો દંડ વેલાવામાં આવે છે.