અમદાવાદ / પ્રેમીના ભાઇએ યુવતીને નરોડા પાટિયા મળવા બોલાવીને કહ્યું, મારા ભાઈને છોડી દે, નહીં તો તને કિડનેપ કરી અને રેપ કરીશ

• અમદાવાદમાં પ્રેમીના ભાઈએ યુવતીને કાપી નાખી અપહરણ કરી રેપ કરવાની ધમકી આપતા નોંધાઇ ફરિયાદ
• મારા ભાઈને છોડી દે, નહીં તો તને કિડનેપ કરી તારા પર રેપ કરીશઃ યુવતીને ધમકી
• આ યુવતી યુવકના પ્રેમમાં હતી અને બંન્ને લગ્ન પણ કરવાનાં હતા

અમદાવાદના ઇસનપુરમાં રહેતી એક યુવતીએ નરોડા પોલીસ સ્ટેશનમાં મોટા ‌ચિલોડામાં રહેતા એક યુવક વિરુદ્ધ ધમકીની ફરિયાદ કરી છે. સાતેક મહિના પહેલાં યુવતીની મોટા ‌ચિલોડા ખાતે રહેતા રાજેન્દ્રસિંહ ચૌહાણ નામના યુવક સાથે મુલાકાત થઇ હતી, જે મુલાકાત પ્રેમમાં પરિણમી હતી. રાજેન્દ્રસિંહ ચૌહાણે યુવતી સાથે લગ્ન કરવાનું કહ્યું હતું. ત્યારબાદ નવેમ્બર-ર૦ર૦માં કોઇ કારણસર બંને વચ્ચેનો સંપર્ક તૂટી ગયો હતો. થોડાક દિવસ પહેલાં યુવતી રાજેન્દ્રસિંહના ઘરે ગઇ હતી, જ્યાં તે મળ્યો નહીં જેથી યુવતી ઘરે પરત આવી ગઇ હતી. 

મોડી રાતે રાજેન્દ્રસિંહના મોટાભાઇ શામલસિંહ ચૌહાણનો ફોન યુવતી પર આવ્યો હતો અને તું મારા ઘરે કેમ આવી હતી તેમ કહી બબાલ કરી હતી. શામલસિંહે યુવતીને નરોડા પા‌ટિયા મળવા બોલાવી હતી, જ્યાં યુવતી તેને મળવા માટે ગઇ હતી. ત્યારે જાહેર રોડ પર શામલસિંહે યુવતીને ગાળો ભાંડી મારા ભાઇ રાજેન્દ્રસિંહને છોડી દે, રાજેન્દ્રસિંહ સાથે સબંધ નહિ રાખવાનો, નહીં તો હું તને કાપીને ફેંકી દઇશ કે તારું અપહરણ કરી તારા પર રેપ કરીશ તેવી ધમકી આપી હતી. 

શામલસિંહે ધમકી આપતાં યુવતીએ પોલીસ કંટ્રોલરૂમમાં ફોન કર્યો હતો. પોલીસે ઘટનાસ્થળે આવી યુવતીની અરજી લીધી હતી. પોલીસે ગુનો દાખલ નહીં કરતાં ત્રણેક દિવસ પહેલાં ફરી શામલસિંહનો ફોન આવ્યો હતો અને ફરી ધમકી આપી હતી. પોલીસે શામલસિંહ વિરુદ્ધ તપાસ શરૂ કરી છે.