આંતરરાજ્ય પોલીસ ચેકપોસ્ટ તાત્કાલીક અસરથી બંધ કરવા માટે આદેશ આપી દેવાતાં ગુજરાતની તમામ બોર્ડર પરથી પોલીસે ચેકપોસ્ટ હટાવી દીધી છે. ચેકપોસ્ટ હટાવી દેવાના કારણે બુટલેગરોને મોકળું મેદાન મળી ગયું છે સાથોસાથ આબુ, ઉદયપુર, દિવ, દમણ જનારા સહેલાણીઓને પણ ફાવતું મળી ગયું છે. બુટલેગરોની સાથે સાથે સહેલાણીઓ પણ પોલીસના ડર વગર બિન્દાસ્ત દારૂ લાવી રહ્યા છે.
માઉન્ટ આબુ, દિવ જનારા હવે બિન્દાસ્ત કારમાં દારૂ નાખતા આવે છે
ચેકપોસ્ટ હોવાથી પકડાઈ જવાનો ડર રહેતો હતો તે હવે દૂર થઈ ગયો
રાજ્ય પોલીસ વડા શિવાનંદ ઝાએ ૨૩ ડિસેમ્બરના રોજ ગુજરાત રાજ્યની ૨૦૦ આંતરરાજ્ય અને આંતરજિલ્લા પોલીસ ચેકપોસ્ટ તાત્કાલિક અસરથી બંધ કરવાનાં આદેશ આપી દીધા છે. આ નિર્ણયની અમલવારી કરાતાં રાજ્યના મોટાભાગના જિલ્લાઓમાં ૨૦૦ ચેકપોસ્ટ હટાવી લેવામાં આવી છે.
ગુજરાતમાં અસામાજિક પ્રવૃતિઓ માટે પંકાયેલી અને દારૂબંધીના લીરેલીરા ઉડાડીને વર્ષે દહાડે કરોડો રૂપિયાનો વિદેશી દારૂ ઘુસાડવા માટે બુટલેગરો અને અસામાજીક તત્ત્વો માટે આશીર્વાદરૂપ ગણાતી શામળાજી – રતનપુર ચેકપોસ્ટ સહિત તમામ બોર્ડરો પરથી ચેકપોસ્ટો હટી ગઇ છે.
૨૦૧૯ના પૂર્ણ થવાને અને વર્ષ ૨૦૨૦ના શરૂ થવાને હવે એક જ દિવસ બાકી રહ્યો છે ત્યારે અમદાવાદ સહિત રાજ્યનાં અલગ અલગ શહેરોમાં દારૂ પાર્ટીઓની ઘણી બધી મહેફીલ જામશે. શામળાજી નજીક આવેલી રતનપુર, મેધરજ ઉડવા ચેકપોસ્ટ, ભાણેર ચેકપોસ્ટ, ખેડબ્રહ્મા અને વિજયનગર પાસે આવેલી રાણી ચેકપોસ્ટ બુટલગેરો માટે દારૂ ઘુસાડ઼વા માટે હોટ ફેવરિટ છે.
તમામ ચેકપોસ્ટ વિસ્તારમાં આવતાં પોલીસ સ્ટેશનોમાં ફરજ બજાવતા પોલીસ કર્મચારીઓ કાવડિયા ખર્ચી પોસ્ટિંગ મેળવી લાખો કરોડો રૂપિયાનો ભ્રષ્ટાચાર આદરવામાં આવતો હોવાની અનેક ફરિયાદો ઊઠી હતી. જેના કારણે રાજ્યના પોલીસ વડાએ આ નિર્ણય લીધો છે.
ચેકપોસ્ટ હટાવી લેવાતાં બુટલેગરોને મોકળું મેદાન મળી ગયું છે ત્યારે સહેલાણીઓ પણ મોજમાં આવી ગયા છે. ચેકપોસ્ટ હતી ત્યારે બુટલેગરો તેમજ સહેલાણીઓને પોલીસને એક ડર હતો પોલીસ ગમે ત્યારે તેમને પકડી શકશે,પરંતુ હવે તેવું નથી. ચેકપોસ્ટ પર ભષ્ટાચાર થતો હતો પરંતુ લોકોમાં એક બીક હતી જેના કારણે સહેલાણીઓ દારૂ લાવવા માટે દસ વખત વિચાર કરતા હતા.
ચેકપોસ્ટ પર પોલીસ ચેકિંગના કારણે દારૂ લઇને આવનારા સહેલાણીઓને પોલીસ પકડે તેમના વિરુદ્ધમાં કેસ કરતા અથવા તો બોટલ તોડાવીને કેસ નહીં કરવાનો તોડ કરીને જવા દેતા હતા. જોકે હવે તેવું નથી રહ્યું. આબુ ફરવા માટે ગયેલા ચાર મિત્રોએ નામ નહીં આપવાની શરતે જણાવ્યું છે કે ચેકપોસ્ટ પર કોઇપણ પ્રકારનું ચેકિંગ હતું નહીં, જેના કારણે બિન્દાસ્ત દારૂની બોટલો અમદાવાદમાં લાવી શક્યા છે. ચેકપોસ્ટોના કારણે પોલીસ પહેલાં બસ, ટ્રક તેમજ કારને રોકીને ચેકિંગ કરતી હતી. જેથી લોકો દસ વખત વિચાર કરતા હતા હવે તેવું નથી રહ્યું.
મહારાષ્ટ્ર, રાજસ્થાન અને મધ્યપ્રદેશ અને દમણથી દારૂ લાવવામાં આવે છે. ૩૧ ડિસેમ્બર હોવાથી માઉન્ટ આબુ તેમજ ઉદયપુર, દિવ, દમણની તમામ હોટલો ફુલ છે અને હોટલોના ભાવ પણ આસમાને છે તો બીજી તરફ દિવ અને દમણને બાદ કરતાં માઉન્ટ આબુ તેમજ ઉદયપુરમાં દારૂનો ભાવ પણ બમણો કરી દેવામાં આવ્યો છે. અમદાવાદમાં મળતા દારૂના ભાવ પ્રમાણે ત્યાં દારૂ મળી રહ્યો છે જેના કારણે હવે લોકો બોર્ડર પર જઇને દારૂની બોટલો લઇને આવી રહ્યા છે.