શહેરીજનોમાં લો ગાર્ડન જેટલી જ લોકપ્રિય લો ગાર્ડનનું ખાણીપીણી બજાર છે. જોકે આ ખાણીપીણી બજારમાં આડેધડ રીતે ખાણીપીણીવાળાનું દબાણ વધવાથી ભારે વિવાદાસ્પદ બન્યું હતું અને ટીપી રોડ બંધ થવાથી આ મામલો હાઇકોર્ટે ચડ્યો હતો.
હાઇકોર્ટે ઓર્ડર કરી દબાણ હટાવતાં મ્યુનિ. તંત્ર દ્વારા આ ખાણીપીણી બજારને 'હેપી સ્ટ્રીટ' નામ હેઠળ નવાં રંગરૂપ અપાઇ રહ્યાં છે. અત્યારે સમગ્ર પ્રોજેકટ પ૦ ટકા જેટલો પૂર્ણ થયો હોઈ દિવાળી પહેલા શહેરનું જાણીતું ખાણીપીણી બજાર ધમધમતું થાય તેવી શક્યતા છે.
મ્યુનિ. તંત્ર દ્વારા એનસીસી સર્કલથી લો ગાર્ડન સર્કલ સુધી જતાં ૩રપ મીટર લાંબા અને ખાણીપીણી બજાર તરીકે જાણીતાં આ સ્થળને વિકસીત કરવા માટેનાં ચક્ર ગતિમાન છે અને આ માટે રૂ.પ.૩પ કરોડનો ખર્ચ કરાશે. મ્યુનિ. તંત્ર દ્વારા એનઆઇડી (નેશનલ ઈન્સ્ટિટ્યૂટ ઓફ ડિઝાઇન)ને ખાણીપીણી બજારની ડિઝાઇન બનાવવાની કામગીરી સોંપાઇ હતી. એનઆઇડી દ્વારા હેરિટેજ થિમ આધારિત ડિઝાઇ તૈયાર કરાઇ હોઇ ગ્રીનરી વધારવા માટે ૬૭ વૃક્ષો ઉછેરવાનો પણ પ્રોજેકટમાં સમાવેશ કરાયો છે.
ખાણીપીણી બજારમાં ૩ર૦ મીટરનો સાઇકલ ટ્રેક, ૪૮ પ્રિકાસ્ટ બેન્ચ, ૩પ ફોર વ્હીલર અને ૪૪૬ ટુ-વ્હીલર સહિત આશરે ૪૯૧ વાહનોની પાર્કિંગ વ્યવસ્થા ઊભી કરાશે. ખાણીપીણીના કુલ ૩૩ ફેરિયાને તેમનાં વાહન સાથે સાંજે ૬ થી રાત્રીના ૧ર વાગ્યા સુધીના સમય સુધી ઊભા રહેવાની મંજૂરી મળશે. આ ખાણીપીણીવાળા પોતાનાં વાહનનો ઓન-વ્હીલ ફૂડ સ્ટોલ તરીકે ઉપયોગ કરી શકશે એટલે ખાણીપીણી બજારમાં થતી દબાણની સમસ્યાનું કાયમી નિરાકરણ આવશે. ધંધાર્થી પોતાનાં વાહન સાથે ચાર ટેબલ રાખી શકશે. આ ઉપરાંત લો ગાર્ડનની આશરે ૩ર૦ મીટર લાંબી દીવાલને હેરિટેજના અભિગમ સાથે આકર્ષક બનાવાશે.
સત્તાવાળાઓ દ્વારા 'હેપી સ્ટ્રીટ' એટલે કે ખાણીપીણી બજારનાં ડેવલપમેન્ટ પ્લાનમાં રોડની પહોળાઇ ર૬.પ મીટર રખાઇ છે. બંને તરફ બે મીટર ચાલવાનો વોક વેની પણ વ્યવસ્થા કરાઇ છે. દરમ્યાન જાણકાર સૂત્રો કહે છે કે, આ પ્રોજેકટ હેઠળ પ૦ ટકાથી વધુ કામગીરી પૂર્ણ કરાઇ છે તેમજ અત્યારે આરસીસી રોડનું કામ પૂર્ણ જોશમાં ચાલે છે.
તેમજ હેરિટેજ વોલની કામગીરી ચાલે છે. નવા બનેલા રોડમાં લાઇટ કે ટેલિફોન કંપનીવાળા ખોદકામ ન કરે તે માટે તેમના વાયરોને પસાર કરવા બંને બાજુ ડકલાઇન નાખવાની કામગીરી ચાલી રહી છે. વરસાદી પાણીથી ખાણીપીણી બજારને સુરક્ષિત રાખવા બે સ્ટ્રોમવોટર ડકલાઇન નંખાઇ રહી છે. એટલે દિવાળી પહેલાં સમગ્ર પ્રોજેકટ પૂર્ણ થાય તેવી શકયતા છે.
અત્રે એ ઉલ્લેખનીય છે કે શહેરની ઓળખ ગણાતી ૪૫ વર્ષ જૂની લો ગાર્ડનની ખાણીપીણી બજાર પર ગત તા. ૧ ઓગસ્ટની સવારે મ્યુનિસિપલ સત્તાવાળાઓએ બૂલડોઝર ફેરવીને જમીનદોસ્ત કરી હતી. હાઈકોર્ટના આદેશના પગલે તંત્ર દ્વારા ટ્રાફિકની સમસ્યાના નિરાકરણ માટે ઓપરેશન ડિમોલિશેન હાથ ધરાતા તે બાબત ટોક ઓફ ધ ટાઉન બની હતી.