ધરપકડ / અમદાવાદ પોલીસ જવાનને છીંક ખાવા જેવી બાબતે માર મારનારા શખ્સો વિરૂદ્ધ થઇ આ કાર્યવાહી

• અમદાવાદમાં LRD જવાનને માર મારવા મામલો
• છીંક ખાવા જેવી બાબતે તકરાર થઈ હતી
• પોલીસે 5 આરોપીઓની કરી ધરપકડ 

ગઇકાલે અમદાવાદના નરોડામાં મામલતદાર કચેરી નજીક મામલતદાર કચેરીમાં પોલીસ જવાન યુવરાજસિંહ ઝાલા છીંક ખાતા મારામારી થઇ હતી. પોલીસ જવાને છીંક ખાતા જ કેટલાક શખ્સોએ પોલીસ જવાનને બિભત્સ ગાળો આપીને અન્ય લોકોને બોલાવીને માર માર્યો હતો. શખ્સોએ નજીક આવીને કહ્યું કે, હું સારા કામથી નીકળ્યો છું તે છીંક કેમ ખાધી. 

જ્યારબાદ પાંચ શખ્સોએ પોલીસ જવાનને ગડદાપાટુનો માર માર્યો અને મોઢાના ભાગે મુક્કા મારતા તેને નાક અને આંખમાંથી લોહની નીકળવા લાગ્યું હતું. જોકે આસપાસના લોકોએ બૂમાબૂમ કરતા આ શખ્સોએ પોલીસ જવાનને મારવાનું બંધ કર્યું હતું. પોલીસ જવાનને નાકના ભાગે ઇજા પહોંચી હતી. પોલીસ જવાનને સારવાર હેઠળ ખસેડાયો હતો અને તેને નાકે ફ્રેક્ચર થયું છે. પોલીસ જવાન અમદાવાદના કૃષ્ણનગર પોલીસ સ્ટેશનમાં ફરજ બજાવતો હતો.

આ ઘટનાની જાણ ઉચ્ચ પોલીસ અધિકારીને કરવામાં આવતા તેઓ તાત્કાલિક ઘટના સ્થળ પહોંચ્યા હતા. પોલીસ જવાને માર મારનાર પાંચેયના નામ પૂછતા તેઓએ જગદીશ ભરવાડ, ભરત ભરવાડ, વિપુલ ભરવાડ, સંજય ભરવાડ અને રવિ ભરવાડ હોવાનુ જણાવ્યું હતું. ત્યારબાદ પોલીસે આ પાંચેય વિરૂદ્ધ ફરિયાદ નોંધીને ધરપકડ કરવામાં આવી હતી. હાલ આ પાંચેયની પૂછપરછ હાથ ધરવામાં આવી છે.