ખોખરામાં રહેતી મહિલાને પતિએ કહ્યું કે મારા બનેવી સાથે તારે ખરાબ સંબંધ છે. પતિએ આમ કહી ઝઘડો કરી તેને માર માર્યો હોવાની ઘટના સામે આવી છે. બીજી તરફ સસરાએ મહિલાના પિતાને ફોન કરી કહ્યું કે તમારી દીકરીને અમારા ઘરે રાખવી હોય તો દહેજ પેટે ર૦ લાખ રૂપિયા આપવા પડશે.
સસરાએ વેવાઈને ફોન કરી માગ્યા પૈસા
કહ્યું- દીકરીને અમારા ઘરે રાખવી હોય તો 20 લાખ આપો
અમદાવાદમાં કિસ્સો ટોક ઓફ ધ ટાઉન
ખોખરામાં રહેતી સેજલસિંહે પતિ તેમજ સાસરિયાં વિરુદ્ધ ફરિયાદ નોંધાવી છે. સેજલે આજથી સાત વર્ષ પહેલાં ડોક્ટર ઉત્કર્ષ સાથે સમાજના રીતરિવાજ મુજબ લગ્ન કર્યાં હતાં. તેને લગ્નજીવન દરમિયાન એક દીકરો પણ છે. સેજલે બીઈ આઇટી સુધીનો અભ્યાસ કર્યો છે.
લગ્ન બાદ સેજલ સાસરીમાં સંયુક્ત પરિવાર સાથે રહેતી હતી. સેજલને સાસરિયાંએ છ મહિના સુધી સારી રીતે રાખી હતી. ત્યારબાદ સાસુ-સસરા, દિયરે નાની નાની બાબતમાં વાંક કાઢીને ઝઘડો કરવાનું શરૂ કરી દીધું હતું. સાસુ અવારનવાર તારા બાપના ઘરેથી દહેજ પેટે બે લાખ તથા મકાન માટે પૈસા લઇ આવ તેવી માગણી કરતાં હતાં, જેથી સેજલે કહ્યું કે મારા પિતાએ તમે માગ્યા મુજબ દહેજ આપ્યું છે. હવે મારા પિતાજી પાસે પૈસાની સગવડ નથી. સેજલે આમ કહેતાં પતિએ તેને માર માર્યો હતો.
બનેવી સાથે ખરાબ સંબંધ હોવાનો પણ કર્યો આક્ષેપ
પતિ ખોટાે શક-વહેમ રાખીને પત્નીને કહેતો હતો કે તારા મારા બનેવી સાથે ખરાબ સંબંધ છે. પતિ આમ કહીને પત્નીને માર મારતો હતો. સાસરીવાળાં તું આ બાબતની વાત તારા ભાઈ કે માતા-પિતાને કરીશ તો જાનથી મારી નાખીશું તેવી ધમકી પણ આપતાં હતાં. આથી સેજલ ડરી ગઈ હતી. સસરાએ સેજલના પિતાને ફોન કરીને કહ્યું કે તમારી દીકરીને અમારા ઘરે રાખવી હોય તો દહેજ પેટે ર૦ લાખ રૂપિયા આપવા પડશે, જેથી આખરૅ કંટાળીને સેજલે પતિ તેમજ સાસરિયાં વિરુદ્ધ ફરિયાદ નોંધાવી હતી.