કેસર / અમદાવાદમાં કેસર કેરી મહોત્સવનો ધમાકેદાર પ્રારંભઃ કાર્બાઇડ ફ્રી અને ઓર્ગેનિક કેરીનું આગમન

સાબરમતી રિવરફ્રન્ટ ખાતે ગુજરાત એગ્રો ઈન્ડસ્ટ્રીઝ કોર્પોરેશન લીમીટેડ દ્વારા કેસરકેરી મહોત્સવનો આજથી પ્રારંભ કરવામાં આવ્યો હતો. જેમાં ઉદ્દઘાટન પ્રસંગે અમદાવાદના મેયર બીજલ પટેલ હાજર રહ્યાં હતા.

તેઓએ કહ્યું કે અમદાવાદના લોકોને ઓર્ગેનિક કેરી મળી રહે તે માટે આ પ્રકારનું દર વર્ષે કોર્પોરેશનના સાથ સહકારથી એગ્રો ઈન્ટસ્ટ્રીઝ કોર્પોરેશન દ્વારા કેસરકેરી મહોત્સવનું આયોજન કરવામાં આવે છે.

જેમાં સૌરાષ્ટ્ર તેમજ કચ્છની ખેતમંડળીઓ કેરીનું વેચાણ કરવા માટે ભાગ લેતી હોય છે. વધુમાં તેમણે જણાવ્યુ હતું કે આ વર્ષે 50 સ્ટોલ લગાવવામાં આવ્યા છે. જો ખરીદદારોનુ ટ્રાફિક હશે તો બીજા સ્ટોલની પણ વ્યવસ્થા કરી અમદાવાદના લોકોને કાર્બોરેટ મુક્ત કેરી પુરી પડાશે.