ગોલમાલ / જુઓ તંત્રના ખેલ! વિકાસની વાત કરી કરોડોનું આંધણ, કમાણીનો વારો આવ્યો એટલે માનીતા મળતિયાઓને ટેન્ડર!

• AMCની સ્ટેન્ડિંગ કમિટીની બેઠકમાં વિવાદિત દરખાસ્ત
• કાંકરિયા મલ્ટી લેવલ પાર્કિંગને ખાનગી કંપનીને સોંપાશે
• પાર્કિંગમાં રેસ્ટોરન્ટ, મિનિ માર્કેટ, કિડઝ ઝોન બનાવવા છૂટ

28 કરોડના ખર્ચે તૈયાર કરાયું હતું મલ્ટી લેવલ પાર્કિંગ

28 કરોડના ખર્ચે બનાવાયેલા અને છેલ્લા કેટલાય વર્ષોથી બંધ પડેલા કાંકરિયા મલ્ટિલેવલ ઓટોમેટિક પાર્કિંગને ‘આત્મનિર્ભર’ બનાવવાની વિવાદિત યોજના મ્યુનિ.એ તૈયાર કરી છે. 2 વર્ષથી તૈયાર કરેલી આ યોજના અંગેની દરખાસ્ત સ્ટેન્ડિંગ કમિટીમાં રજૂ કરાઈ છે. જેમાં એક ખાનગી કંપની પાસેથી વાર્ષિક 11 લાખ લાઈસન્સ ફી લઈ પાર્કિંગ સોંપી દેવાશે.

16 વર્ષના કોન્ટ્રાક્ટ પર કંપનીને પાર્કિંગ અપાશે

16 વર્ષના કોન્ટ્રાક્ટ પર આ કંપનીને પાર્કિંગ અપાશે. જેમાં તે મલ્ટિલેવલ પાર્કિંગની ટેરેસ સ્પેસમાં રૂફટોપ રેસ્ટોરાં કે ક્રાફેટ એરિયા બનાવી શકશે. આ ઉપરાંત ફૂડકોર્ટ, કિડ્ઝ ઝોન, ઓટોમોબાઈલ કંપનીઓને નવા મોડલને ડિસ્પ્લેમાં મૂકવા ભાડેથી જગ્યા આપી શકશે. ઓટોમેટિવ એસેસરીઝ કે અન્ય વસ્તુઓ માટે મિની માર્કેટ બનાવી શકશે. આ ઉપરાંત એટીએમ માટેની જગ્યા, કાર વોશિંગ માટેની જગ્યા, એડવર્ટાઈઝ કે હોર્ડિંગ્સ લગાવવા માટે રૂફટોપ કે તેના પરિઘમાં આઉટર સ્પેસ તેમજ વીજળી ઉત્પન્ન કરવા માટે સોલાર રૂફટોપ પણ ઈન્સ્ટોલ કરી શકશે. જે કેપ્ટિવ કન્ઝમસન્સ માટે પણ ઉપયોગમાં લઈ શકાશે. જો કે, તમામ એક્ટિવિટીઝ માટે કંપનીને જે આવક થાય તેમાંથી નજીવો હિસ્સો કોર્પોરેશનને આપવાનો રહેશે. તેવી શરત નક્કી કરવામાં આવી છે.

વાર્ષિક 11 લાખના ભાડે ખાનગી કંપનીને અપાશે પાર્કિંગ

લાઈસન્સનો પિરિયડ 10 વર્ષનો રાખવામાં આવ્યો છે. પરંતુ પછી તે 5 વર્ષ માટે લંબાવી શકશે તેવો ઉલ્લેખ અત્યારથી જ એગ્રીમેન્ટમાં કરી દેવાયો છે. જ્યારે ટેરેસ સ્પેસમાં રૂફટોપ રેસ્ટોરાં કે ક્રાફેટ એરિયા બનાવવા માટે પણ બીયુ પરમિશન માટે1 વર્ષનો વધારાનો સમય આપી દેવાની જોગવાઈ દરખાસ્તમાં કરી દેવાઈ છે. આ ઉપરાંત લાઈસન્સ પિરિયડ દરમિયાન કંપનીએ પ્રોપર્ટી ટેક્સ પણ ભરવો નહીં પડે તેવી પણ જોગવાઈ દરખાસ્તમાં છે.

ઘાટ કરતા ઘડામણ મોંઘી    

• કાંકરિયા મલ્ટી લેવલ પાર્કિંગ બન્યું શોભાના ગાંઠિયા સમાન
• 2011માં 7 માળનું બનાવાયું મલ્ટીલેવલ પાર્કિંગ
• 250થી વધુ કાર પાર્ક થઈ શકે તેવી વ્યવસ્થા
• પાર્કિંગ ચલાવવાનો વાર્ષિક 42 લાખ રૂપિયા ખર્ચ
• ખર્ચ સામે આવક માત્ર 8 લાખ રૂપિયા 
• નુકસાન કોર્પોરેશનને ભોગવવું પડતું હોવાથી ખાનગી કંપનીને સોંપ્યું