રાજ્યમાં જામ્યો વરસાદી માહોલ, અમદાવાદ, સુરત સહિતના વિસ્તારોમાં વરસાદથી પ્રસરી ઠંડકની લહેર
ગુજરાતમાં વરસાદી માહોલ
સુરત, અમદાવાદ અને આણંદમાં વરસાદ
નીચાણવાળા વિસ્તારો થયા પાણી પાણી
ગુજરાતમાં વરસાદી માહોલ જોવા મળી રહ્યો છે. સૌરાષ્ટ્ર, દક્ષિણ ગુજરાતમાં મેઘો મહેરબાન થયો છે. ત્યારે કાગડોળે વરસાદની રાહ જોઇને બેઠેલા અમદાવાદીઓને રાહતની લાગણી થઇ છે. કારણ કે અમદાવાદના વિવિધ વિસ્તારોમાં વરસાદી માહોલ જોવા મળ્યો. એસ.જી હાઇવે, વસ્ત્રાપુર અને શિવરંજની સહિતના વિસ્તારમાં વરસાદ વરસ્યો. આ ઉપરાંત સેટેલાઇટ, જોધપુર અને બોડકદેવમાં પણ વરસાદ થયો.
આણંદમાં સાર્વત્રિક વરસાદ
આણંદ જિલ્લામાં સાર્વત્રિક વરસાદ થયો છે. જેમાં સૌથી વધુ 11 ઈંચ વરસાદ આણંદ જિલ્લાના બોરસદ તાલુકામાં થયો છે. જેને કારણે બોરસદના વનતળાવ વિસ્તારમાં 100 જેટલા પરિવારની માલ-મિલકત પાણીમાં ગરકાવ થઇ છે. સાથે જ ભારે વરસાદને કારણે એક યુવક અને ચાર પશુનું તણાવવાને લઇ મૃત્યુ થયું છે. જેથી ફાયરની ટીમે વ્યક્તિના મૃતદેહને શોધવા કાર્યવાહી હાથધરી છે. બોરસદ સાથે ભાદરણ હાઈવેમાં ઢીંચણ સમા પાણી ભરાયા છે. સાથે ભાદરણમાં તળપદા વાસમાં પાણી ફરી વળ્યું છે. આ ઉપરાંત આણંદના પેટલાદ, સોજીત્રા, તારાપુર અને ખંભાતમાં સારો વરસાદ થયો છે.
સુરતમાં વરસાદી માહોલ
સુરતમાં ગઇકાલથી જ મેઘસવારી આવી પહોંચી છે. આજે પણ સુરતમાં સારો વરસાદ વરસી રહ્યો છે. સારા વરસાદથી શહેરમાં પાણી ભરાયા. સરથાણા ચાર રસ્તા પાસે પાણી ભરાતા વાહનચાલકોએ હાલાકી વેઠવાનો વારો આવ્યો હતો.
ઓલપાડ બજારમાં પાણી
સુરત જિલ્લાના ઓલપાડમાં મોડી રાતથી ધોમધાર વરસાદ શરૂ થયો છે. જેને કારણે ઓલપાડની મુખ્ય બજારમાં પાણી ભરાયા છે. ઓલપાડના મુખ્ય બજારમાં પાણી ભરાવાથી વાહનચાલકોને હાકાલી થઇ રહી છે. સાથે ઉપરવાસમાં ભારે વરસાદના કારણે ઓલપાડમાં આવેલી ખાડીઓ બેકાંઠે થઇ છે. સાથે લો-લેવલ બ્રિજ પર ખાડીના પાણી ફરી વળ્યાં છે. જેને કારણે વાહન વ્યવહાર બંધ કરવામાં આવ્યો છે.
નવસારીમાં મેઘો મહેરબાન
નવસારીમાં મેઘો ધોધમાર વરસ્યો. નવસારી શહેરમાં 1 ઇંચ વરસાદ થતા વાતાવરણમાં ઠંડકની લહેર ફરી વળી. નવસારી જિલ્લામાં વાવણીલાયક વરસાદ થતા ખેડૂતો હરખાયા. ચીખલી, જલાલપોર તાલુકામાં દોઢ ઈંચ જેટલો વરસાદ થયો. આ તરફ નવસારી શહેરમાં પણ ધીમીધારે વરસાદ વરસતા શહેરીજનોને કાળઝાળ ગરમીમાંથી રાહત મળી હતી.
નર્મદામાં વરસાદ
નર્મદા જિલ્લામાં વરસાદી માહોલ જોવા મળ્યો હતો. સાગબારા અને ડેડીયાપાડામાં ધોધમાર વરસાદ વરસતા લોકોમાં ખુશીની લાગણી જોવા મળી. ડેડીયાપાડામાં 3 ઇંચ વરસાદ જ્યારે સાગબારામાં 2.5 ઇંચ વરસાદ નોંધાયો.
દ્વારકામાં વરસાદ
દ્વારકાના કલ્યાણપુર તાલુકામાં ગાજવીજ સાથે મેઘમહેર થઇ. ભાટિયા ગામમાં અડધો ઇંચ વરસાદ વરસતા નીચાણવાળા વિસ્તારો પાણી પાણી થયા હતા. બજારોમાં પણ જળબંબોળની સ્થિતિજોવા મળી હતી.