'તને કોઈ જુએ એ લાયક નહીં રાખું' કહી મોં પર એસિડ ફેંકીને સળગાવી દેવાની ધમકી પતિએ પત્નીને આપતાં મામલો પોલીસ સ્ટેશન સુધી પહોંચ્યો છે. રાણીપ વિસ્તારમાં એક મહિલાને પતિના અવસાન બાદ અન્ય પુરુષ સાથે પ્રેમ સંબંધ બાંધી લગ્ન કરવાનું મોંઘું સાબિત થયું છે. મહિલાનાે બીજા પતિ અવારનવાર તેની સાથે રૂપિયાની માગણી કરતો હતો અને રૂપિયા નહીં આપતાં અંતે તેના પર એસિડ ફેંકવાની ધમકી આપી છે.
વિધવા સાથે પ્રેમસંબધ બાંધી કર્યા લગ્ન
દહેજની માંગણી કરી
માંગણી ન સંતોષાતા એસિડ એટેકની આપી ધમકી
રાણીપ વિસ્તારમાં રહેતી મહિલાએ વાડજ પોલીસ સ્ટેશનમાં ફરિયાદ નોંધાવી છે કે વર્ષ ૨૦૧૦માં તેના પતિના અવસાન બાદ વર્ષ ૨૦૧૯માં શાસ્ત્રીનગરમાં રહેતા યુવક સાથે પરિચય થયો હતો. ત્યારબાદ બંન્ને વચ્ચે પ્રેમ સંબંધ થતાં જાન્યુઆરી ૨૦૨૦માં ઘી કાંટા નજીકના મેરેજ બ્યૂરોમાં લગ્ન કરી લીધાં હતાં. મહિલા તેનાં ઘરે બાળકો સાથે રહેતી હતી. જોકે ૨૨ માર્ચના રોજ લૉકડાઉનને આવી જતાં બંને જણાં એકબીજાને મળી શક્યાં ન હતાં.
દહેજની કરી માંગણી
૧ જુલાઈના રોજ પતિએ પત્નીને ફોન કર્યો હતો અને સોલામાં ૪૨ લાખનું મકાન લેવાનું કહીને તેને જોવા માટે લઈ ગયો હતો. પતિએ પત્નીને કહ્યું હતું કે કરિયાવરમાં કંાઈ લાવી નથી એટલે તારે અત્યારે પાંચ લાખ રૂપિયા આપવા પડશે. પત્નીએ રૂપિયા આપવાનો ઇનકાર કરતાં પતિ તેને માર મારીને ઘરે પરત મૂકી ગયો હતો.
એક્ટિવા લેવા માટે ૫૦ હજારની માગણી કરી
પતિની લાલચ વધી જતાં તેણે પત્ની પાસે એક્ટિવા લેવા માટે ૫૦ હજારની માગણી કરી હતી. પત્નીએ ૧૮મી જુલાઇના દિવસે એકિટવા લેવા માટે પતિને રૂપિયા આપ્યા હતા. ૧૯મી જુલાઇના દિવસે પતિ સાસરીમાં પત્નીને લેવા માટે ગયો હતો. જેમાં તેણે તેને કહ્યું હતું કે તેની સાથે નહીં આવે તો સોસાયટીમાં ઇજ્જત ખરાબ કરી દઇશ. પતિ તેને ગોતા ખાતે આવેલા મકાનમાં લઇ ગયો હતો. જ્યાં એક્ટિવા બાબતે ઝઘડો થયો હતો.
'તને કોઈ જુએ એ લાયક નહીં રાખું'
પતિએ પત્નીને ધમકી આપી હતી કે 'તને કોઈ જુએ એ લાયક નહીં રાખું' અને મોં પર એસિડ ફેંકીને સળગાવી દઇશ. પત્નીને ધમકી મળતાં તેણે વાડજ પોલીસ સ્ટેશનમાં પતિ વિરુદ્ધમાં ફરિયાદ કરી છે. પોલીસે આ મામલે ગુનો દાખલ કરીને તપાસ શરૂ છે.