અમદાવાદના મેમનગરમાં હીટ એન્ડ રનની ઘટના બાદ પોલીસ દ્વારા ધારાસભ્યને બચાવવાનો પ્રયાસ કરવામા આવી રહ્યો છે. શૈલેષ પરમારની ગાડી હોવા છતાં ફરિયાદમાં તેમના નામનો ઉલ્લેખ કરાયો નથી. પોલીસ દ્વારા ફરિયાદમાં માત્ર ગાડીનો નંબર લખવામાં આવ્યો છે.
અમદાવાદના મેમનગરમાં હીટ એન્ડ રનનો મામલો
MLA શૈલેષ પરમારને બચાવવાનો પોલીસનો કારસો
ગાડી શૈલેષ પરમારની હોવા છતાં ફરિયાદમાં ઉલ્લેખ નહી
પોલીસ દ્વારા નોંધવામાં આવેલી ફરિયાદમાં ગાડી નંબર અને અજાણ્યા ડ્રાઈવરનો ઉલ્લેખ કરાયો છે. નિયમ પ્રમાણે ફરિયાદમાં કાર માલિકના નામનો ઉલ્લેખ કરવાનો હોય છે. જોકે પોલીસ દ્વારા ફરિયાદમાં ગાડીના માલિક શૈલેષ પરમારના નામનો ઉલ્લેખ કરાયો નથી. સૂત્રો પાસેથી મળતી માહિતી મુજબ પોલીસે હજુ સુધી શૈલેષ પરમારનો સંપર્ક પણ કર્યો નથી. ઘટનાને આટલો સમય વિત્યા બાદ પણ પોલીસે તપાસ શરૂ કરી નથી.
અમદાવાદના મેમનગરમાં ધારાસભ્યની ગાડીએ અકસ્માત કરતાં 40 વર્ષીય પ્રફુલ્લ પટેલનું મોત થયુ છે. આ ઘટના બાદ પરિવારે MLA શૈલેષ પરમાર પર ગંભીર આક્ષેપ કર્યા છે. ગાડી શૈલેષ પરમારનો ડ્રાઇવર ચલાવી રહ્યો હતો. આ ઘટનાને 12 કલાક વિત્યા બાદ પણ પોલીસે હજુ સુધી પરિવારનો સંપર્ક કર્યો નથી. MLAની ગાડી હોવાથી પોલીસ કાર્યવાહી નથી કરતી હોવાનો પરિવારે આક્ષેપ કર્યો છે.
ઉલ્લેખનીય છે કે ગઇકાલે મેમનગરમાં હિટ એન્ડ રનનો બનાવ સામે આવ્યો હતો. જેમાં પુરપાટ ઝડપે આવી રહેલા કારચાલકે સ્કૂટર ચાલકને અડફેટે લીધો હતો. જેમાં પ્રફુલ પટેલ નામના સ્કૂટરચાલકનું સારવાર દરમિયાન મોત થયું હતું. પ્રફુલ પટેલ તેમના દીકરાને ટ્યુશનથી લેવા જતાં હતાં. 40 વર્ષના પ્રફુલ પટેલને ઉડાવીને કારચાલક ફરાર થઇ ગયો હતો.
આ કાર MLA સ્ટિકરવાળી હતી. પોલીસે GJ01 RX 9972 નંબરની ગાડી સામે કાર્યવાહી હાથ ધરી હતી. સ્કૂટરને અડફેટે લીધા બાદ પણ કાર રોકાઇ ન હતી. આ કાર ધારાસભ્ય (MLA) શૈલેષ પરમારની હતી અને તેમની કારે અકસ્માત સર્જ્યો હતો. શૈલેષ પરમાર દાણીલીમડાના MLA છે. તેમના ડ્રાઇવરે અકસ્માત સર્જ્યો હતો.