વરસાદ અને વાવાઝોડા અંગેની હવામાન વિભાગની આગાહીને લઈને આજે અમદાવાદના અનેક વિસ્તારોમાં મીની વાવાઝોડા જેવી સ્થિતિ વચ્ચે વરસાદ ખાબક્યો હતો.
અમદાવાદના પશ્ચિમ વિસ્તારમાં વરસાદી વતાવારણ
બોડકદેવ, સેટેલાઇટ, એસ.જી હાઇવે પર વરસાદ
પશ્ચિમ વિસ્તારમાં પવન ફૂંકાતા મીની વાવાઝોડું
રાજ્યમાં વરસાદના ત્રીજો રાઉન્ડને લઈને ભારે વરસાદની અને વાવાઝોડાની આગાહી કરવામાં આવી છે. જેને લઈને આજે અમદાવાદમાં પણ બપોર બાદ વતાવરણમાં પલ્ટો આવ્યો હતો અને ત્યારબાદ અનેક વિસ્તારોમાં છૂટોછવાયો વરસાદ પડ્યો હતો. અમદાવાદ શહેરના પશ્ચિમ વિસ્તારમાં મોદી સાંજે ભારે પવન સાથે વરસાદ પડ્યો હતો. શહેરના અખબારનગર, RTO સર્કલ, જુના વાડજ, નવા વાડજ, રાણીપ વિસ્તારમાં ભારે પવન સાથે વરસાદ પડ્યો હતો. તો બોડકદેવ, સેટેલાઇટ, એસ.જી હાઇવે, સરખેજ, સનાથલ, શાંતિપુરા, બાકરોલ સહીતના વિસ્તારોમાં વરસાદ પડતાં વાતાવરણમાં ઠંડક પ્રસરી ગઈ હતી. જેને લઈને લોકોને બફારામાંથી રાહત મળી હતી.
અમદાવાદમાં તોફાની પવન સાથે વરસાદને પગલે રોડ પર ધુમ્મસ જેવુ વાતાવરણ
વધુમાં અમદાવાદના પશ્ચિમ વિસ્તારમાં ભારે પવન પણ ત્રાટકતા મીની વાવાઝોડા જેવી સ્થિતિનું નિર્માણ થયું હતું. સાંજે પાંચ વાગ્યા બાદ આકાશ કાળા ડિબાંગ વાદળોથી ઘેરાયું હતું. ત્યારબાદ તોફાની પવન સાથે વરસાદ તૂટી પડ્યો હતો. જોકે વાતાવરણમાં પલટો આવતા ઘણા લોકો ભિંજાવા પણ નીકળ્યા હતા. પરંતુ તોફાની પવન સાથે વરસાદને પગલે રોડ પર ધુમ્મસ જેવુ વાતાવરણ ઊભું થતાં વાહનચાલકોને પરેશાનીનો સામનો કરવાની નોબત આવી હતી. તો અમુક જગ્યાએ રોડ પર ટ્રાફિક જામ પણ થયા હતા.
અખબનાર નગરથી નવા વાડજ તરફ વૃક્ષ ધરાશાયી, બાઇક ચાલક ફસાયો
શહેરમાં વરસાદને પગલે અખબારનગરથી નવા વાડજ તરફ જવાના રસ્તા પર ઝાડ ધરાશાઈ થયું હતું. અચાનક ઝાડ પડતા એક બાઈક ચાલક ઝાડ નીચે ફસાયો હતો. પોલીસ અને સ્થાનિક દુકાનદારોની મદદથી તેને બહાર કાઢી 108 મારફતે હોસ્પિટલ ખસેડવામાં આવ્યો હતો. સ્થાનિક લોકોનો એવો પણ આક્ષેપ કરવામાં આવ્યો કે અનેક અરજી કરી હતી પણ તંત્ર દ્વારા કોઈપણ કામગીરી કરવામાં આવતી નથી.
ગાજવીજ અને વાવાઝોડા સાથે વરસાદની આગાહી
હવામાન વિભાગ દ્વારા ફરી ગાજવીજ અને વાવાઝોડા સાથે ત્રણ દિવસ માટે ભારે વરસાદની આગાહી કરવામાં આવી છે. અમદાવાદ સહિત સમગ્ર રાજ્યમાં તેની અસર જોવા મળશે. બંગાળની ખાડીમાં સર્જાયેલી વેલમાર્ક લો-પ્રેશર સિસ્ટમ મધ્યપ્રદેશના પૂર્વ ભાગમાં પહોંચી છે. બીજી તરફ સૌરાષ્ટ્રના ઉત્તર-પૂર્વ અરબી સમુદ્ર ઉપર એક નવી લો-પ્રેશર સિસ્ટમ બની છે. આ બંને સિસ્ટમના કારણે આજે રાજ્યભરમાં વરસાદી માહોલ જોવા મળ્યો હતો. મહત્વનું છે કે કચ્છ, દાહોદ, પંચમહાલ, મહીસાગરમાં ભારેથી અતિભારે જ્યારે અમદાવાદ, ગાંધીનગર, ખેડા, વડોદરા, અરવલ્લી, રાજકોટ, જામનગર, દ્વારકા, સુરત, તાપી, નવસારી, ડાંગ, સાબરકાંઠા, બનાસકાંઠા, પાટણ, મહેસાણા, વલસાડમાં પણ વરસાદની આગાહી કરાઈ છે.