કાતિલ પવનનો 'કોલ્ડ અટેક' ઉત્તરભારતની હિમવર્ષાથી ગુજરાત બન્યું ઠંડુગાર

અમદાવાદ: રાજ્યમાં ઠંડીનું જોર છેલ્લા 5 દિવસથી યથાવત છે. હજુ પણ આગામી 2 દિવસ સુધી ઠંડીનું જોર રહેશે તેવી હવામાન વિભાગે આગાહી વ્યક્ત કરી છે. ઉત્તર ભારતમાં હિમવર્ષાને કારણે
કોલ્ડવેવની સ્થિતિ યથાવત રહેશે. 

વાત સૌથી ઓછા તાપમાનની કરીએ તો ડીસા રાજ્યનું સૌથી ઠંડુ શહેર છે. ડીસામાં ઠંડીનો પારો ગગડીને 7 ડિગ્રીએ પહોંચ્યો છે. તો અમદાવાદ રાજકોટ અને સુરતમાં 11 ડિગ્રી તાપમાન છે. જ્યારે સુરતમાં 14 ડિગ્રી તાપમાન છે. ઠંડીથી બચવા લોકો ગરમ વસ્ત્રોનો સહારો લઇ રહ્યાં છે. તો સ્વાસ્થ્ય પ્રેમી લોકો સવારમાં ચાલવાનું પસંદ કરી રહ્યાં છે. 

નલિયા બન્યું ઠંડુગાર
કોલ્ડસીટી ગણાતા નલિયા સતત રાજ્યનું સૌથી ઠંડું શહેર બની રહ્યું હતું. માંડવી ભુજ કંડલા એરપોર્ટમાં તાપમાનનો પારો ગગડતાં લોકો કાતિલ ઠંડી અનુભવી રહ્યા છે. એકાએક ઠંડીનો પારો ગગડીને નીચો જતાં કચ્છના લોકો ઠંડીથી ઠુંઠવાઇ ગયા હતા. 

આ સાથે જ સમગ્ર કચ્છ જીલ્લામાં કાતિલ ઠંડીનો લોકોએ અહેસાસ કર્યો હતો. કચ્છમાં પડી રહેલી તીવ્ર ઠંડીને કારણે જનજીવન પર અસર પડી રહી છે. ભુજ સાથે કચ્છના નલિયા માંડવી અને કંડલા એરપોર્ટ પર ઠંડીનું મોજું ફરી વળતા કચ્છવાસીઓએ અસહ્ય ઠંડી સામનો કરવો પડ્યો હતો. 

હવામાન વિભાગની આગાહી
હવામાન વિભાગના જણાવ્યા અનુસાર હજુપણ આગામી દિવસોમાં ઠંડીનો ચમકારો યથાવત રહે તેવી શક્યતા છે.  જેના પગલે હજીપણ આગામી દિવસોમાં કચ્છ લોકોને કડકડતી ઠંડી સામનો કરવો પડશે. બીજું બાજુ કચ્છના લોકો પણ વહેલી સવારે અને મોડી સાંજ પછી લોકો જરૂરી કામ સિવાય બહાર નીકળવાનું ટાળી રહ્યા છે.