કાર્યવાહી / અમદાવાદઃ ડમી ઉમેદવારથી પરીક્ષા પાસ કરીને સરકારી નોકરી તો મેળવી પરંતુ આવી રીતે ફૂટ્યો ભાંડો

• સરકારી નોકરીની પરીક્ષામાં ડમી ઉમેદવાર
• ડોક્યુમેન્ટની બાયોમેટ્રીક તપાસ વખતે ભાંડો ફુટ્યો
• સુપ્રિટેન્ડેન્ટની પોસ્ટ પર નોકરી લેવા જતા પહેલા જ ધરપકડ થઇ

રવિ મીણા નામનો યુવક જે અમદાવાદમાં પાલડી ખાતે આવેલા સેન્ટ્રલ વેરહાઉસ કોર્પોરેશનની ઓફિસમાં સરકારી નોકરીમાં જોડાય તે પહેલા તેની ધરપકડ કરવામાં આવી છે. થોડા સમય પહેલા યોજાયેલી સેન્ટ્રલ વેરહાઉસની સરકારી પરિક્ષામાં આરોપી એ અન્ય યુવક પાસે પરિક્ષા અપાવી હતી. જેમાં પાસ થતા પોતાને ભાવનગરમાં સુપ્રિટેન્ડેન્ટની પોસ્ટ મળી. પરંતુ પાલડીમાં ઓફિસમાં ડોક્યુમેન્ટમાં કોઇ અલગ વ્યક્તિનો ફોટો હોવાથી બાયોમેટ્રીક ચેક કરતા મામલો સામે આવ્યો. જેથી પરિક્ષા આપનાર અને નોકરી માટે આવનાર વ્યક્તિ અન્ય કોઇ હોવાની શંકા જતા સેન્ટ્રલ વેરહાઉસનાં મેનેજરે પાલડી પોલીસ સ્ટેશનમાં ફરિયાદ નોંધાવતા પોલીસે આ યુવકની અટકાયત કરી છે.

સેન્ટ્રલ વેરહાઉસ ખાતે ડોક્યુમેન્ટ તપાસતા કૌભાંડ થયુ હોવાનુ સામે આવ્યુ છે. જેમા કુલ 6 પોસ્ટની ભરતી માટે પરિક્ષા યોજાઈ હતી. તેમાંથી 5 જગ્યાની ભરતી યોગ્ય રીતે થઈ પરંતુ છેલ્લી ભરતીમાં આ મામલો સામે આવ્યો. આરોપી રવિ મીણાની તપાસ કરતા સામે આવ્યુ કે પરિક્ષામાં આરોપીએ રાહુલ મીણા નામનાં શખ્સને 5 લાખ રૂપિયા આપીને પોતાના નામે પરીક્ષા અપાવી હોવાનુ સામે આવ્યુ હતું.

રવિ મીણાની ધરપકડ બાદ હવે પોલીસે રાહુલ મીણાની શોધખોળ હાથ ધરી છે. રાહુલ ભણવામાં હોસિયાર હોવાથી પરિક્ષા આપવા માટે તે આવ્યો હતો. જોકે ભરતીમાં રવિ મીણા નોકરી માટે પહોંચ્યો હતો. જેથી બન્નેની ગુનામાં સંડોવણી સામે આવતા પોલીસે તપાસ હાથ ધરી છે.