મિશન મિલિયન ટ્રી / સમગ્ર મધ્ય ઝોન બન્યું લીલોતરી વિહોણુ, અમદાવાદનો વર્લ્ડ હેરિટેજ સિટીનો દરજ્જો જોખમાયો

કોટ વિસ્તાર જેવા ગીચ વસ્તી ધરાવતા મધ્ય ઝોનમાં કુલ ર૪ હજાર વૃક્ષ પણ નથી. તંત્રના 'મિશન મિલિયન ટ્રી' હેઠળ મધ્ય ઝોનમાં પ્લોટના અભાવે સમ ખાવા એક અર્બન ફોરેસ્ટ વિકસિત થવાનું નથી. 

હેરિટેજ સિટીનો આ દરજ્જો જોખમાયો

જોકે મધ્ય ઝોનમાં આડેધડ રીતે ગેરકાયદે બાંધકામ થતાં હોઈ શહેરનો હેરિટેજ સિટીનો આ દરજ્જો જોખમાયો છે, પરંતુ સમગ્ર મધ્ય ઝોનમાં ક્યાંય લીલોતરી પણ રહેવા પામી નથી. સાત વર્ષ જૂની વર્ષ-ર૦૧રની વૃક્ષ ગણતરી મુજબ પણ મધ્ય ઝોનમાં કુલ ર૪ હજાર વૃક્ષ સુધ્ધાં નથી. 

લીલાંછમ વૃક્ષની ભારે તંગી

રાજ્ય સરકારના વન વિભાગ દ્વારા છેક ર૦૧રમાં સમગ્ર શહેરમાં આવેલા વૃક્ષની ગણતરી હાથ ધરાઇ હતી. તે વખતે સમગ્ર શહેરમાં ૬.૧૬ લાખથી વધુ વૃક્ષ નોંધાયાં હતાં, પરંતુ કોટ વિસ્તાર જેવા ગીચ વસ્તી ધરાવતા મ્યુનિ. કોર્પોના મધ્ય ઝોનમાં તે વખતે પણ લીલાંછમ વૃક્ષની ભારે તંગી જણાઇ આવી હતી. મધ્ય ઝોનની વૃક્ષ ગણતરીના વર્ષ ર૦૧રના આંકડા મુજબ માંડ ર૩,પ૧૮ વૃક્ષ બચ્યાં હતાં, જેમાં ૧,૧૦૪ વડ, ર,પ૬૧ પીપળા, પ,ર૩પ લીમડા, ૪,૦૭ર આસોપાલવ અને દેશી આંબાના ફક્ત ર૮૧ વૃક્ષ જેવાં ગણ્યાગાંઠ્યા વૃક્ષ વન વિભાગે નોંધ્યાં હતાં. 

વૃક્ષોનું પણ આડેધડ નિકદંન

છેલ્લાં સાત વર્ષમાં બિલ્ડર માફિયાઓની દાદાગીરી અનહદ રીતે વધતાં અને તેમાં કેટલાક ભ્રષ્ટ પ્રજાના પ્રતિનિધિ અને મ્યુ‌નિ. અધિકારીઓનો સહકાર મળતાં આજે મોટા ભાગના કોટ વિસ્તારમાં વેપારીકરણ થયું છે, જેનાથી સાત વર્ષ જૂનાં હયાત વૃક્ષોનું પણ આડેધડ નિકદંન થઇ રહ્યું હોઇ હવે ૧૦ થી ૧પ હજાર વૃક્ષ પણ શેષ બચ્યાં હશે કે કેમ એ મોટો યક્ષપ્રશ્ન છે.

ગ્રીન સિટીનો નવો અભિગમ

બીજી તરફ સત્તાવાળાઓએ વર્તમાન ચોમાસામાં શહેરભરમાં દસ લાખ નવાં નાના-મોટા રોપાનું વાવેતર કરીને ગ્રીન સિટીનો નવો અભિગમ જાહેર કર્યો છે, જે હેઠળ તંત્રએ જાહેરમાં પ૧ પ્લોટ શોધી કાઢી ત્યાં ૧૦ થી ૧ર ફૂટ ઊંચાઇના આશરે ૧૦,૦૦૦ રોપા વાવીને 'અર્બન ફોરેસ્ટ'નો નવો સંકલ્પ અપનાવ્યો છે. 

'મિશન મિલિયન ટ્રી' અભિયાનમાંથી મધ્ય ઝોનની બાદબાકી

જોકે આમાં આઘાતજનક બાબત એ છે કે આ પ૧ અર્બન ફોરેસ્ટની યાદીમાં મધ્ય ઝોનમાં એક પણ અર્બન ફોરેસ્ટનો સમાવેશ થતો નથી, કેમ કે મધ્ય ઝોનમાં તંત્ર પાસે કોઇ જગ્યા નથી. આમ, 'મિશન મિલિયન ટ્રી' અભિયાનમાંથી મધ્ય ઝોનની આપોઆપ બાદબાકી થઇ ગઇ છે.