અમદાવાદના મણીનગર વિસ્તારમાં આવેલી જીએનસી સ્કૂલના વિદ્યાર્થીઓએ આઈ-બીન નામનું એક ઈનોવેશન તૈયાર કર્યું છે. આ ઈનોવેશનને જો સરકાર દ્વારા અપ્લાય કરવામાં આવે તો ગણતરીના દિવસોમાં અમદાવાદામાં થતી કચરાની સમસ્યાઓનો અંત આવે તેમ છે. અમદાવાદમાં કચરાની સમસ્યાને હલ કરવા માટે રાત દિવસ મહેનત કરી વિદ્યાર્થીઓએ કરેલા ઈનોવેશનને ચારે તરફથી પ્રોત્સાહન મળી રહ્યું છે. શું છે આ આઈ-બીન?
અમદાવાદમાં આજે પીરાણાની ડમ્પ સાઈટનો નાશ કરવા અને તેને વ્યવસ્થિત કરવા માટે દર વર્ષે કોર્પોરેશન દ્વારા કરોડો રુપિયાનો ખર્ચ કરવામાં આવે છે છતાં તેનો અંત આવતો નથી. પરંતુ જો આ ડમ્પ સાઈટ પર આવતો કચરો પહેલેથી જ અલગ અલગ કેટેગરીમાં આવતો થાય તો કોર્પોરેશનના કરોડો રુપિયા બચી જાય અને શહેરીજનોને કચરાના ઢગલાના લીધે પડતી સમસ્યાઓનું પણ નિવારણ આવે. પરંતુ આ શક્ય ત્યારે જ થાય જ્યારે લોકો સ્વેચ્છાએ ભીનો અને સુકો કચરો તેમજ પ્લાસ્ટીક અલગ અલગ કરી કચરાપેટીમાં નાંખવાનું શરુ કરે.
વિદ્યાર્થીઓએ તૈયાર કર્યું આઈ-બીન ઈનોવેશન ડસ્ટબીન
આ શરુઆત માટે અમદાવાદના વિદ્યાર્થીઓએ તૈયાર કર્યું છે આઈ-બીન ઈનોવેશન ડસ્ટબીન. જેમાં સફાઈ કામદાર સોસાયટીમાંથી કચરો એકત્ર કરી સોસાયટીની બહાર ભીનો અને સુકો કચરો અલગ અલગ કરીને નાંખશે તો તેના ખાતામાં ઓટોમેટિક પૈસા જમા થશે અને ડમ્પ સાઈટ પર વપરાતા પૈસા બચી સીધા સફાઈકામદારના ખાતામાં જશે. તો આવો જાણીએ કઈ રીતે કરશે આ કાર્ય.
આઈ-બીન ઈનોવેશનના બે ફાયદા
આ ઈનોવેશનના મુખ્યત્વે બે ફાયદા છે એક તો જે કામદાર કચરો સાફ કરે છે તેને કચરો અલગ અલગ કરીને નાંખવાથી પૈસા મળશે અને તે પૈસા ઓટોમેટીક બેન્કના ખાતામાં જશે અને બીજો એ ફાયજો થશે કે અલગ અલગ કચરો હોવાથી કોર્પોરેશનને ઘણી રાહત મળશે અને તેને કમ્પોઝ કરવામાં સમય અને પૈસા નહીં બગાડવા પડે. આ ઈનોવેશન માટે સ્કૂલના આ વિદ્યાર્થીઓએ ઘણો સમય સુધી સંશોધન કર્યું ત્યારે તેઓને ક્લીક થયુ કે અત્યારે સૌથી મોટી સમસ્યા કચરાની છે અને તેનો સરળ રસ્તો કોઈ પાસે નથી ત્યારે આ વિદ્યાર્થીઓએ ઈનોવેશનની સાથે સાથે આના પર એક ગીત પણ બનાવ્યું.
જીએનસી સ્કૂલના વિદ્યાર્થીઓ હંમેશા અવ્વલ
રાજ્ય સરકાર અને કેન્દ્ર સરકારની સહાયથી અનેક સ્કૂલોમાં અટલ ટીંન્કરીંગ લેબનું નિર્માણ કરાયુ છે અને આ લેબમાં વિદ્યાર્થીઓને જે નવા વિચાર આવે તેના પર તેઓએ સંશોધન કરવાનું હોય છે અને આ સંશોધન જીએનસી સ્કૂલના વિદ્યાર્થીઓ હંમેશા અવ્વલ રહ્યા છે. જીએનસીના વિદ્યાર્થીઓએ આના અગાઉ પણ અનેક એવા પ્રોજેક્ટ બનાવ્યા જે રાજ્યકક્ષાએ અનેક વખત પ્રથમ આવ્યા હતા.