શહેરના કૃષ્ણનગર વિસ્તારમાં એક યુવતીને તેની સાથે જ નોકરી કરતા યુવાનને એસિડ ફેંકવાની ધમકી આપતાં મામલો પોલીસ સ્ટેશન સુધી પહોંચ્યો છે. યુવતી યુવકને ભાઇ સમજીને તેની સાથે વાતચીત કરતી હતી.
અમદાવાદની અનોખી ઘટના
ભાઈ સમજી જેની સાથે વાત કરતી હતી તેણે જ એસિડ એટેકની ધમકી આપી
યુવતીએ વાત કરવાનું બંધ કરતાં યુવક છંછેડાયો
જોકે યુવક તેના એક તરફી પ્રેમમાં પાગલ હતો. યુવકે યુવતી સાથે ફ્રેન્ડશિપ કરવા માટેનું દબાણ કર્યું હતું. જોકે યુવતીએ ઇનકાર કરતાં જ યુવકે તેના ચહેરા પર એસિડ ફેંકવાની ધમકી આપી હતી.
કૃષ્ણનગર પોલીસ સ્ટેશનમાં ફરિયાદ નોંધાઇ
કૃષ્ણનગર વિસ્તારમાં રહેતી એક યુવતીએ કૃષ્ણનગર પોલીસ સ્ટેશનમાં ફરિયાદ આપી છે કે, તેની જ ઓફિસમાં સુપરવાઇઝર તરીકે નોકરી કરતા પ્રવીણ રાઠોડ નામના યુવકને ભાઇ સમજીને તે તેની સાથે વાતચીત કરતી હતી.
મોઢા પર એસિડ ફેંકવાની આપી ધમકી
પ્રવીણ અવારનવાર યુવતીને મેસેજ કરતો હતો અને ફોન પર વાત કરીને તેની સાથે ફ્રેન્ડશિપ કરવાનું દબાણ કરતો હતો. પરંતુ યુવતીએ ના પાડતાં જ પ્રવીણે તેને ઓફિસ બહાર રોકીને ધમકી આપી હતી કે, જો તું મારી સાથે ફ્રેન્ડશિપ નહીં કરે તો તારા મોઢા પર એસિડ ફેંકીશ.
પ્રવીણ વારંવાર અન્ય મોબાઇલ નંબર પરથી મેસેજ કરીને યુવતીને હેરાન પરેશાન કરતો
ત્યારબાદ યુવતીએ પ્રવીણ સાથે વાતચીત કરવાનું બંધ કરી દીધું હતું અને તેનો નંબર પણ બ્લોક કરી દીધો હતો. પ્રવીણ વારંવાર અન્ય મોબાઇલ નંબર પરથી મેસેજ કરીને યુવતીને હેરાન પરેશાન કરતો હતો. એટલું જ નહીં પ્રવીણે યુવતીનાં ફોટો મોર્ફ કરીને વાયરલ કર્યો હતો. પ્રવીણની હેરાનગતિ વધી જતાં અંતે યુવતીએ સમગ્ર ઘટનાની જાણ પોલીસને કરી હતી. પોલીસે પ્રવીણ વિરુદ્ધમાં ગુનો દાખલ કરી તપાસ શરૂ કરી છે.