અમદાવાદ / રાત્રે SG હાઈવે પર એકલા નીકળતા પહેલા ચેતી જજો, નહીંતર છરીને અણીએ લૂંટાઈ જશો, 4 આરોપીની ધરપકડ

• અમદાવાદમાં ઘાડપાડુ ગેંગ ઝડપાઈ 
• હાઈવે પર જતા લોકોને ટાર્ગેટ કરતા 
• 6 ગુનાનો ભેદ ઉકેલાયો 

શહેરના એસ જી હાઈવે, અમદાવાદ જિલ્લો અને ગાંધીનગર જિલ્લામાં એકલ દોકલ માણસોને ટાર્ગેટ કરી ઘાડ- લુંટ કરતી ટોળકી ઝડપાઈ છે. અમદાવાદ ઝોન 7 એલસીબીએ 4 આરોપીની ધરપકડ કરી ગુનામાં વપરાતુ બાઈક અને મુદ્દામાલ કબ્જે કર્યો છે. જોકે આ ગેંગના ફરાર અન્ય બે આરોપીની શોધખોળ હાથ ધરી છે. આરોપીની પૂછપરછમાં 6 ગુનાનો ભેદ ઉકેલાયો છે. તો અન્ય વઘુ ગુનાની કબૂલાત પણ કરી છે. 

કેવી રીતે લૂંટ આપતા અંજામ?
અમદાવાદ ઝોન 7 એલસીબીની કસ્ટડીમાં રહેલી આ ધાડપાડુ ગેંગના 4 આરોપીના નામ પ્રકાશ ઉર્ફે નેપાળી ચંદ, રવિ રાજપૂત, વિકાસ રાજપુત, મત્સ્યેન્દ્રસિંઘ મિણા છે. આ 4 આરોપી શહેરના એસજી હાઈવે ગાંધીનગરના ગ્રામ્ય વિસ્તાર, અમદાવાદ જિલ્લામાં લૂંટ અને ધાડને અંજામ આપતા હતા.. આરોપી એકલા જતા રાહદારીને રોકી તેને છરી બતાવી લુંટી લેતા હતા. અને જો કોઈ પ્રતિકાર કરે તો છરી વડે હુમલો પણ કરતા હતા. આરોપીએ થોડા જ સમયમાં 6 લુંટ અને ધાડના ગુનાને અંજામ આપ્યો હતો. જેમાં બે ઈસમો પર છરી વડે હુમલો પણ કર્યો હતો. 

આરોપીઑનો ગુનાહિત ઈતિહાસ
આરોપી અલગ અલગ રાજ્યના વતની છે. એક નેપાળ, ઉત્તરપ્રદેશ, મધ્યપ્રદેશના વતની છે અને અમદાવાદના ચાંદખેડા વિસ્તારમાં કેટરીંગનુ કામ કરતા હતા. તેની સાથે જ જ્યારે રાતે તેઓ ફ્રી હોય તે સમયે બાઈક લઈ લોકોની રેકી કરતા અને લુંટ પણ કરતા હતા. આ ગેંગના બે આરોપી હજી ફરાર છે. જેમાં કુલદિપ સિંહ તોમર અને સચિન ફરાર છે. તો બીજી તરફ ઝડપાયેલ આરોપી રવિ રાજપુત અગાઉ પણ લુંટના ગુનામાં ઝડપાયો હતો. જે બાદ આ ગેંગ સાથે મળી લુંટને અંજામ આપી રહ્યો હોવાનુ સામે આવ્યુ છે. 

લૂંટ કરી રૂપિયાનો ભાગ પાડી લેતા
ઝડપાયેલા 4 આરોપીની પુછપરછ કરતા સામે આવ્યુ હતુ કે તેઓ એ અડાલજ,ઈન્ફોસિટી, સરદારનગર, આનંદનગર, નરોડા અને ચાંદખેડામાં લુંટને અંજામ આપ્યો હતો.  આરોપી લુંટ કર્યા બાદ તાત્કાલિક રૂપિયાનો ભાગ પાડતા અને અલગ અલગ રસ્તે ફરાર થઈ જતા હતા. જેથી પોલીસ પકડથી બચી જતા હતા. જોકે હવે આ ગેંગની ધરપકડ વધુ ગુનાના ભેદ ઉકેલાય તેવી શક્યતા સેવાઇ રહી છે.