એક સરખો જ રસ હોવો, એક સરખું જ લક્ષ્ય હોવું અને વળી એક જ પરિવારમાં રહેતા હોવું આવો સંયોગ ભાગ્યે જ સર્જાય છે. પરંતુ અમદાવાદમાં એક એવો પરિવાર વસે છે જેમાં માતા પિતા સાથે તેમના બન્ને પુત્રો પણ એથ્લેટિક સ્પર્ધાઓમાં પોતા પોતાની ક્ષમતાનો પરિચય આપી ચૂક્યા છે.
આવો સંયોગ ભાગ્યે જ સર્જાય
આખો પરિવાર રમતવીર!
ખેલ મહાકુંભમાં જોવા મળ્યો દબદબો
અદમ્ય જોશ,રસ અને સંપૂર્ણ ચુસ્તી સાથે એથ્લેટિક સ્પર્ધાઓની પ્રેક્ટિસ કરી રહેલા આ બન્ને યુવાનોને જોઈને આપને એમ લાગશે કે બન્ને મિત્રો હશે અને સાથે જ પ્રેક્ટિસ કરતા હશે. પરંતુ એવુ નથી. હકીકતમાં આ બન્ને યુવાનો સગાભાઈઓ છે. બન્નેનો રસ એક સરખો છે અને બન્નેનું લક્ષ્ય પણ એક સરખું જ છે. રેડ યેલો ટીશર્ટ પહેરેલા યુવાનું નામ રાજવીર છે. જ્યારે બ્લૂ ટીશર્ટ પહેરેલા યુવાનનું નામ રાજદીપ છે.
ગુજરાત આટર્સ એન્ડ સાયન્સ કોલેજમાં રાજવીર અને રાજદીપ કરે છે અભ્યાસ
ગુજરાત આટર્સ એન્ડ સાયન્સ કોલેજમાં અભ્યાસ કરતાં રાજવીર અને રાજદીપ બન્ને ભાઈ એથ્લેટ છે, તાજેતરમાં 11ડિસેમ્બરે ગુજરાત યુનિવર્સીટી ખાતે આંતર કોલેજ સ્પર્ધા યોજાઈ હતી. આંતરકોલેજ સ્પર્ધામાં રાજવીરે 100 મીટર દોડ 10.68 સેકન્ડમાં પૂરી કરી હતી અને 200 મીટરમા 21.78 સેકન્ડમા પૂર્ણ કરીને નવો રેકોર્ડ સ્થાપ્યો છે. જ્યારે રાજદીપે બીજા ક્રમે દોડ પૂરી કરીને દ્વિતિય ક્રમ જાળવી રાખ્યો છે. આ વર્ષે રાજવીરે પટિયાલા ખાતે ઇન્ડિયન ગ્રાન્ડ પીક્સ ઓપનમાં 100મીટર દોડ 10.87 સેકન્ડમાં પૂર્ણ કરી હતી. રાજદીપે ઇન્ડિયન સિલ્વર મેડલ પણ મેળવ્યો છે.
સમગ્ર પરિવાર છે એથ્લેટ
માત્ર રાજવીર અને રાજદીપ જ નહીં પરંતુ આ બન્ને યુવાનોના માતા-પિતા પણ અને દાદા પણ પોત પોતાના જમાનમાં એથ્લેટ રહી ચૂક્યા છે. આમને મળો આ છે હરપાલસિંહ વાઘેલા. હરપાલસિંહ વાઘેલા રાજવીર અને રાજદીપના પિતા છે. હરપાલ સિંહ વાઘેલા પોલીસ ખાતામાં એએસઆઈ તરીકે ફરજ બજાવે છે. પોતાના બન્ને પુત્રો ઓલિમ્પિક ક્વોલિફાય થાય અને દેશનું નામ રોશન કરે તેવુ સપનું હરપાલસિંહ સેવી રહ્યા છે. કેમકે એથ્લેટિક્સમાં દેશનું નામ રોશન કરવું તે એક સમયે તેમનું પણ સપનુ હતું. પરંતુ પરિવારની જવાબદારી વચ્ચે તે સપનું પૂર્ણ ન થઈ શકયું. તેમનું આ સપનું પોતાના પુત્રો પૂરું કરે તેવી તેમની ઈચ્છા છે. અને આ માટે તેઓ પોતાના પુત્રોના પ્રેક્ટિસ સેશનમાં સાથે જોડાય છે. તેઓ વહેલી સવારે ચાર વાગ્યે જાગીને પુત્રોને પ્રેક્ટીસ કરાવે છે. તેમને વિશ્વાસ છે કે એક દિવસ તેમની મહેનત રંગ લાવશે.
એથ્લેટિક ક્ષેત્રે દેશનું નામ રોશન કરે તેવી તમામની ઇચ્છા
તાજેતર રાજ્યકક્ષાનો ખેલમહાકુંભ સંપન્ન થયો છે. જેમાં રાજવીર સિંહે 100 મીટર અને 200 મીટર. દોડમાં રાજ્યમાં પ્રથમ નંબર મેળવ્યો છે. સતત બે વર્ષથી રાજવીર ખેલ મહાકુંભમા પ્રથમ નંબર મેળવી રહ્યા છે. રાજવીર અને રાજદીપ સાથે સાથે પિતા હરપાલ સિંહે પણ 100 જેટલી સિદ્ધિ હાંસલ કરી ચૂક્યા છે. આ મેડલના ઝુમખા અને આ ટ્રોફિઓની ભરમાર તેના સાક્ષી પૂરી રહ્યા છે. તમને એ જાણીને નવાઈ લાગશે કે હરપાલસિંહના પિતા પણ તેમના જમનાના એથ્લેટ હતા. રાજવીરસિંહ અને રાજદીપસિંહના માતા ગીતાબા પણ તેમના જમાનામાં એથ્લેટ રહી ચૂક્યા છે. હવે રાજવીર અને રાજદીપ માટે તેમના માતા પિતા જ પ્રેરણાસ્રોત બની ચૂ્ક્યા છે. ત્યારે બન્ને એથ્લેટિક ક્ષેત્રે દેશનું નામ રોશન કરે તેવી માત્ર તેમના માતા પિતા જ નહીં સમગ્ર રાજ્ય અપેક્ષા રાખી રહ્યો છે.