સગીરાને સાબરમતી રેલ્વે સ્ટેશન પાસે અવાવરુ જગ્યાએ લઈ જનાર નકલી SRP જવાનની રેલવે પોલીસે ધરપકડ કરી છે.
સગીરાને દુષ્કર્મ કરવાના ઈરાદે લઈ જતો હતો
નકલી SRP જવાનની રેલવે પોલીસે ધરપકડ કરી
એક કિલોમીટર જેવુ ભાગીને બેભાન થઈ ગઈ હતી
અમદાવાદનાં કાલુપુર રેલવે સ્ટેશન પર 26મી જાન્યુઆરીએ યુપીથી ભાગીને આવેલા સગીર યુવક યુવતીને માસ્કનાં નામે અટકાવી 500 રૂ. દંડ ભરવો પડશે તેમ કહીને અલગ અલગ જગ્યાઓએ ફેરવી સગીર યુવતીની સાથે દુષ્કર્મ કરવાના ઈરાદે યુવકને માર મારી ભગાવી સગીરાને સાબરમતી રેલ્વે સ્ટેશન પાસે અવાવરુ જગ્યાએ લઈ જનાર નકલી SRP જવાનની રેલવે પોલીસે ધરપકડ કરી છે.
શું છે ઘટના?
સમગ્ર ઘટનાની વાત કરીયે તો યુપીનાં ફિરોઝાબાદથી ભાગીને અમદાવાદનાં સારંગપુર આવેલા સગીર યુવક યુવતીને SRP નાં યુનિફોર્મમાં રહેલા શખ્સે માસ્કના નામે અટકાવ્યા હતા. બન્ને સગીરોને પોલીસમાં સોંપી દેવાનુ કહીને ગેરકાયદેસર અટકાયત કરીને, સગીર યુવકને ડરાવી મારમારી તેની પાસેથી 500 રુપિયા કાઢી લઈ તેને ગોળી મારી જાનથી મારી નાખવાની ધમકી આપી રેલવે સ્ટેશન પરથી ભગાડી યુવક યુવતીને કલોલ લઈ ગયો હતો જ્યાં રેલવે પોલીસ હોવાનો ભય લાગતા આ શખ્સે સગીર સગીરાને રિક્ષામાં બેસાડી અમદાવાદ લાવ્યો હતો અને અમદાવાદમાં કાલુપુર રેલ્વે સ્ટેશન પાસેથી સગીર યુવકને માર મારીને તેને ત્યાંથી ભગાડી દીધો હતો.
એક કિલોમીટર જેવુ ભાગીને બેભાન થઈ ગઈ હતી
સગીર યુવતીને આ નકલી પોલીસે સગીરાનો પ્રેમી પોલીસ પકડી ગઈ છે તેને છોડાવવા સાબરમતી જવુ પડશે તેમ કહીને સાબરમતી રેલવે સ્ટેશને રિક્ષામાં બેસાડી લઈ ગયો હતો અને રાતનાં સમયે અંધારાનો લાભ લઈ રેલ્વે યાર્ડ પાસે લઈ જતો હતો. તે સમયે સગીરાને આ શખ્સ પોતાની સાથે કઈંક ખોટુ કરશે તેવો અંદાજ આવી જતા તે ત્યાંથી ભાગી હતી અને એક કિલોમીટર જેવુ ભાગીને બેભાન થઈ ગઈ હતી.
બનાસકાંઠાનાં અશોક ચૌધરી નામના શખ્સને પકડી પાડ્યો
રેલવે પોલીસને આ સગીર યુવતી અંગે જાણ થતા તેની પુછપરછ કરી હતી અને બાદમા આ પોલીસની વર્ધીમાં રહેલા શખ્સની શોધખોળ હાથ ધરી હતી.. પોલીસે સીસીટીવી ફુટેજ અને ટેક્નીકલ એનાલીસીસના આધારે મહેસાણાનાં રાધનપુર ચોકડી પાસેથી બનાસકાંઠાનાં અશોક ચૌધરી નામના શખ્સને પકડી પાડ્યો છે.
સગીરાને દુષ્કર્મ કરવાના ઈરાદે લઈ જતો હતો
આરોપી છેલ્લાં એક મહિનાથી અમદાવાદ સહિત અલગ અલગ રેલવે સ્ટેશન પર SRP જવાન જેવા કપડા પહેરીને માસ્કનાં નામે લોકો પાસે તોડ કરતો હતો ત્યારે તેણે આ બન્ને સગીર મળતા તેઓ પાસેથી માસ્કના નામે પૈસાની માંગણી કરી હતી જોકે સગીરોએ પોતે ભાગીને આવ્યા હોવાનુ કહેતા આ શખ્સે તેઓને અમદાવાદનાં કાલુપુરથી કલોલ લઈ ગયો અને ત્યાથી પાછો અમદાવાદ આવ્યો અને સાબરમતી રેલવે સ્ટેશન પાસે આવેલી અવાવરુ જગ્યાએ સગીરાને દુષ્કર્મ કરવાના ઈરાદે લઈ જતો હતો.
આરોપીની ધરપકડ કરી તપાસ હાથ ધરી
જોકે સગીરાને શંકા જતા તે ભાગી ગઈ હતી અને પોલીસને આ અંગે જાણ થતા પોલીસે આરોપીની ધરપકડ કરી તપાસ હાથ ધરી છે..પોલીસની તપાસમાં સામે આવ્યુ કે આરોપી અશોક ચોધરીનો પિતરાઈ ભાઈ SRP જવાન છે જેથી આરોપી પોલીસની કામગીરીથી જાણકાર હતો. હાલ તો પોલીસે આ શખ્સ પોલીસની વર્દી ક્યાથી લાવ્યો અને કેટલા લોકો પાસેથી માસ્કના નામે પૈસાનો તોડ કર્યો તે દિશામાં તપાસ હાથ ધરી છે.