ક્રાઈમ / અમદાવાદના કાગડાપીઠ પોલીસ સ્ટેશનમાં આરોપીએ એવું કર્યું કે CCTVમાં ઘટના જોઈ ચોંકી જશો

• આપઘાતની સમગ્ર ઘટના સીસીટીવી કેમેરામાં કેદ
• પોલીસ સીસીટીવીનું મોનિટરિંગ કરતી હોત તો કદાચ જીવ બચાવી શકાયો હોત
• પરિવારજનોનો પોલીસ પર ઢોર માર માર્યાનો આક્ષેપ

મળતી માહિતી મુજબ રાયપુર હીરાલાલની ચાલીમાં રહેતા ૧૮ વર્ષિય જિગર રમણભાઇ સોલંકી વિરુદ્ધમાં પડોશીઓએ કાગડાપીઠ પોલીસ સ્ટેશનમાં ફરિયાદ કરી હતી અને ૧૦૦ નંબર પર ફોન કર્યો હતો. પડોશીની ફરિયાદના આધારે પોલીસે જિગરની સીઆરપીસીની કલમ ૧૫૧ મુજબ અટકાયતી પગલાં ભરીને લોકઅપમાં પૂરી દીધો હતો.

જ્યાં તેને ચાદરને લોકઅપના સળિયા પર બાંધીને ગળે ફાંસો ખાઇને આપઘાત કરી લીધો હતો. સમગ્ર મામલો સીસીટીવી કેમેરામાં કેદ થયો છે. સીસીટીવી જોતાં માલૂમ પડે છે કે યુવક આપઘાત કરવા માટે અલગ અલગ પેંતરા અજમાવે છે. જોકે તે સફળ થયો નહીં ત્યાર બાદ તેણે ચાદર વડે ગળે ફાંસો ખાઇને આપધાત કરવાનો પ્લાન બનાવ્યો હતો. લોકઅપમાં સીસીટીવી કેમેરા હતા જેમાં સમગ્ર ઘટના કેદ થઇ છે. 
 

રાત્રે દસ વાગ્યા બાદ જિગરે ગળે ફાંસો ખાઇને મોતને વહાલું કર્યું હતું. ચોંકાવનારી વાત એ છે કે જિગરના શરીર પર કોઇ ઇજાનાં નિશાન નથી. જેથી તે વાત તો નક્કી થાય છે કે પોલીસે તેને નથી માર્યો ત્યારે તેણે આપઘાત કેમ કર્યો તે રહસ્ય સર્જાયું છે. પોલીસ સૂત્રોનાં જણાવ્યા અનુસાર જિગર પડોશમાં રહેતી એક યુવતીને પ્રેમ કરતો હતો. જેમાં તે તેના ઘરની બહાર રિક્ષામાં આખો દિવસ બેસી રહેતો હતો. જિગર રિક્ષામાં બેસી રહીને યુવતીનાં ઘરની સામે જોતો હોવાના કારણે અનેક વખત યુવતીના પરિવાર સાથે બાબલ થઇ હતી. ગઇ કાલે પણ આ પ્રકારની ઘટના ઘટી હોવાના કારણે જિગર વિરુદ્ધમાં પડોશીએ ૧૦૦ નંબર પર ફોન કર્યો હતો.

કાગડાપીઠ પોલીસ સ્ટેશન અમદાવાદનું સૌથી જૂનું પોલીસ સ્ટેશન હોવાના કારણે તેનું લોકઅપ પોલીસ ટેબલથી બહુ દૂર છે. જેના કારણે કોઇ પણ આરોપી લોકઅપમાં શું કરી રહ્યો છે તે જાણવું મુશ્કેલ છે. લોકઅપમાં આરોપીઓ ઉપર નજર રાખવા માટે સીસીટીવી કેમેરા લગાવેલા છે પરંતુ પોલીસ કામમાં વ્યસ્ત હોવાના કારણે સીસીટીવીનું સરખી રીતે મોનિટરિંગ કરી શકતી નથી. ગઇ કાલે આ ઘટનામાં જો પોલીસે સીસીટીવી કેમેરાનું મોનિટરિંગ કર્યું હોત તો જિગરને બચાવી લેવાયો હોત.

જિગરનાં મોતથી સમગ્ર વિસ્તારમાં ચકચાર મચી ગઇ છે ત્યારે ડીસીપી અને એસીપી સહિતના ઉચ્ચ અધિકારીઓ ગઇ કાલે પોલીસ સ્ટેશનમાં દોડી આવ્યા હતા. પોલીસે જિગરની લાશને પોસ્ટમોર્ટમ માટે હોસ્પિટલમાં મોકલી આપી છે. જ્યારે તેણે કયાં કારણસર આત્મહત્યા કરી તે જાણવા માટે તજવીજ શરૂ કરી છે.

મૃતક યુવકના પરિવારે આક્ષેપ કરતાં કહ્યું છે કે, 'અમને પોલીસ મથકમાંથી કોઇ સંતોષકારક જવાબ મળતો નથી. આ લોકોએ અમારા છોકરાની કેમ અટકાયત કરી અને તેને લોકઅપમાં કેમ લઇ ગયા તે કાંઇ પણ અમને સ્પષ્ટ કહેતા નથી. અમારા છોકરાના શરીર પર ઢોર માર માર્યાનાં નિશાન પણ છે. તો પણ પોલીસ પોતાની જવાબદારી સ્વીકારતી નથી. તે લોકોએ જો ધ્યાન આપ્યું હોત તો અમારા છોકરાનો જીવ બચી ગયો હોત. આટલી વાર સુધી તે આપઘાતનો પ્રયાસ કરે છે તો પણ કેમ તેમને કાંઇ જ ખબર નથી પડતી.'