અમદાવાદના CTM એક્સપ્રેસ બ્રિજ પરથી અત્યાર સુધીમાં 4 લોકોએ આપઘાતનો પ્રયાસ કરતા આજે VTV ન્યૂઝની ટીમે બ્રિજ પર રિયાલિટી ચેક કર્યું.
CTM એક્સપ્રેસ બ્રિજ સ્યુસાઇડ પોઇન્ટ બન્યો
બાળક સહિત 4 લોકોએ આપઘાતનો કર્યો પ્રયાસ
VTVની ટીમે બ્રિજ પર કર્યું રિયાલિટી ચેક
અમદાવાદનો CTM એક્સપ્રેસ બ્રિજ સ્યુસાઇડ પોઇન્ટ બન્યો છે. આ બ્રિજ પરથી એક માસમાં એક બાળક સહિત 4 લોકોએ આપઘાતનો પ્રયાસ કર્યો છે. જેમાં એક મહિલાનું મોત થયું છે. ત્યારે આજે VTVની ટીમે ડબલ ડેકર બ્રિજ પર રિયાલિટી ચેક કર્યું હતું. જેમાં લોકોએ પણ બ્રિજને લઈને દહેશત વ્યક્ત કરી છે અને પોલીસ બંદોબસ્તની કરી માંગ છે.
VTVની ટીમે કર્યું રિયાલિટી ચેક
સતત વધી રહેલા આપઘાતના પ્રયાસની ઘટનાએ સ્થાનિક લોકોમાં ડર ઉભો કર્યો છે અને આ ઘટના અટકાવવા અપીલ કરવામાં આવી છે. CTM ડબલ ડેકર બ્રિજ પર વધી રહેલા આપઘાતના પ્રયાસ કેસમાં VTVની ટીમે બ્રિજની સ્થિતિનું રિયાલિટી ચેક કર્યું હતું. આ મોટા બ્રિજ પર એક ફ્રેન્સિંગ કરી જાળી લગાવી છે. પરતું નીચેના બ્રિજમાં જાળી લગાવામાં આવી નથી. આ ઉપરાંત બ્રિજ પર અનેક સ્થળે નીચે પડતું મૂકી શકાય તેવી ખુલ્લી જગ્યા જોવા મળી અને જેના કારણે લોકો માટે આ બ્રિજ સુસાઇડ પોઇન્ટ બની ગયો છે. બ્રિજ પર આપઘાતના પ્રયાસની સતત ઘટનાઓ વધતા હવે રામોલ અને ખોખરા પોલીસે સંયુક્ત પેટ્રોલિંગ વધાર્યું છે.. આ બ્રિજ પર રાહદારીની અવર જવર અટકાવીને બંદોબસ્તને લઈને કાર્યવાહી હાથ ધરાઈ..
ગઈકાલે મહિલાએ કૂદીને કર્યો હતો આપઘાત
CTM એક્સપ્રેસ હાઇવે પર ફરી એક મહિલાએ ડબલ ડેકર બ્રિજ પરથી પડતું મૂક્યું હતું. બાપુનગરમાં રહેતી શીતલ સોનાર નામની 48 વર્ષની મહિલા ઘરેથી કપડાં ખરીદવા નીકળી હતી અને ત્યારબાદ CTM એક્સપ્રેસના ડબલ ડેકર બ્રિજ પર ચઢીને આપઘાત કર્યો. ગંભીર રીતે ઇજાગ્રસ્ત મહિલાને સારવાર માટે હોસ્પિટલમાં ખસેડવામાં આવ્યા જ્યાં સારવાર દરમિયાન તેમનું મોત નીપજ્યું હતું. આ ઘટનાથી પરિવાર પર શોકનું મોજુ ફરી વળ્યું છે. મહિલાએ મગજનું ઓપરેશન કરાવ્યું હોવાથી માનસિક હાલત ખરાબ હોવાનું પરિવારનું કહેવું છે. પોલીસે આ ઘટનાને લઈને અકસ્માતે મોતનો ગુનો નોંધી તપાસ શરૂ કરી છે.
1 માર્ચે પણ એક યુવતીએ લગાવી હતી છલાંગ
ગત 1 માર્ચે સવારે 11 વાગ્યાના અરસામાં એક યુવતીએ આત્મહત્યા કરવાનો પ્રયાસ કર્યો હતો. સવારે યુવતી બ્રિજ ઉપરથી કૂદી ત્યારે નીચે પટકાતા તેને ગંભીર ઇજા થઈ હતી. એટલું જ નહીં, તે નીચે પટકાયા બાદ તેની ઉપર એક કાર ફરી વળી હતી. આ ઘટનાના ચોંકાવનારા સીસીટીવી પણ સામે આવ્યા હતા. હાલ આ યુવતી સારવાર હેઠળ છે.
— VTV Gujarati News and Beyond (@VtvGujarati) March 1, 2023
17 ફેબ્રુઆરીએ બાળક આપઘાત કરવા જતા લોકોએ બચાવ્યો
17 ફેબ્રુઆરીએ 12 વર્ષનો બાળક બ્રિજ પરથી આપઘાતનો પ્રયાસ કરવા જતાં સ્થાનિક લોકો અને પોલીસે બચાવીને પરિવારને સોંપ્યો હતો. ધોરણ 7માં અભ્યાસ કરતા બાળકને માનસિક બીમારીની દવા ચાલતી હોવાનું સામે આવ્યું હતું. બાળકને ઘરે પિતાએ ઠપકો આપતા માતા-પિતાને ઘરમાં પૂરીને આપઘાતનો પ્રયાસ કરવા પહોંચ્યો હતો. પરંતુ પોલીસની સજાગતાએ બાળકનો જીવ બચાવ્યો હતો.
06 ફેબ્રુઆરીએ યુવતીએ લગાવી હતી છલાંગ
ડબલ ડેકર બ્રિજ સ્યુસાઇડ પોઇન્ટ બની ગયું છે. એક માસની અંદર આપઘાતના પ્રયાસની ચોથી ઘટના સામે આવી છે. ગત 6 ફેબ્રુઆરીએ CTM ઓવરબ્રિજ પરથી યુવતીએ બપોરના સુમારે એકા એક છલાંગ લગાવી દીધી હતી. યુવતીએ છલાંગ લગાવતા યુવતી નીચે પટકાઈ હતી. યુવતિને માથાના ભાગે ગંભીર ઈજાઓ તેમજ પગે ફેક્ચર થતા તેને સારવાર અર્થે ખસેડવામાં આવી હતી.