કબૂલાત સાથે અંત / સ્વિટી પટેલની હત્યાનો જાણો સમગ્ર મામલો, પતિએ મૃતદેહ સળગાવવા એક રાજકીય નેતાની પણ લીધી હતી મદદ

• વડોદરા SOG PIના પત્ની ગુમ થવા મામલો
• ક્રાઇમ બ્રાન્ચે સ્વીટી પટેલના ગુમ થવાનો ભેદ ઉકેલ્યો
• PI અજય દેસાઈ હત્યા કરી હોવાનો ખુલાસો

સ્વિટી પટેલ ગુમ થવા મામલે ક્રાઈમબ્રાંચને મળી મોટી સફળતા. પતિ PI અજય દેસાઈએ સ્વિટી પટેલની હત્યા કર્યાની કબૂલાત કરી લીધી છે. વડોદરાના PI અજય દેસાઈની પત્ની સ્વિટી પટેલ ગુમ હતા. અટાલીથી મળેલા માનવ અવશેષ સ્વિટી પટેલના હોવાની PI અજય દેસાઈએ કબૂલાત કરી છે. 

કેવી રીતે કરી હત્યા અને શું હતું કારણ

સ્વિટી પટેલ હત્યા મામલે પોલીસ દ્વારા સમગ્ર ક્રાઈમનો ખુલાસો કરવામાં આવ્યો છે. જેમાં પોલીસે જણાવ્યું કે, 5 જૂન 2021ના દિવસે સ્વિટી પટેલ ગુમ થયા હોવાની જાણ થઈ હતી. જે બાદ પોલીસે ટેક્નિકલ તપાસના આધારે જાણ્યું કે, PI અજય દેસાઈ અને સ્વિટી પટેલ વચ્ચે ગુમ થવાના એક દિવસ અગાઉ 4 જૂને લગ્ન સંબંધિત ઝઘડો થયો હતો. ઉગ્ર ઝઘડામાં PI અજય દેસાઈએ આવેશમાં આવી સ્વિટી પટેલનું ગળું દબાવી હત્યા કરી હતી. અને સ્વિટી પટેલના મૃતદેહને બાથરૂમમાં છૂપાવી દીધો હતો. 

સ્વિટી પટેલના મૃતદેહને કર્યો ઠેકાણે

એક રાત્રી મૃતદેહને પોતાના ઘરના બાથરૂમમાં છૂપાવી રાખ્યા બાદ બીજા દિવસની સવારે 11 કલાકે PI અજય દેસાઈએ પોતાની બ્લેક જીપનો ઉપયોગ કર્યો હતો. જીપને ઘરના ગેટ સુધી રિવર્સ લઈ મૃતદેહને બ્લેન્કેટમાં કવર કર્યા બાદ જીપની ડેકીમાં મૂકી દીધી હતી. આ બાદ ગાડીને બાજુના મકાનના કમ્પાઉન્ડમાં રાખી પોતાના સાળા જયદીપને કહ્યું કે, તેમના બહેન સ્વિટી પટેલ ગુમ થઈ ગયા છે. 

અટાલીની એક બંધ હોટલ પાછળ મૃતદેહને સળગાવાયો

સ્વિટી પટેલના ભાઈને જાણ કર્યા બાદ અજય દેસાઈએ મૃતદેહને ઠેકાણે લગાવવાની તજવીજ હાથ ધરી હતી. આ માટે PI અજય દેસાઈએ પોતાના મિત્ર કિરીટ સિંહ જાડેજા કરજણવાળાની મદદ લીધી હતી. અને 5 જૂનની સાંજે 4 વાગ્યે કરજણ-આમોદ-વાગરાથી દહેજ હાઈ-વે પર અટાલી ગામના પાટી પાસે કિરીટસિંહ જાડેજાની બંધ હોટલ પર પહોંચ્યા હતા. આ હોટલ લાંબા સમયથી બંધ હતી. અને હોટલના પાછળના ભાગે આવેલા ખુણામાં ગાડીને લઈ મૃતદેહને સળગાવી દેવાયો હતો. આ કેસમાં PI અજય દેસાઈની સાથે કિરીટસિંહ જાડેજાને પણ આરોપી બનાવવામાં આવ્યા છે. 

શા માટે કોંગ્રેસ નેતાની પોલીસે કરી હતી પૂછપરછ

કરજણના રાજકીય નેતા કિરીટસિંહ જાડેજા અને સ્વિટી પટેલના પતિ PI દેસાઈ વચ્ચે સારી મિત્રતા હોવાની સૂત્રોકીય માહિતી હતી. અને થોડા દિવસ પહેલા પોલીસને અટાલી નજીક જે ઈમારત પાછળ બળેલા હાડકા મળ્યા હતા. તે જમીનના દસ્તાવેજની પણ પોલીસે તપાસ હાથ ધરી હતી. આ મામલે સૂત્રોએ માહિતી જણાવી કે, તેમાં 15 જેટલા ભાગીદારો છે. અને કિરીટસિંહ પણ એક ભાગીદાર છે. 10 વર્ષ અગાઉ આ જમીન પર હોટલનું બાંધકામ શરૂ કરાયું હતું. જે પૂરું થઈ શક્યું નહોતું.