અમદાવાદના વાડજમાં દોઢ વર્ષ પહેલા મહિલાએ પોલીસકર્મી સામે નોંધાવેલી ફરિયાદ મામલે ક્રાઇમબ્રાંચે હાલ સાયબર ક્રાઇમમાં ફરજ બજાવતા PSIની ધરપકડ કરી છે. મહિલાનો પતિ ગુમ થયો હોવાની ફરિયાદ કરવા ગયેલી મહિલા જ પોલીસનો શિકાર બની હતી. PSIએ તપાસનાં નામે હોટલમાં બોલાવી દુષ્કર્મનો પ્રયાસ કર્યો હતો. ત્યારે હવે આ મામલે DCPએ જે PSIને ક્લીનચિટ આપી તેની ક્રાઇમ બ્રાંચે ધરપકડ કરી છે.
DCPએ જે PSIને ક્લીનચિટ આપી તેની ક્રાઇમ બ્રાંચે ધરપકડ કરી
ભોગ બનનારની ફરિયાદ પર તપાસ કરી ડીસીપીએ ક્લીનચિટ આપી હતી
કમિશનરના આદેશ બાદ ગુનો દાખલ થયો હતો
કોન્સ્ટેબલથી લઇ IPS અધિકારીઓ વિરુદ્ધ જ્યારે કોઇ પણ ફરિયાદ થાય છે, ત્યારે તેમને બચાવવા માટે પોલીસ વિભાગ મેદાનમાં ઊતરતો હોવાના અનેક કિસ્સા સામે આવ્યા છે. કાયદાની આંટીઘૂંટી અને પાયાવિહોણી તપાસ કરી પોલીસ કર્મચારીઓને બચાવી લેવામાં આવતા હોય છે. આવું જ કંઇક સાયબર ક્રાઇમના PSI આર.આર. મિશ્રા સાથે બન્યું હતું. ઝોન-1ના તત્કાલીન DCP પી.એલ. મલ્લે ભોગ બનનાર પરિણીતાની ફરિયાદમાં પાયાવિહોણી તપાસ કરી PSI આર.આર. મિશ્રાને ક્લીનિચટ આપી દીધી હતી, જોકે પોલીસ કમિશનરે કરેલા આદેશ બાદ પરિણીતાએ વાડજ પોલીસ સ્ટેશનમાં PSI વિરુદ્ધ બળાત્કારના પ્રયાસની ફરિયાદ કરી હતી.
અમદાવાદના વાડજ વિસ્તારમાં રહેતી એક પરિણીતાને હોટલમાં લઇ જઇ વાડજ પોલીસ સ્ટેશનના PSI આર.આર. મિશ્રાએ શારીરિક સંબંધ બાંધવાનો આક્ષેપ કરતી ફરિયાદ વાડજ પોલીસ સ્ટેશનમાં જુલાઇ મહિનામાં નોંધાઇ હતી. આ ફરિયાદ બાદ PSI આર.આર. મિશ્રાની સાયબર ક્રાઇમમાં બદલી કરવામાં આવી હતી. કેસની તપાસ પહેલાં બી-ડિવઝનના એસીપી કરી રહ્યા હતા, જોકે ત્યારબાદ કેસની તપાસ ક્રાઇમ બ્રાંચને સોંપાઇ હતી. ક્રાઇમ બ્રાંચે આ કેસમાં તટસ્થ તપાસ કરી ગઇકાલે આર.આર. મિશ્રાની ધરપકડ કરી હતી. છેડતીનો કેસ હોવાના કારણે મિશ્રાને ગણતરીના કલાકોમાં જામીન મળી ગયા છે. ક્રાઇમ બ્રાંચે હોટલના CCTV ફૂટેજ તેમજ કેટલાક સાંયોગિક પુરાવા ભેગા કર્યા બાદ તેની ધરપકડ કરી છે.
પોલીસસૂત્રોના જણાવ્યા અનુસાર પરિણીતાએ ઝોન-૧ના તત્કાલીન ડીસીપી પી. એલ. મલ્લ સહિત પોલીસ અધિકારીઓને PSI વિરુદ્ધ અરજી કરી હતી, જેમાં ડીસીપીએ તપાસ કર્યા બાદ PSIને ક્લીનિચટ આપી હતી. PSIને ક્લીનિચટ આપ્યા બાદ તે તત્કાલીન પોલીસ કમિશનર આશિષ ભાટિયાને મળી હતી, જેમાં તેમણે વાડજ પોલીસને PSI વિરુદ્ધ ગુનો દાખલ કરવા માટેનો આદેશ કર્યો હતો.
ઉલ્લેખનીય છે કે પતિ સામે કેસ કરવાની ધમકી આપી PSI આર.આર. મિશ્રાએ પરિણીતાને એપલવૂડ હોટલમાં બોલાવી હતી, જ્યાં તેની સાથે બળજબરી કરી હતી. સમગ્ર ઘટનામાં DCPએ કરેલી તપાસ પર સવાલ ઊભા થયા છે, કારણ કે ક્રાઇમ બ્રાંચે પુરાવાના આધારે PSIની ધરપકડ કરી છે.