ડ્રગ્સ રેકેટ / અમદાવાદમાંથી 10-20 લાખ નહીં 1 કરોડનું ઝડપાયું MD ડ્રગ્સ, એક પોલીસકર્મી સહિત 5ની ધરપકડ

• અમદાવાદના 1 કરોડની કિંમતનો એમડી ડ્રગ્સનો જથ્થો ઝડપાયો
• ડ્રગ્સની હેરાફેરીમાં પોલીસ કર્મચારીની સંડોવણી
• મુંબઈથી આવ્યું હતું ડ્ર્ગ્સનું કન્સાઈનમેન્ટ

અમદાવાદમાંથી MD ડ્રગ્સ ઝડપાવાનો મામલે ઇમરાન પઢીયાર, મોહમ્મદ આરીફ ફિરોઝ ખાન(ASI), શહેઝાદ તેજાબવાલા અને ઇમરાન અજમેરીની ધરપકડ કરવામાં આવી છે. આ મામલે ક્રાઇમ બ્રાન્ચના ACP બી.વી.ગોહિલે નિવેદન આપ્યું હતું. તેમણે કહ્યું કે, એક્સપ્રેસ હાઇવે પરથી અલ્ટો ગાડીમાંથી 995 ગ્રામ ડ્રગ્સ સાથે આરોપીઓ ઝડપાયા હતા. કોઈને શંકા ન થાય તે માટે ડ્રગના વેપારીઓ ડ્રગ્સની ડિલિવરી માટે એક પોલીસકર્મીનો ઉપયોગ કરતા હતા. 

દાણીલીમડાના ASI ફિરોઝખાન પઠાણની ધરપકડ

પોલીસ અધિકારીએ જણાવ્યું હતું કે, ફિરોઝ ખાન નાગોરી ASI તરીકે ફરજ બજાવે છે, ગાડીમાં ASI વર્દીમાં ન હતો. 11 તારીખે આરોપી મુંબઇની એક હોટલમાં રોકાયા હતા. ઇમરાન અજમેરી અને શહજાદ તેજાવાલા ત્યાં મળ્યા હતા. બંને આરોપી પેરોલ જંપ કરી ફરાર હતા. ASI પોલીસ યુનિફોર્મ સાથે રાખીને ગયા હતા. ASI પ્રથમ વખતે તેમની સાથે જોડાયો હતો. ફિરોઝ કેરિયર તરીકે મદદ કરતો હોવાનું સામે આવ્યું છે. અગાઉ કેટલી વખત તેમની સાથે સંકળાયેલો તેની તપાસ ચાલુ છે. ફિરોઝ છેલ્લા 9 તારીખે SHE ટીમ સાથે હતા. 11 સપ્ટેમ્બરે ફિરોઝ ફરજ પર હાજર ન હતા. શહજાદ તેજાવાલા અને તેના પિતા અગાઉ ઝડપાયા હતા. શહજાદ તેજાવાલા બે દિવસ અગાઉ પેરોલ પર નિકળ્યો હતો. મુંબઈથી આ ડ્રગ્સ લાવવામાં આવ્યું હોવાનું બહાર આવ્યું છે, જોકે હાલ ક્રાઈમ બ્રાન્ચે વધુ પૂછપરછ શરૂ કરી છે.

મુંબઈથી આવ્યું હતું ડ્ર્ગ્સનું કન્સાઈનમેન્ટ

સાંચોરમાંથી ત્રણ અને ગુજરાતના સિદ્ધપુરમાંથી એકને સિદ્ધપુર ડ્રગ કન્સાઈનમેન્ટ સાથે પકડ્યા બાદ સિટી ક્રાઈમ બ્રાન્ચ દ્વારા આ બીજીવાર આટલી કિંમતનું એમડી ડ્રગ્સ ઝડપવામાં આવ્યું છે. ક્રાઈમ બ્રાંચના સૂત્રોએ જણાવ્યું કે, આરોપીઓની પ્રાથમિક પૂછપરછ ચાલી રહી હતી ત્યારે તેઓને શંકા હતી કે રવિવારે સવારે જપ્ત કરાયેલા ડ્રગ્સનું કન્સાઈનમેન્ટ મુંબઈથી આવ્યું હતું.

ASI પર પણ કોઇ મોટા અધિકારીનો હાથ?

ત્યારે સવાલ ઉઠી રહ્યા છે કે 1 કરોડના ડ્રગ્સ રેકેટમાં કેટલાની સંડોવણી છે? શું ASI પર પણ કોઇ મોટા અધિકારીનો હાથ છે? કેટલા સમયથી ચાલતું હતું ડ્રગ્સ રેકેટ? અત્યાર સુધી કેટલું ડ્રગ્સ અમદાવાદમાં લવાયું છે? ASIની સંડોવણીને અંગે અત્યાર સુધી સૌ કોઈ અજાણ હતા? જો ASI કક્ષાનો અધિકારી ગુનામાં સંડોવાયેલો હશે તો લોકો કોની પર વિશ્વાસ કરશે? ડ્રગ્સ રેકેટમાં કેટલાને હપ્તા જઇ રહ્યા છે?